Куонкурус кыайыылааҕа – Айсен Молуков

Кызылга ыытыллан түмүктэммит көҥүл тустууга эр дьоҥҥо Россия чемпионатыгар анаан тэрийбит куонкуруспут түмүктэннэ. Бу тэрээһиҥҥэ, эрдэ иһитиннэрбиппит курдук, 25 тустууну таптааччы кытынна.

Кинилэр чемпионнарынан кимнээх буолуохтарай уонна биир дойдулаахтарбытыттан кимнээх миэстэлэһиэхтэрэй диэн ыйытыыларга бэйэлэрин сылыктааһыннарын ыыппыттара. Түмүккэ, киирбит эппиэттэри ырытан, ааҕан көрөн баран, кыайыылааҕынан Айсен Молуков таҕыста.

Кини Дьокуускай куоракка олорор, «Өрөгөй» Спорка бэлэмнэниии киинигэр инструкторынан үлэлиир. Айсен биһиги куонкурустарбытыгар өрүү ситиһиилээхтик кыттар. Ол курдук, кини 2019 с. аан дойду чемпионатыгар, 2020 с. аан дойду индивидуальнай Кубогар уонна 2020 с. Россия чемпионатыгар ыыппыт куонкурустарбытыгар кыайыылааҕынан тахсыталаабыта. Айсен бэйэтэ мас-рестлиҥҥэ спорт маастарыгар кандидат, оттон кэргэнэ Светлана спорт ити көрүҥэр спорт маастара. Кини аҕыйах хонугунан Бороҕоҥҥо, Саха сирин норуоттарын VIII спортивнай оонньууларыгар — дьахталлар тустууларыгар кыттаары сылдьар.

Быйылгы куонкуруска кыайыылаах бэйэтин эппиэтин 14-с киһинэн ыыппыта. Кини барыта 7 очукуону хомуйда. Ол курдук, Завур Угуев (57 кг), Абасгаджи Магомедов (61 кг), Разамбек Жамалов (74 кг), Артур Найфонов (86 кг), Магомед Курбанов (92 кг) уонна Асланбек Сотиев (97 кг) чемпионнуулларын сөпкө таайбыт. Өссө Виктор Рассадин үһүс буолуо диэн сөпкө эппит.

Оттон Алексей, Константин, Панаат – 6-лыы очукуону хомуйдулар. Манна даҕатан эттэххэ, Алексей соҕотоҕун, Айхаан Антонов 65 киилэҕэ боруонса мэтээли ыларын сөптөөхтүк билгэлээбит.

Кыайыылаах Айсен Молуковы эҕэрдэлиибит! Бүгүн киниэхэ бирииһэ – «Покорившие Олимп» кинигэ туттарылынна.

Куонкуруска кыттыбыт дьоҥҥо барыгытыгар махтанабыт! Өссө даҕаны маннык куонкурустар тэриллиэхтэрэ. Онон биһиги “Дьулурҕан” хаһыаппытын, dzulurgan.ru сайтпытын кэтии сылдьаргытыгар баҕарабыт.

PS: Куонкурус кыттааччылара сайтка киирэн, ким төһө очукуоламмытын бэйэҕит ааҕыаххытын сөп.  

Петр Павлов.   

Добавить комментарий

Ваш адрес email не будет опубликован.