Конкурс: Финалистары 7 киһи таайбыт!

Футболга аан дойду чемпионатыгар анаан билгэлээһин конкурс биллэрбиппитигэр, барыта 43 киһи бэйэтин хоруйун ыытта.

Киирбит билгэлээһини кылгастык ырытан көрдөххө, финалга Аргентина уонна Франция хамаандалара көрсүөхтэрэ диэн 7 киһи сөпкө эппит. Кинилэр балаһыанньа быһыытынан, 2-лии очколаннылар.

Кимнээҕий диэтэххэ, бары спорт бэриниилээх ыалдьааччылара, «Дьулурҕан» доҕотторо. Ол курдук, биллиилээх архитектор, Роман Дмитриев, Дмитрий Коркин, Артур Пахомов пааматынньыктарын автора Сергей Лукин, спортивнай комментатор Серафим Терентьев, ааспыттааҕы маннык конкурс кыайыылааҕа Федора Захарова, биһиги хаһыаппыт элбэх конкурстарыгар бастыы сылдьыбыт Михаил Максимов уонна А.Бояров, А.Андреев, Владислав диэн кыттааччылар. Онон, син биир спорт түһүлгэтигэр курдук, биһиги конкурспутугар састаап күүстээх диэххэ сөп.

Ити курдук, салгыы ырыттахха, кыттааччылартан 17 киһи Франция, 8 киһи Аргентина финалга тахсыахтара диэн сөпкө билгэлээбит. Онон кинилэр 1-дии очкону суруннулар.

Дьэ, аны ханнык хамаанда бастыырын, ханнык ахсаанынан кыайарын, ким бастыҥ футболиһынан ааттанарын тулуйбакка-тэһийбэккэ кэтэһэбит. Биһиги dzulurgan.ru сайтпытын кэтии сылдьыҥ! Конкурска кимнээх хайдах кыттыбыттарын сайтпытыгар киирэн, инникинээҕи сырдатыыга көрүөххүтүн сөп.

Эрдэ биллэрбиппит курдук, кыайыылаах «Илин эҥэр» футболга бэтэрээннэрин хамаандатын сыаналаах бирииһинэн бэлиэтэниэ. Ол курдук, бастаабыт киһи, аан дойду чемпионатын футболкатынан уонна мээчигинэн наҕараадаланыа. Футболка Катартан аҕалыллынна. Хаһаайынын кэтэһэр.

“Дьулурҕан”.

Добавить комментарий

Ваш адрес email не будет опубликован. Обязательные поля помечены *