Кинини спорт чыпчаалларын саҥа саҕахтара угуйаллар

Улуу тренер Д.П. Коркин кэриэһигэр көҥүл тустуу турнирыгар биһиги иитиллээччибит Максим Толмачев бэрт таһымнаах хапсыһыылары көрдөрөн үөртэ. Хаһан да буолбатах үрдүк тэрээһиннээх күрэхтэһии буолан ааста.

Максим билигин сааһа 24-дэ, үрдүгэ 183 см, ыйааһына муҥура 100 киилэ. Саамай күөгэйэр кэмэ, этэҥҥэ сырыттаҕына, киһи кэтэһэр ыччата буолан эрэриттэн биһиги коллективпыт санаата көтөҕүллэр. Эдэр киһи иннигэр киэҥ суол тыргыллар, кинини спорт чыпчаалларын саҥа саҕахтара угуйаллар.

Биһиги – В.П. Керемясов аатынан Дьокуускай куорат 3 №-дээх спортивнай оскуолабытыгар Максим алтыс кылааска үөрэнэ сылдьан эрчиллэ кэлбитэ. Үгүс ахсааннаах оҕолортон тугунан да чорбойбот, киһи соччо сэҥээрбэр оҕото этэ буолан баран, биир-икки сыл ааһаатын кытта бэйэтин дьаныарынан, тустууга бэриниилээҕинэн биллэн-көстөн барбыта. Куорат кытыытыгар да олордор, дьарыгы көтүппэт этэ.

Олох кыра сааһыгар, ыраах Чокурдаах бөһүөлэгэр олорор эрдэҕинэ, кинини тустууга үөрэппит киһинэн Чурапчыттан төрүттээх оскуола физкультураҕа учуутала Ньургун Петрович Попов буолар. Кини эдэр эрчимнээх саастарыгар Чокурдаахха үлэлээбитэ суола-ииһэ суох сүтэн-оһон хаалбатахтар. Кини дойдутугар эргиллэн кэлэн төрөөбүт нэһилиэгин – Алаҕар баһылыгынан үлэлээбитэ-хамсаабыта элбэҕи этэр.

Уол билиҥҥи тус тренерэ Н.Н. Никифоров – Саха Республикатын үтүөлээх тренерэ, П.С. Ивановтуун бииргэ үлэлээн – Европа, аан дойду чемпионнарын, призёрдарын Иван Оконешниковы, Петр Константиновы, Егор Слепцову иитэн, дьарыктаан таһаарбыта.

Никита Николаевич көҕүлээһининэн, Д.П. Коркин турнирын кэнниттэн Максим Толмачев иитиллибит кыһатын, билиҥҥи иитиллээччилэрин кытта көрсүһүү тэрилиннэ. Мустубут дьоҥҥо Максим икки кэнники ситиһиитин: А.В. Крылов кэриэһигэр Бүтүн Россиятааҕы уонна Д.П. Коркин аатынан норуоттар икки ардыларынааҕы турнирдарга ылбыт мэтээллэрин көрдөрдө.

Оҕолор, баһыйар үгүстэрэ итинник мэтээллэри аан маҥнай көрбүт буолан, сөҕүү-махтайыы бөҕөтө. Харахтара уоттанан, истэригэр маннык мэтээллэргэ дьулуһар санаа үөскээбит буоллаҕына, бу биһиги үлэбит биир сүрүн кыайыыта буолуохтаах.

Федот СОЛОВЬЕВ, РФ физическэй культуратын үтүөлээх үлэһитэ, көҥүл тустууга бэтэрээннэргэ аан дойду чемпиона.