Катар-2022: Викторина кыайыылаахтарынан кимнээх буоллулар?

Футболга аан дойду чемпионатын кэмигэр спорт бу көрүҥүн историятыгар сыһыаннаах викторина-конкурспут икки нэдиэлэ кэриэтэ ыытыллан түмүктэннэ. Бу иннинэ dzulurgan.ru сайтка иһитиннэрбиппит курдук, викторинаҕа барыта 60 киһи кытынна.

Санатан эттэххэ, викторина 13 ыйытыыттан турбута. Онуоха түөрт киһи: Анфиса Слепцова, Иван Барашков, Николай Тихонов уонна Николай Фомин ыйытыыларга барыларыгар сөптөөх хоруйдары биэрэн, футболга аан дойду чемпионатыгар анаммыт тэрээһиммит кыайыылаахтарынан буоллулар. Кинилэри, булугас өйдөрүнэн, спорка, чуолаан киһи-аймах саамай сэҥээрэр спордун көрүҥэр бэриниилээхтэринэн эҕэрдэлиибит!

Викторина-конкурс кыайыылаахтарыгар, эрдэ эппиппит курдук, Михаил Тарскай салайааччылаах «Медведь» маҕаһыын сертификаттара бириис быһыытынан ананнылар. Бүгүн, Арктическай государственнай университет преподавателэ, спорт бэриниилээх ыалдьааччыта, спорт тиэмэтигэр билиитинэн киһи дэбигис тэҥнэспэт киһитэ, бу иннинэ «Дьулурҕан» хаһыат футболга, хоккейга, тустууга ыыппыт конкурстарын кыайыылааҕа Иван Барашковка «Медведь» маҕаһыыҥҥа бирииһэ үөрдэ-көтүтэ туттарылынна.

Мэҥэ Хаҥалас ыччата, билигин Кэбээйигэ вахтанан ньыманан үлэлии сылдьар Николай Тихонов оннугар бирииһи кини доҕоро Алексей Иванов кэлэн ылла.

Орто Халыматтан төрүттээх суруналыыс, спорт бэриниилээх ыалдьааччыта Анфиса Слепцова билигин Санкт-Петербурга олорор, үлэлиир буолан, киниэхэ бирииһэ кэнники туттарыллыа. Оттон викторина төрдүс кыайыылааҕа Николай Фомин эппиэтигэр телефонун суруйбатах буолан, билбэккэ сылдьар. Киниэхэ эмиэ син биир сертификата туттарыллыа.

Викторинаҕа кыттыбыт бары дьоҥҥо барҕа махталбытын тиэрдэбит! Итиэннэ викторина түмүгүн баттаһа аны билгэлээһин-конкурс тэриллэрин туһунан этэбит. Биһиги сайтпытын кэтии сылдьыҥ!

PS: Викторина-конкурс туһунан ырытыы санаалаах суруйууну сарсын сайтка ааҕаарыҥ.

«Дьулурҕан».

Хаартыскаҕа: викторина кыайыылааҕа Иван Барашковка (ортоку), «Медведь» маҕаһыын атыылааччыта Анна Бурнашева сертификат туттарар уонна викторина тэрийээччитэ Петр Павлов.

Добавить комментарий

Ваш адрес email не будет опубликован. Обязательные поля помечены *