Катар-2022: Кыайыылаахха бирииһэ туттарылынна

«Дьулурҕан» хаһыат, Катарга ыытыллыбыт футболга аан дойду чемпионатыгар анаан тэрийэн ыыппыт конкурсун биир кыайыылааҕынан Дьокуускай куорат В.П. Керемясов аатынан 3 №-дээх спортивнай оскуолатын техническэй үлэһитэ Михаил Максимов буолбута.

Михаил биһиги хаһыаппыт эрэллээх доҕоро. «Дьулурҕаны» хара тахсыаҕыттан ааҕар. Өссө ааҕар эрэ буолбатах, хаһыат тэрийэр конкурстарыгар көхтөөхтүк кыттар.

2002 сыллаахха Дьокуускайга ыытыллыбыт көҥүл тустууга Россия чемпионатыгар тэриллибит конкурска кыайыы көтөллөммүтэ. Итиннэ кини 70-ча кыттааччыттан соҕотоҕун – 60 киилэҕэ Прокопий Петров чемпионнуо диэн сөпкө таайбыта. Ити курдук, биирдэ Европа футболга чемпионатын конкурсугар эмиэ бастаабыта.

Оттон 2018 сыллаахха футболга аан дойду чемпионатын конкурсугар кыайыылаах Федора Захарова (Мэҥэ Хаҥалас) кэнниттэн иккис көрдөрүүлэнэн, сүрүн бириистэн чуут маппыта.

-«Дьулурҕан» тыа сиригэр саамай ааҕыллар хаһыат, – диир Михаил. – Маннык конкурстары өрүү ыытар. Ханнык баҕарар киһи бу олоххо таптыыр идэлээх, сөбүлүүр дьарыктаах буолар. Мин оҕо эрдэхпиттэн спорду сөбүлээн көрөбүн. Ордук көҥүл тустууну уонна футболу. Футболга аан дойду чемпионатын 1982 сылтан көтүппэккэ көрөбүн. Чемпионат инниттэн Аргентина кыайыа диэн эрэммитим. Лионель Месси сулустаах кэмэ тосхойдо. Конкурс буолуо диэн эрдэттэн сэрэйэр этим уонна балаһыанньата тахсыбытыгар, тута бэйэм сылыктарбын ыыппытым. Уонна биир кыайыылаах буолбуппуттан астынным. Маннык конкурстары өссө тэрийэ тураргытыгар баҕарабын.

Михаил Максимов туһунан кылгастык билиһиннэрдэххэ, кини Тааттаттан төрүттээх. Биир дойдулаахтара этэллэринэн, оскуолаҕа үөрэнэ сылдьан бэркэ тустара эбитэ үһү. Кини бэйэтэ сэмэй киһи, ону-маны ыһа-тоҕо кэпсии-ипсии сылдьыбат. Спорт туһунан ааҕарын, көрөрүн сөбүлүүр.

Михаилы «Катар-2022” конкурска кыайыытынан эҕэрдэлиибит уонна үлэҕэ, олоххо ситиһиилэри баҕарабыт! Киниэхэ ааптартан илии баттааһыннаах “Покорившие Олимп” кинигэ туттарылынна.

Санатан эттэххэ, футболга аан дойду чемпионатыгар анаан тэрийбит республикатааҕы конкурспутугар өссө кыайыылаахтарынан Айтал Андреев (Кэбээйи), Федора Захарова (Мэҥэ Хаҥалас) буолбуттара. Кинилэргэ конкурс сүрүн спонсора – Илин эҥэр футболга бэтэрээннэрин хамаандатын аатыттан Катартан аҕалыллыбыт футболка уонна мээчик туттарыллар.

Түгэнинэн туһанан, конкурс тэрээһинигэр көмөтүн иһин, «Чемпионнар баалларыгар» 2022 сыл түмүгүнэн «Бастыҥ судьуйа» аатын ылбыт Николай Гаврильевич Цыпандиҥҥа махтанабыт!

Петр ПАВЛОВ.

Ааптар хаартыскаҕа түһэриитэ.  

Добавить комментарий

Ваш адрес email не будет опубликован. Обязательные поля помечены *