Катар-2022: Конкурс кыайыылааҕынан үс киһи буолла

Дьэ, биир ый устата Катарга ыытыллыбыт футболга аан дойду чемпионата түмүктэннэ. Быһаарыылаах оонньууга Аргентина хамаандата Францияны (сүрүн бириэмэ 2:2, эбии бириэмэ 3:3, пенальти 4:2) кыайан, чемпион буолла. Чемпионат бастыҥ футболиһынан аргентинец Лионель Месси ааттанна.

Киһи аймах саамай сөбүлүүр, сүгүрүйэр спордун көрүҥэр республикатааҕы «Дьулурҕан» хаһыат dzulurgan.ru сайта тэрийбит конкурсугар, эрдэ эппиппит курдук, 43 киһи кыттыбыта.

Конкурс ыйытыылара маннык этилэр:

-Финалга ханнык хамаандалар тахсыахтарай? (Сөптөөх хоруйга 1-дии очко ааҕыллар)

-Ханнык хамаанда кыайыыны ситиһиэй? (1 очко)

-Ханнык ахсаанынан? (2 очко)

-Чемпионат бастыҥ футболиһынан ким буолуой? (1 очко).

Дьэ, онон быһаарыылаах ааҕыы, суоттааһын кэнниттэн үс киһи: Айтал Андреев, Федора Захарова, Михаил Максимов 4-түү очконы ылан, конкурс кыайыылаахтарынан буоллулар. Кинилэр финалга Аргентина – Франция көрсүөхтэрэ диэн 2-лии уонна Аргентина чемпион, Месси бастыҥ футболист буолуо диэн 1-дии очкону хомуйдулар. Кыайыылаахтары эҕэрдэлиибит!

Онтон Сандал, Figoze, Павел Васильев, Руслан Тарбахов, Вячеслав – Аргентина финалга тахсар уонна кыайар, Месси бастыҥ буолар диэн, 3-түү очколанан, куһаҕана суох көрдөрүүлэннилэр. Оттон финал ханнык ахсаанынан түмүктэниэй диэн ыйытыыга ким да сөптөөх хоруйу биэрбэтэ.

Кыайыылаахтар «Илин эҥэр» футболга бэтэрээннэрин хамаандатын сыаналаах бириистэринэн наҕараадаланыахтара. Ону эмиэ туспа сырдатыахпыт.

Конкурска кыттыбыт бары дьоҥҥо барҕа махтал! «Дьулурҕан» ыытар бары хайысхалаах үлэтигэр бу курдук өрүү көхтөөхтүк кыттаргытыгар баҕарабыт.

«Дьулурҕан».

Добавить комментарий

Ваш адрес email не будет опубликован. Обязательные поля помечены *