Катар-2022: Федора Захарова иккис төгүлүн кыайда

«Дьулурҕан» хаһыат, Катарга ыытыллыбыт футболга аан дойду чемпионатыгар анаан тэрийэн ыыппыт конкурсун кыайыылаахтарын билиһиннэриини салгыыбыт. Конкурс биир кыайыылааҕынан Мэҥэ Хаҥаластан Майатааҕы, академик В.П. Ларионов аатынан оскуола үлэһитэ Федора Захарова буолбута.

Кини биһиги хаһыаппыт биир бэриниилээх ааҕааччыта. Тэрийэр конкурстарбытыгар, көҥүл тустуу буоллун, футбол буоллун барытыгар өрүү кыттар.

–Эдэр эрдэхтэн сүрдээх хамсаныылаах, киириилээх-тахсыылаах буолан, ордук спорт сүүрүүлээх-көтүүлээх көрүҥнэрин сөбүлээн көрөбүн, – диир Федора Захарова. – Бастаан тустуу, хоккей буолара. Онтон сыыйа үйэ хаамыытынан футболга көспүтүм. Оҕом олох тартаран көрөрө, азарт бөҕө. Дьэ, оннук биллибэттик футболга киирэн хаалбыппыт.

Ааспыт чемпионакка Франция хамаандата эрэллээхтик бастаабыта. Онтон быйыл табыллыбатылар. Финалга эрдэттэн кимиилээхтик оонньообокко хоттордулар. Аргентина хамаандата эрдэттэн фаворит быһыытынан тахсыбыта. Дьэ, маннык түгэннэргэ көрөөччүттэн адреналин бөҕө тахсар, футбол хаһан кэлэрин түүннэри кэтэһии, гол киллэрдэхтэринэ үөрүү хаһыыта, өрүкүйүү, ол аайы дьукаахтар истиэнэ тоҥсуйуулара, мөҕүттүүлэрэ…

Футбол эдэримсийбитэ ыраатта, онон ыччат дьон маннык конкурска, билгэлээһиҥҥэ күүскэ кыттыан сөп дии саныыбын. Быйылгы конкурска биир дойдулааҕым Николай Цыпандин спонсор быһыытынан кыттыбытыгар махтанабын! Инникитин футбол федерация өссө күүскэ үлэлээн, бэйэбит оҕолорбутугар үрдүкү таһымнаах күрэхтэһиилэргэ хаһыытыы олорор буолуохпут диэн бөҕөх санаалаахпын.

Манна даҕатан эттэххэ, Федора Захарова ааспыт, 2018 сыллааҕы футболга аан дойду чемпионатыгар ыыппыт конкурспутугар эмиэ бастаан турар. Онно соҕотоҕун кыайбыта. Дьэ, куруук инники күөҥҥэ сылдьар диэтэҕин! Ол аата, кини бэриниилээх ыалдьааччы буоларын дьиҥнээхтик итэҕэтэр. Онно бастаабытыгар кыайыылаахха, чемпионаты илэ хараҕынан көрөн кэлбит Дьокуускай куораттааҕы “Эхо столицы – Киин куорат” хаһыаттар кылаабынай редактордара Александр Прокопьев өйдөбүнньүк бэлэҕи туттарбытын бу хаартыскаҕа көрөҕүт.

Быйылгы чемпионакка анаан тэрийбит республикатааҕы конкурспутугар өссө кыайыылаахтарынан Айтал Андреев (Кэбээйи), Михаил Максимов (Дьокуускай) буолбуттарын санатабыт. Кыайыылаахтарга конкурс сүрүн спонсора – Илин эҥэр футболга бэтэрээннэрин хамаандатын аатыттан Катартан аҕалыллыбыт футболка уонна мээчик туттарыллар.

PS: Футбол конкурса түмүктэннэ, ол эрээри, мантан инньэ атын конкурстар баар буолуохтара. “Дьулурҕан” хаһыаты уонна dzulurgan.ru сайты кэтии сылдьыҥ.

Түгэнинэн туһанан, конкурс тэрээһинигэр көмөтүн иһин, «Чемпионнар баалларыгар» 2022 сыл түмүгүнэн «Бастыҥ судьуйа» аатын ылбыт республикатааҕы футбол оскуолатын дириэктэрэ Николай Гаврильевич Цыпандиҥҥа махтанабыт!

“Дьулурҕан”.