Күөх Ньурбаҕа саҥа ситиһиилэр кэлэллэригэр эрэнэбит!

Күн бэҕэһээ Маар орто оскуолатыгар улуустааҕы оҕо спортивнай оскуола көҕүлээн, сахалыы көрүҥнэри сөргүтэр, үгэстэри утумнуур сыалтан, киэҥ Ньурба кэнчээри ыччаттара кэлэн, өбүгэ бэлэхтээн хаалларбыт оонньууларыгар күөн көрүстүлэр.

Күрэхтэһии кэннэ оҕо спортивнай оскуолатын атах оонньуутугар тренерэ, саха төрүт оонньууларыгар (ыстаҥаҕа) Саха Өрөспүүбүлүкэтин успуордун маастара, атах оонньуутугар уонна чэпчэки атлетикаҕа өрөспүүбүлүкэтээҕи күрэхтэһиилэр хас да төгүллээх кыайыылаахтара, быйыл Бороҕоҥҥо ыытыллыбыт Саха сирин норуоттарын спортивнай оонньууларыгар 100 миэтэрэҕэ сырсыыга үһүс миэстэлээх, чэпчэки атлетикаҕа Арассыыйа успуордун маастарыгар хандьыдаат Айаал Рустамович Иванов  уонна Киирэп орто оскуолатын физкультураҕа учуутала, саха төрүт оонньууларыгар (ыстаҥаҕа) СӨ успуордун маастара, эдэр ыччаттарга рекордсмен, былырыыҥҥы Манчаары оонньууларын үрүҥ көмүс призера, 2022 с. өрөспүүбүлүкэтээҕи күрэхтэһиилэр хас да төгүллээх кыайыылаахтара Эрэл Нюргунович Тихоновтыын маастар кылаас көрдөрөн, оҕолор болҕомтолорун ылыахтарын ыллылар.

Саҥа кэрдиис кэми арыйан ситиһии сиэттиһэн, үйэлэргэ өлбөөрбөт дьоһун суолу-ииһи хаалларбыт биир дойдулаахтарбыт, кылыыга, ыстаҥаҕа, куобахха сөҕүмэр үрдүк кирбиилэрин ылаттаабыт кынаттаах кылыыһыттар: Афанасий  Саввинов, Николай Санников, Виталий Васильев туйахтарын хатаран – саҥа ситиһиилэр алмаастаах кыраайга, күөх Ньурбаҕа кэлиэхтэрэ диэн кэлэр кэнчээри ыччаппытыгар эрэлбит улахан.

Сайыына САВВИНОВА.

Ааптар түһэриилэрэ.