Иван Ярыгин-2023: Саха сириттэн кимнээх кытталларый?

Тохсунньу 26-29 күннэригэр Красноярскайга, икки төгүллээх олимпийскай чемпион Иван Ярыгин кэриэһигэр көҥүл тустууга норуоттар икки ардыларынааҕы турнир ыытыллар. Быйылгы турнир «Иван Ярыгин кубога» диэн аатынан тэриллэр.

Бу эппиэттээх күрэхтэһиигэ үчүгэй көрдөрүүлээх бөҕөстөр анал ыҥырыынан кытталлар. Ярыгин турнирыгар бэлэмнэнэн, Саха сирин сүүмэрдэммит хамаандата Алдан спортивнай базатыгар анал үөрэтэр-эрчиллэр түмсүүнү барда. Хамаанданы республика сүрүн тренерэ Александр Оконешников, тренердэр Василий Уваров, Яков Филиппов, Егор Пономарев салайан дьарыктаатылар. Эрчиллии хаамыытын научнай үлэһит Матвей Лыткин, массажист Сергей Корнилов кэтээн көрөн, тустаах үлэни ыыттылар.

Красноярскай көбүөрүгэр тахсыахтара:

57 кг: Петр Копылов, Алексей Копылов, Дьулус Федотов, Айаал Белолюбскай.

61 кг: Яков Павлов.

70 кг: Станислав Свинобоев, Константин Капрынов.

79 кг: Андриан Ленскэй.

92 кг: Ньургун Сергин, Никита Софронов.

97 кг: Максим Толмачев.

125 кг: Никита Хабаров, Андрей Аронов.

Өссө Виктор Рассадин уонна Лев Павлов ыҥырыылаахтар гынан баран, кинилэр араас биричиинэнэн Красноярскай турнирын көтүтэллэр.

Маны тэҥэ Иван Ярыгин турнирыгар кыргыттарбыт кыттыахтара. Ол туһунан аныгыскыга сырдатыахпыт.

Тэрийээччилэр иһитиннэрэллэринэн, турнирга 12 дойдуттан 330 спортсмен кыттара күүтүллэр. Ол курдук, Россияны тэҥэ – Азербайджан, Армения, Белоруссия, Узбекистан, Кыргызстан, Монголия, Молдова, Сербия, Греция, Марокко, Турция хамаандалара кыттарга бэлэмнэрин биллэрбиттэр.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *