Иван Оконешников: “Бастакы миэстэҕэ эрэ суоттанабыт”

От ыйын 4 күнүттэн Уус Алдаҥҥа – Саха сирин норуоттарын VIII спортивнай оонньуулара саҕаланаллар. Бу күннэргэ хамаандалар бүтэһик бэлэмнэниилэрэ, ситиһиилээхтик кыттарга сахалыы сиэринэн алгыс ылыылара, ыалдьааччыларын кытта көрсүһүүлэрэ буоллулар.

Ол курдук, албан аатырбыт Чурапчы улууһун спорка тэрилтэтин салайааччыта Иван Иванович Оконешников биһиэхэ маннык биллэрдэ:

Уопсай хамаанда5а 154 киһи киирдэ, спортсменнар, тренердэр уонна хамаанда бэрэстэбиитэллэрэ. Билгэлээһин туһунан эттэххэ, хайаан даҕаны бастакы эрэ миэстэҕэ суоттанабыт. Оонньууларга тиийдэхпитинэ, Мындааба спортивнай оскуолатын интернатыгар олоробут. Чурапчыга хамаанданы атаарыы бүгүн буолла.

Атаарыыга сенатор Егор Афанасьевич Борисов уонна олимпийскай чемпион Павел Павлович Пинигин сырыттылар, хамаанда ситиһиилээхтик кыттарыгар алҕаатылар, кыайыыны баҕардылар. Биллиилээх спортсменнарбытынан дуобакка аан дойду чемпионнара Матрена Ноговицына, Гаврил Колесов, көҥүл тустууга Россия чемпиона Егор Пономарев, Европа чемпионатын икки төгүллээх призера Эдуард Григорьев, уод.а. бааллар. Хамаанда хапытаана — көҥүл тустууга Россия чемпиона, норуоттар икки ардыларынааҕы кылаастаах спорт маастара Егор Пономарев. Бороҕоҥҥо от ыйын 3 күнүттэн саҕалаан бөлөхтөрүнэн барыы буолар.

Чурапчы улууһа оонньууларга иккис бөлөххө Амма, Нам, Сунтаар, Таатта, Үөһээ Бүлүү, Өлүөхүмэ, АГАТУ, студеннар спортивнай сойууустарын уонна Уус Алдан хамаандаларын кытта бииргэ күрэхтэһиэ.

Санатан эттэххэ, ааспыт оонньууларга, 2019 сыллаахха Чурапчы хамаандата бэйэтин бөлөҕөр бастакы миэстэҕэ тахсыбыта. Бу да сырыыга ол көрдөрүүтүн хатылыыр санаалаах.

Петр Павлов.      

One thought on “Иван Оконешников: “Бастакы миэстэҕэ эрэ суоттанабыт”

  • 2 июля, 2022 в 1:29 пп
    Permalink

    Уус-Алдан дьиэтигэр бастыыр буоллаха

    Ответ

Добавить комментарий

Ваш адрес email не будет опубликован.