Гиирэ спордун федерациятын президенинэн Иван Борисов талылынна

Саҥа дьыл аҕай иннинэ Намҥа гиирэ спордун федерациятын Кубога уонна отчуоттуур-быыбардыыр конференция буолан ааста. Бу күрэхтэһиигэ уопсайа 11 улуустан 107 спортсмен кытынна.

Хамаанданан бастакы миэстэни олохтоохтор лаппа баһыйталаан, кыайыылааҕынан таҕыстылар. Намнар гиирэ спордун бу кэнники сылларга ылсан сайыннара сатыы сылдьаллар. Спорт управлениетын начальнига П.Г. Иванов бэйэтэ гиирэ спордугар спорт маастара, республика элбэх төгүллээх чемпиона. Бу да  сырыыга 73 кг үөһээ ыйааһыҥҥа ветеран спортсменнар ортолоругар  тэҥнээҕин булбата.

Иккис миэстэни Үөһээ Бүлүү хамаандата ылла. Үөһээ бүлүүлэр бу кэнники икки сылга бириистээх миэстэҕэ киирбэт буола сылдьыбыттара, онон бу  сырыыга ох курдук оҥостон кэлбиттэр.

Үһүс миэстэҕэ сэрэйиллибитин курдук, Дьокуускай куорат хамаандата таҕыста.

Маны таһынан Гиирэ спордун Федерациятын отчуоттуур-быыбардыыр конференцията буолла. Улуустар делегаттара, федерация үлэтин үчүгэй диэн сыана биэрдилэр. Саамай күүтүүлээх түгэн, Федерация президенин талыы буолла. Манна бары биир киһи курдук, республика төрүт спорт национальнай көрүҥнэрин киинин дириэктэрин 1-кы солбуйааччы Иван Иванович Борисов талылынна. Президени солбуйааччылар: Василий Тарасович Курнев, Алроса ветераннарын председателэ уонна Павел Гаврильевич Иванов Нам улууһун Спорт управлениетын начальнига буоллулар.

Толорооччу дириэктэр уонна республика сүүмэрдэммит хамаандатын кылаабынай тренеринэн Василий Николаевич Дьячковскай буолла.

Конференция кыттыылаахтара бары, федерация саҥа талыллыбыт састаабыгар тахсыылаах үлэни баҕардылар уонна гиирэ спордун федерацията күүһүрбүтүн бэлиэтээтилэр.

“Дьулурҕан”.