Эдуард Григорьев – Циолковскай турнирын кыайыылааҕа

Польша киин куоратыгар Варшаваҕа, көҥүл тустууга Вацлав Циолковскай аатынан үгэс быһыытынан ыытыллар норуоттар икки ардыларынааҕы турнир бастакы күнэ түмүктэннэ. Үөрүүлээҕэ диэн, бу дойдуттан кыттар биһиги уолбут Эдуард Григорьев түһүлгэ кыайыылааҕынан буолла.

Кини тустубут 65 кг ыйааһыныгар барыта 14 бөҕөс баара. Эдуард маҥнай Нурланбике диэн Кытай бөҕөһүн 6:5 ахсаанынан хоппута. Иккис эргииргэ аан дойду экс-чемпиона Бека Ломтадзены (Грузия) 7:0, эдэрдэргэ аан дойду чемпиона Эрик Арушаняны (Украина) 2:1 ахсааннарынан итэҕэтиилээхтик кыайбыта. Оттон бүтэһик быһаарыылаах хапсыһыыга монгол Цевенсурен Цохтбадраҕы 7:0 ахсаанынан хотон, бастакы миэстэни эрэллээхтик ылла.

PS: Эдуард Григорьев хапсыһыыларын Дьулурҕан ютуб каналыгар көрүөххүтүн сөп.

Онон 65 кг түмүк маннык буолла: 1. Эдуард Григорьев (Польша), 2. Цевенсурен Цохтбадрах (Монголия), 3. Джозеф Маккена (АХШ), Эрик Арушанян (Украина).

Санатан эттэххэ, Эдуард Григорьев соторутааҕыта Бороҕоҥҥо, Саха сирин норуоттарын VIII спортивнай оонньууларыгар чемпион үрдүк аатын ылбыта.

Бу ситиһиилэринэн кинини уонна тренерэ Данил Романович Неустроевы эҕэрдэлиибит!

Петр Павлов.

Добавить комментарий

Ваш адрес email не будет опубликован.