Дуоскаларга бастыҥнарынан кимнээх буоллулар?

Саха сирин норуоттарын VIII спортивнай оонньууларын дуобакка күрэхтэһиитигэр сүүмэрдээһини ааспыт уон бастын хамаанда күөн көрүстэ. Хамаанда састаабыгар 5-тии киһи: 3 эр киһи, 2 дьахтар оонньоото. Састаап хаһааҥҥытааҕар даҕаны күүстээх буолла.

Хамаанданан түмүккэ соһуччу кэриэтэ Уус Алдан дуобатчыттара бастаатылар. Кинилэр барыта 64 очукуону хомуйдулар. Иккис миэстэҕэ Чурапчы хамаандата таҕыста, очукуота – 58. Кинилэртэн баара эрэ биир очукуонан хаалан үһүс бириистээх миэстэни Дьокуускай хамаандата ылла. Салгыы миэстэлэргэ Нам, Амма, Мэҥэ Хаҥалас, ХИФУ, Хаҥалас, Горнай, Сунтаар хамаандалара тигистилэр.

Хамаанданан түмүгү таһынан мин, биирдиилээн дуоскаларынан кимнээх үчүгэй оонньууну көрдөрбүттэрин туоһуласпыппар, күрэхтэьии старшай судьуйата, Бүтүн Россиятааҕы категориялаах судьуйа, республикатааҕы Дуобат-саахымат киинин инструктора Гаврил Петрович Винокуров маннык хоруйдаата:

-Бастакы гроссмейстерскай дуоскаҕа Гаврил Колесов иннин биэрбэтэ, тилэх үктээн Николай Стручков, Иван Токусаров, Николай Гермогенов, Андрей Федотов буоллулар.  Саамай тэҥ киирсии 2-с дуоскаҕа буолбут эбит. Манна Александр Гаврильевич Азаров оонньуур кыаҕар эдэрдэр ситэ чугаһыы иликтэрэ билиннэ. Архан Титов (ХИФУ) чугас сылдьар уонна Максим Павлов (Уус Алдан), Александр Якушев (Хаҥалас) үчүгэй көрдөрүүлэннилэр.

Үһүс дуоскаҕа Матрёна Ноговицына лидер буоларын көрдөрдө. Эдэр оонньооччу Алёна Большакова олус үрдүк көрдөрүүнү ситиһэн, биэтэккэ бииргэ таҕыста. Уонна Сайыына Попова (Дьокуускай) инники күөҥҥэ сырытта.

Төрдүс дуоскаҕа Айсен Андреев (Чурапчы), Николай Никаноров (Мэҥэ Хаҥалас), Николай Гуляев (Амма) эгил-тэгил кииристилэр. Хотторуута суох Василий Кычкин (Дьокуускай) туһааннаах очколарын хамаандатыгар биэрдэ.

Бэһис дуоскаҕа кэнники сылларга улахан күрэхтэһиилэргэ кыттыбатах Ирина Платонова-Дьячковская (Уус Алдан) бэйэтин оонньууга дьаныарын, ылыммыт опыта сүтэ илигин көрөөччүлэр сэргии, дуоһуйа көрдүлэр. 

Айыына Карпова (Амма), Наталия Шестакова (Дьокуускай), Ньургуяна Азарова (Нам) эмиэ эриэ-дэхси тэҥ очукуолаах ситиһиини ыллылар.

Оонньууларга дуоскаларынан түмүк таһаарыллыбат, ааҕыллыбат. Онон, Гаврил Петрович этэрин курдук, Ньурбаҕа буолуохтаах Саха сирин норуоттарын IX оонньууларыгар дуобакка күрэхтэһии дуоскаларынан киирэрэ буоллар, үрдүк көрдөрүүгэ талаһыы тыҥааһына өссө үрдүө, күүһүрүө этэ дии саныыбын. Итиэннэ хамаанданы таһынан, дуоскаларынан кыайыылаахтары туспа наҕараадалааһын киирэрэ буоллар.

Петр ПАВЛОВ.

Добавить комментарий

Ваш адрес email не будет опубликован.