“Дьулурҕан” чэчирии сайдарын туһугар!

Сыл саҥа түмүктэммитинэн уонна Бэчээт күнүн көрсө, ааспыт – 2022 сылы тус бэйэм туох-хайдах үлэлээн-хамсаан, суруйан-бичийэн атаарбыппын кылгастык билиһиннэриэхпин баҕардым.

Ааспыт сылга «Дьулурҕан» хаһыакка, хаһыат сайтыгар уонна ютуб каналыгар, социальнай сеттэргэ – Саха сиригэр ыытыллыбыт улахан таһымнаах республикатааҕы, Бүтүн Россиятааҕы, норуоттар икки ардыларынааҕы күрэхтэһиилэри суруйан, сырдатан, көрдөрөн кэллим. Ол курдук, Уус Алдаҥҥа ыытыллыбыт Саха сирин норуоттарын VIII спортивнай оонньууларын, мас-реслиҥҥэ аан дойду чемпионатын, Роман Дмитриев уонна Дмитрий Коркин ааттарынан көҥүл тустууга норуоттар икки ардыларынааҕы турнирдары, боксаҕа Дальнай Восток федеральнай уокуругун чемпионатын уонна республика иһигэр ыытыллыбыт араас таһымнаах күрэхтэһиилэри спорду сэҥээрэр ааҕааччыларга, көрөөччүлэргэ биллэрдим, сырдаттым.

Ылан көрдөххө, 2022 сылга сүрүннээн хаһыакка, сайтка уонна ютуб каналга даҕаны – Саха сирин норуоттарын VIII спортивнай оонньууларын бэлэмнээн уонна тэрийэн ыытыыга элбэх сурук-видео матырыйааллара хото соҕустук таһаарыллынна, бэчээттэннэ.

Аҥардас суруйуунан эрэ муҥурдаммаппын. Араас тэрээһиннэргэ кыттабын, тус бэйэм тэрийэн ыытабын. Ол курдук, балаҕан ыйыгар “Строительнай” рынокка тэриллибит “Коркинныы олоруохха. Коркинныы айыахха!” диэн республикатааҕы быыстапкаҕа төрдүс төгүлүн кыттан, бу сырыыга Дмитрий Петрович Коркин туһунан коллекциябын дьон көрүүтүгэр таһаарбытым.

Сайын Үс Хатыҥҥа ыыттыллыбыт бэчээт эйгэтин үлэһиттэрин республикатааҕы ыһыаҕар, спортивнай күрэхтэһиилэри тэрийэн ыытыыга кылаабынай судьуйа уонна секретарь быһыытынан соҕотоҕун кэриэтэ үлэлээбиппин, эмиэ бу отчуокка киэн тутта киллэрэбин.

Аны, сыллата, спорду сэҥээрээччилэргэ анаан конкурс, викторина тэрийэн ыытабын. Ол курдук, ааспыт сылга көҥүл тустууга уонна футболга аан дойду чемпионаттарыгар конкурстары тэрийэн, кыайыылаахтарга өйдөбүнньүк бириистэри туттарбыппыт. Онуоха сыаналаах бириистэри туруорбут Футбол республикатааҕы оскуолатын дириэктэрэ Николай Цыпандиҥҥа, “Медведь” булт уонна спорт таҥаһын маҕаһыынын салайааччы Михаил Тарскайга махталбын биллэрэбин уонна салгыы үлэлэһэргэ бэлэммин этэбин!

“Дьулурҕан” ситимин быспакка бэчээттэнэн тахса турарыгар бастыҥ көмөлөһөөччүлэринэн, ааптардарынан буолаллар: Степан Лыткин, Виталий Слепцов, Федот Соловьев, Дмитрий Егоров, Владислав Коротов, Петр Портнягин, Константин Стручков, Афанасий Павлов, Афанасий Илларионов, Михаил Алексеев, Роман Степанов, Гаврил Винокуров, Гаврил Стручков, Иван Уйгуров, Родион Данилов-Ородьумаан, Михаил Жирков, Зоя Пахомова, Валерий Лыткин уо.д.а. Кинилэргэ барыларыгар барҕа махтал! Үүммүт сылга эмиэ “Дьулурҕан” үлэтигэр көхтөөхтүк кыттаргытыгар ыҥырабын уонна эрэнэбин.

Санатан эттэххэ, Саха сиригэр спорт туһунан суруйар соҕотох “Дьулурҕан” хаһыат республикатааҕы “Забота-Арчы” хаһыат иһинэн сыһыарыы быһыытынан бэчээттэнэн тахсар. Онон сонуну киэҥник тарҕатар средстволар билиҥҥи күрэстэһиилээх кэмнэригэр “Дьулурҕан” бэйэтэ хаһыаттаах, сайтаах, ютуб-каналлаах – спорт туһунан сырдатар туспа Медиа-эйгэ буолла. Спорду таптааччылары, биһиги хаһыаппытыгар, ютуб-каналбытыгар суруттараргытыгар, спорт сонуннарын көтүппэккэ ааҕа-билэ сылдьаргытыгар уонна биһиги ыытар үлэбитигэр көхтөөхтүк кыттаргытыгар ыҥырабын!

Аны, суруналыыс киһи быһыытынан аҥардас хаһыат таһаарыытынан, сайт уонна ютуб үлэтинэн эрэ муҥурдаммакка, айар үлэнэн эмиэ дьарыктанабын. Ол курдук, аҥардас 2022 сылга – көҥүл тустууга олимпийскай чемпионнар тустарынан “Покорившие Олимп” диэн төрдүс кинигэбин оҥорон таһааттардым. Бу улахан үйэлээх, Саха сирэ, Россия эрэ буолбакка, киэҥ эйгэ улахан сэҥээриитин ылар кинигэ тахсыытыгар күүс-көмө буолбуттара: Харбалаахтааҕы чох хостуур тэрилтэ салайааччыта Прокопий Дмитриевич Рахлеев, Ил Түмэн депутата Иван Иванович Данилов, Дьокуускай куорат физическэй культураҕа уонна спорка управлениетын начальнигынан үлэлээбит Константин Семенович Бурцев, Саха Республикатын физическэй культураҕа уонна спорка министрэ Леонид Николаевич Спиридонов, “Өрөгөй” Спорка бэлэмнэнии киинин дириэктэрэ Михаил Дмитриевич Пахомов, IRON спортивнай таҥас маҕаһыынын салайааччыта Макар Николаевич Зырянов. Бу ааттаммыт ытыктыыр дьоммор барыларыгар үйэ-саас тухары махталлаахпын! Кинилэр үтүөлэрин умнубаппын!

Ити курдук, ааспыт сылга биир улахан ситиһиибинэн, төрөөбүт дойдубар ыытыллыбыт Саха сирин норуоттарын спортивнай оонньууларын көрсө “Уус Алдан спорда кэм кэрдииһигэр” уонна “Майаҕатта Бэрт Хара удьуордара” диэн улахан таһымнаах кинигэлэр күн сирин көрүүлэригэр хомуйан оҥорооччу уонна редактор быһыытынан үлэлэспиппинэн итиэннэ бу кинигэлэр соторутааҕыта республикатааҕы конкурска үрдүктүк сыаналаммыттарынан, бэйэм кыттыгастаах киһи быһыытынан киэн туттабын!

Үүммүт сылга эмиэ былаан элбэх. Быйылгы сырдатыы сүрүннээн Саха сиригэр физическэй культура хамсааһына тэриллибитэ 100 сылыгар ананыаҕа. Итиэннэ 2023 сыл – тус бэйэм бэчээт эйгэтигэр үлэлээбитим 40-с сыла. Онон кыалыннаҕына, айар үлэбэр сыһыаннаан күһүөрү анал тэрээһин оҥоруохпун баҕарабын. Чэ, ити курдук, олох салҕанар, үлэ тэтимэ намтаабат…

Ытаабат оҕону эмсэхтээбэттэр! Бэйэни киэн тутта туох хайдах үлэлии-хамсыы сылдьарбын туһааннаах тэрилтэлэр салайааччылара болҕомтоҕо ылыахтара, сөптөөхтүк сыаналыахтара, күүс-көмө, өйөбүл буолуохтара диэн, дэлби саараҥнаан баран, кэтэмэҕэйдээбит санаабын ыллым да биир тыынынан сырылатан кэбистим. “Дьулурҕан” чэчирии сайдарын туһугар!

Петр ПАВЛОВ, Россия Суруналыыстарын сойууһун чилиэнэ, “Дьулурҕан” хаһыат редактора, Саха Республикатын Бэчээккэ туйгуна, Уус Алдан улууһун уонна Мүрү нэһилиэгин бочуоттаах гражданина.

Добавить комментарий

Ваш адрес email не будет опубликован. Обязательные поля помечены *