«Дьулурҕан» бастыҥнара

Сылбыт түмүктэнэн эрэр. Онон олохсуйбут үгэс быһыытынан биһиги, ааһан эрэр сыл бастыҥ спортсменнарын быһаарабыт. “Дьулурҕан” талыыта борустуой! Ким үрдүк көрдөрүүлээх – ол бастыҥ! Биллэн турар, маннык түгэҥҥэ спорт олимпийскай көрүҥэ үрдүктүк тутуллар.  

Ылан көрдөххө, Украинаҕа анал байыаннай операциянан сибээстээн биһиги спортсменнарбыт аан дойдутааҕы улахан таһымнаах күрэхтэһиилэргэ сатаан кыттыбатылар. Дьиҥэ, тустууктар Арыйаан Тютрин, Виктор Рассадин, боксер Василий Егоров уо.д.а. спортсменнар быйыл үчүгэй спортивнай таһымнарыгар сылдьар этилэр. Онон кинилэр кыахтарын толору аһан көрдөрбөтөхтөрө, тус бэйэлэриттэн эрэ тутулуктаах буолбатаҕа хомолтолоох.

Ол да буоллар, ханнык да балаһыанньаҕа, маннык түгэҥҥэ биһиги олохтоммут үгэстэн туораабакка, бастыҥнары ааттыахтаахпыт. Онон “Дьулурҕан” 2022 сыллааҕы бастыҥ спортсменнарынан буоллулар:

Владимир Егоров – көҥүл тустууга Европа чемпиона.

Василий Егоров – боксаҕа Россия чемпиона.

Эдуард Григорьев – көҥүл тустууга Европа чемпионатын призера.

Павел Черноградскай – мас-реслиҥҥэ аан дойду чемпиона.

Наталья Леонтьева – чэпчэки атлетикаҕа Россия спартакиадатын призера.

Петр Васильев – профессиональнай боксаҕа үс киирсии кыайыылааҕа.

Карина Ефимова – дзюдоҕа Россия чемпиона.

Михаил Иванов – кикбоксиҥҥа Россия чемпиона.

Николай Стручков – дуобакка Россия чемпиона.

Алексей Уваровскай – Дыгын оонньуутун муҥутуур кыайыылааҕа.

Ити курдук, спортсменнарбыт төһө да хааччахтаах кэмҥэ сырытталлар, куһаҕана суох көрдөрүүлэри ситистилэр. Өссө мас-реслиҥҥэ аан дойду чемпионнара Дмитрий Попову, Дмитрий Саввины, Семен Ануфриевы, Алматытааҕы марафон кыайыылааҕа Сардаана Трофимованы, көҥүл тустууга Ярыгин турнирын, Поддубнай лигатын кыайыылааҕа Виктор Рассадины, көҥүл тустууга Д.Колов уонна Д.Коркин турнирдарын кыайыылааҕа Арыйаан Тютрины, бэтэрээннэргэ Россия чемпиона Прокопий Петрову, чэпчэки атлетикаҕа Саха сирин норуоттарын спортивнай оонньууларын кыайыылааҕа Артур Бурцевы, уо.д.а. ааттаталыахха сөп.

“Дьулурҕан”.

 

4 комментария для “«Дьулурҕан» бастыҥнара

Добавить комментарий

Ваш адрес email не будет опубликован. Обязательные поля помечены *