Чөл олоҕу көҕүлээччилэрбитин эҕэрдэлиибит!

Ахсынньы 22 күнүгэр Дьокуускайдааҕы, олимпийскай чемпион Р.М. Дмитриев аатынан Олимпийскай эрэл училищетыгар, Саха Өрөспүүбүлүкэтин спорка уонна физическэй культураҕа министерствота тэрийиитинэн, маассабай спорду сайыннарыыга «төгүрүк остуол» ыытылынна.

Биһиги нэһилиэктэн ыҥырыы быһыытынан, биэс киһи киирэн кыттыыны ылла. Нэһилиэкпит баһылыга Троев И.И. “Человек идущий” күрэхтэһии 2-с Лөгөй нэһилиэгэр хайдах үлэлээбитин, туох ситиһиигэ кэлбитин туһунан дакылаат оҥордо.

Үлэни «төгүрүк остуол» кыттыылаахтара олус сэргээтилэр, элбэх ыйытыы киирдэ. Ону таһынан, өрөспүүбүлүкэбит араас улуустарын нэһилиэктэрин, спорт тэрилтэлэрин бу тиэмэҕэ дакылааттарын иһиттибит.

Салгыы, бары билэрбит курдук, биһиги нэһилиэк “Спорт – олох нуормата” федеральнай бырайыак чэрчитинэн республикабытыгар ыытыллыбыт “Чөл туруктаах нэһилиэк” пилотнай бырайыагар 2021 сыл муус устар ыйыттан кыттабыт. Ол курдук, бу бырайыакка кыттыбыт нэһилиэктэргэ куонкурус ыытыллыбыта. Куонкурус түмүгүнэн, нэһилиэкпит уһун үйэлэнии инструктора Троева Раиса Николаевна 2-с миэстэ, спорт инструктор Копырин Николай Владимирович 1-кы миэстэни ылары ситистилэр.

Үрдүк ситиһиинэн, энтузиаст үлэһит дьоммутун эҕэрдэлиибит! Үлэҕитигэр үрдүк ситиһиини, чөл буолууну баҕарабыт! Спордунан дьарыктанааччы ахсаана элбии турдун!

Альбина ДЕГТЯРЕВА, 2-с Лөгөй нэһилиэгин баһылыгын солбуйааччы.

Уус Алдан.