Бэчээт дьонугар күндү бэлэх

Саҥа дьыл бырааһынньыга кырдьык, киһиэхэ сааһыттан тутулуга суох алыптаах эбит. Ол курдук, үүммүт саҥа 2022 сыл иккис күнүгэр соһуччу бэлэх туттум! Арай, биһигини, суруналыыстары, бэчээт үлэһиттэрин уһун сылларга салайбыт ытыктыыр киһибит Филипп Петрович Пестряков, син биир Тымныы оҕонньор курдук, соһуччу дьиэбэр тиийэн кэлэн, этэргэ дылы, типографияттан бу аҕай бэчээттэнэн тахсыбыт, кырааскатын сыта дыргыйа сылдьар кинигэтин бэлэхтээтэ. Онтукайбыт биир эрэ буолбатах, икки кинигэ! Дьэ, соһуччу үөрүү буолла.

Бастакыта “Баары баарынан”, иккиһэ “Дьоһун кылаатын киллэрбитэ” диэн, Ф.П. Пестряков олоҕун, үлэтин, санааларын сааһылаан тус-туспа түһүмэхтэргэ арааран таһаартарбыт. Чэ, мин ону барытын манна суруйа сатыыр санаам суох. Ыллаххытына, бэйэҕит көрүөххүт, сыаналыаххыт.

Тута бааччы кинигэни арыйталаан көрө-истэ оҕустум уонна хаартыскаларга биир идэлээхтэрим сэбэрэлэрин көрөн сүрдээҕин астынным. Хайдах эрэ, төһө даҕаны үһүс сылбытын дьиэттэн олорон үлэлээбиппит үрдүнэн, илэ көрсүбүт курдук сананным. Ол быыһыгар олохтон туораабыт ытыктыыр дьоммун көрөн сүөм түстүм. Кэриэстээн, урукку алтыспыт кэмнэрбин эргитэ санаан ыллым. Филипп Петрович спорка сыстаҕас киһи буоларынан, бу кинигэҕэ бэйэм ахтыыбын бэчээттэппиппинэн киэн тутта сананным.

Маннык, бэчээт үлэтин, суруналыыстар тустарынан кинигэлэр сэдэхтэр ээ. Биһиги, нууччалыы эттэххэ “сапожники без сапог” буоллахпыт. Онон Филипп Петрович кинигэтэ күндү. Чопчу кэмҥэ өрөспүүбүлүкэ бэчээтин историята диэххэ сөп. Ааптар бу үлэтин Саха Өрөспүүбүлүкэтэ тэриллибитэ, сахалыы тыллаах судаарыстыбаннай хаһыат күн сирин көрбүтэ 100 сылларыгар анаабыт. Аны туран, бу кинигэ – тохсунньу 13 күнүгэр, оруобуна Россия Бэчээтин күнүн иннинэ тахсыбыт буолан, биһиэхэ ордук чугас, бэчээт үлэһиттэригэр үчүгэй бэлэх буолла.

Түгэнинэн туһанан, Саха сирин иһитиннэрэр-биллэрэр эйгэтин салаатыгар уһуннук үлэлээбит СӨ култууратын үтүөлээх үлэһитэ, СӨ бэчээтин туйгуна Филипп Петрович Пестрякову бу дьоһун үлэтэ күн сирин көрбүтүнэн уонна Бэчээт күнүнэн ис сүрэхтэн итиитик-истиҥник эҕэрдэлиибин! Баҕарабын кытаанах доруобуйаны, дьиэ кэргэнигэр нус-хас олоҕу! Өссө да маннык үлэлэри айан таһаара тураргар, сүбэ-ама буоларгар…

Петр ПАВЛОВ.

   

Добавить комментарий

Ваш адрес email не будет опубликован.