Аркадий Алексеев: “Үлэбин сыаналаабыттарыгар махтал!”

ХХ үйэ бастыҥ чэпчэки атлета, дьон-сэргэ тапталын, сүгрүйүүтүн ылбыт биллиилээх ырыаһыт уонна мелодист Аркадий Алексеев – улуу тренер Дмитрий Петрович Коркин аатынан Саха Республикатын физическэй култуураҕа уонна спорка эйгэтин 2022 сыллааҕы государственнай бириэмийэтин лауреатынан ааттанна.

Бу үрдүк билиниини, сыанабылы Аркадий Михайловичка, ааһан эрэр сыл физическэй култуураҕа уонна спорка бастыҥнарын чиэстиир-бочуоттуур, наҕараадалыыр “Чемпионнар баалларыгар” туттардылар.

Биһиги Аркадий Михайлович Алексеевтан, тэрээһин кэмигэр тута, бэйэтин санаатын үллэстэригэр көрдөстүбүт.

-Бастатан туран, 85 сааспын туолбут сылбар үлэбин үрдүктүк сыаналаабыттарыгар Саха Республикатын правительствотыгар уонна спорт министиэристибэтигэр улахан барҕа махтал!

Кэлэр, 2023 сылы Ил Дархаммыт Айсен Сергеевич Николаев “Үлэ сылынан” биллэрдэ. Спортсменнар, Саха сиригэр физическэй культура уонна спорт сайдыбыта 100 сыллаах бырааһынньыктаахпыт. Ол, сылы быһа барара буолуо диэн сабаҕалыыбын. Ким баҕалаах спордунан дьарыктанара наада. Ол гынан баран, науканы хайаан да онно сыһыарыахха, тутуһуохха. Биһиги спорка наукабыт суоҕа арыый да атахтыыр дии саныыбын. Билигин тугу баҕарар наука сайыннарар. Онон билии-көрүү дириҥээн атын үйэҕэ кэллибит. Биһиги спортивнай саалата суох, аҥардас оскуола көрүдүөрүгэр дьарыктаммыппыт. Ол гынан баран, маассабас баар этэ. Онон саха дьоно спордунан, физическэй култууранан көхтөөхтүк, күргүөмнээхтик дьарыктаналларыгар баҕарабын. Хамсаныы-имсэнии хайаан да наада. Билигин компьютер үйэтэ буолан, оҕолорбут хайдах эрэ дьиэҕэ олорор, телевизортан арахпат буолан хааллылар. Оттон киһи дьиҥинэ хамсаныахтаах буоллаҕа дии. Ол иһин илиилээх, атахтаах. Киһи этэ сайдыахтаах. Оччоҕуна сүрэҕин, быарын, бары органнаргар хаан эргиирэ күүһүрдэҕинэ, киһи этэҥҥэ сылдьыахтаах диэн санаалаахпын.

Бэйэм специалист буоларым быһыытынан эттэхпинэ итинник, баҕа санаа баһаам. Этиэх айылаах эмиэ баар. Көҥүл тустуубутугар, саамай национальнай көрүҥмүтүгэр улахан түһүүлэр бааллар. Ону сайыннарарга туспа кэпсэтиилэр барыахтарын баҕарабын. Арыый хайысханы уларытан, төһөтүн да иһин, тустуу – биһиги, сахалар саамай биһириир спорпут көрүҥэ буоллаҕа дии. Хайдах эрэ аҥардастыы хапсаҕайга барыы буолла. Онон көҥүл тустуубут сайдарыгар баҕарабын. Норуот киэн туттуута, хааммытыгар, өйбүтүгэр-санаабытыгар тустуу иҥэн хаалбыт. Онон тустууга үчүгэйдик ылсан үлэлэһиэххэ.

Саҥа дьылынан, саха норуотугар барыгытыгар үтүө доруобуйаны, үрдүк ситиһиилэри, аламай маҥан күн куруутун эһиэхэ сырдык мичээри кытта үтүө сүрэхтэри аҕала турдун диэн алгыс тылбын тиэрдэбин. Бары бииргэ буолуоҕуҥ!

Петр ПАВЛОВ.           

 

Добавить комментарий

Ваш адрес email не будет опубликован. Обязательные поля помечены *