Аммаҕа оҕолорго бастакы экологическай сүүрүү буолла

Ольга Иванова-Сидоркевич аатынан оҕо айар, сайдар киинин иһинэн үлэлиир «Амма кэскилэ» оҕо уопсастыбаннай тэрилтэ «AMGARUN» бырайыага Ил Дархан Гранын кыайыылааҕа буолан, И.А. Швердин аатынан култуура уонна сынньалаҥ пааркатыгар кырааскалаах сүүрүү тэрилиннэ.
«Амма кэскилэ» оҕо уопсастыбаннай тэрилтэ «AMGARUN» бырайыагынан ыытыллыбыт улахан тэрээһинигэр эҕэрдэ тылы Амма улууһун баһылыгын социальнай боппуруостарга солбуйааччы Саргылана Борисова, Н.С. Захаров-Сахаачча аатынан оҕо спортивнай оскуолатын дириэктэрин солбуйааччы Дмитрий Наумов, үөрэх салалтатын салайааччытын солбуйааччы Анна Кутургуина уонна бырайыак ааптардара Зоя Пахомова, Надежда Филиппова эттилэр.

Саха сирин биллэр бөҕөһө Айаал Лазарев сүүрүү иннинэ бэлэмнэнии дьарыгы ыытта. Манна барыта 150 оҕо кытынна. Кыайыылаахтарынан Виталий Наумов, Аман Килбясов, Виталий Слепцов, Максим Николаев, Миша Яковлев, Павел-Харысхан Алексеев, Артём Алексеев, Владимир Колосов, Саша Платонов, Алёша Гаврильев ааттаннылар.

Маны таһынан оҕолор айылҕа харыстабылыгар сыһыаннаах ыйытыыларга хоруйдаатылар, «Добрые крышечки» диэн ааттаах аахсыйа тэриллэн, уопсайа 1058 пластиковай хаппахтары туттардылар. Хаппаҕы туттарыыга Юлиана Григорьева, Саша Алексеева, Ярослав Кузнецов, викторинаҕа Сулустаан Шишигин, Айураана Попова, Айтал Васильев бастыҥнарынан буоллулар. Түмүккэ кыайыылаахтары наҕараадалаатылар уонна бары кыраасканан ысыһан үөрэ-көтө оонньоотулар.
Тэрээһиҥҥэ талааннаах ырыаһыттарбыт Ванс Иванов, Косиор Карманов уонна Милена Борисова кэлэн кыттыыны ыллылар, ырыаларын бэлэхтээтилэр.


Зоя Пахомова, «Амма кэскилэ» оҕо уопсастыбаннай тэрилтэ салайааччыта:
Быйылгы үөрэх дьылыгар биһиги Ил Дархан Гранын кыайыылаахтара буолбуппут. Бастакынан кырааскалаах эко-сүүрүү «AMGARUN» тэрийдибит. Бу оҕолору айылҕа харыстабылыгар көҕүлүүр уонна оҕо спордун өйүүр сыаллаах тэрээһин буолар. Бырайыак 4 түһүмэхтээх, онтон сүүрүү саамай киэҥ хабааннаах уонна маассабай. Ону таһынан «Добрые крышечки» аахсыйаҕа кыттыһаммыт бүгүн хаппах хомуйдубут, ону оҥорон таһаарааччыларга анаан ыытыахпыт. Бу тэрээһиммитигэр Амма улууһун лааҕырдара олус көхтөөхтүк кытыннылар. Кыайыылаахтар утуйар мөһөөччүк, үрүксээк, хомуллар олоппос курдук бириистэри туттулар. Биһиэхэ 20 волонтер, 10 судьуйа көмөлөстүлэр. Биир дойдулаахпыт Айаал Лазарев кэлэн дьарыгы ыытан оҕолор үөрдүлэр-көттүлэр.

Айаал Лазарев, икки төгүллээх Олимпиада кыттыылааҕа, аан дойду Кубогын призера, Азия чөмпүйүөнэ, аан дойдутааҕы кылаастаах спорт маастара:
Маннык тэрээһин буолара наада. Тоҕо диэтэххэ, спорт хаһан баҕарар оҕоҕо, улахан дьоҥҥо туһата улахан. Спорт доруобуйаттан саҕалаан, тас көрүҥҥэ, өйгө-санааҕа, майгыга-сигилигэ, дьулуурдаах, тулуурдаах, чөл олохтоох
буоларга олус элбэҕи биэрэр, үөрэтэр. Онон маннык түмсүүлэргэ төһөнөн элбэх оҕо кыттар, уопут ылар да, соччонон үчүгэй. Хаппахтары хомуйбуттара оҕо аймаҕы иитэр улахан суолталаах, туһалаах. Биһиги айылҕабытын харыстыахтаахпыт уонна биһиги харыстаабатахпытына ким харыстыай?!
Артем ЯКОВЛЕВ, Л.В. Киренскэй аатынан Амматааҕы лицей 9-с кылааһын үөрэнээччитэ.

 

Добавить комментарий

Ваш адрес email не будет опубликован.