Нур-Султан: Санааларбар сөбүлэһэҕит дуо?

Нур-Султаҥҥа (Казахстан) буолан ааспыт көҥүл тустууга аан дойду чемпионатын ырытыыны салгыыбыт. Ааспыт суруйууларга бэйэбит уолаттарбыт хайдах кыттыбыттарын, олимпийскай путевкалары кимнээх ылбыттарын, сүүмэрдиир күрэхтэһиилэр хаһан, ханна буолуохтаахтарын сайтпытыгар сырдатан турабыт.

Чемпионат түмүгүн ырытан көрдөххө, Россия хамаандата биэс кыһыл көмүс, биир үрүҥ көмүс уонна үс боруонса мэтээли ылла итиэннэ түмүккэ эрэллээхтик бастаата.

Ити курдук, мэтээл ахсаанынан ыллахха, АХШ хамаандата икки кыһыл көмүс, икки боруонса, оттон Грузия икки кыһыл көмүс, биир боруонса, көбүөр хаһаайыттара казахтар икки үрүҥ көмүс уонна биир боруонса мэтээллээхтэр. Иран биир чемпионнаах, икки боруонса призердаах. Индия биир иккистээх, икки үһүстээх. Турция уонна Азербайджан иккилии иккис эрэ миэстэлээхтэр.

Манна, дьиэлээхтэр олох табыллан туһуннулар диэххэ сөп. Кырдьык, сэрэбиэйгэ, ыйааһыннарынан сеткаҕа аттаран туруорууга казахтар сири аннынан сүрдээҕин үлэлэстилэр. Ол иһин, уолаттара арыый сымнаҕас бөлөххө түбэһэн итиччэ мэтээли уонна олимпийскай путевканы ыллылар. Арай, чемпионат атын дойдуга ыытыллыбыта эбитэ буоллар, казахтар итинник көрдөрүүлэниэхтэрэ суоҕа этэ дии саныыбын. Оттон эһиги?

Американецтар төһө да хамаанданан үһүс буоллаллар, көрдөрүүлэрэ сэмэй диэххэ сөп. Дьиҥэ, кинилэртэн арыый үчүгэй тустууну кэтэспитим. Фикс, Графф, Ретерфорд, Грин, Дауни, Гвиаздовскай мөлтөхтүк туһуннулар.

Күүстээхтэринэн биллэр Япония, Куба хамаандалара биир да мэтээлгэ тиксибэтэхтэрэ соһуччу буолла. Дьиҥэ, аан дойду чемпионнара буола сылдьыбыт Юки Такахаши уонна Такуто Отогуро бэйэлэрин таһымнарыттан мөлтөхтүк туһуннулар. Олимпиада хаһаайыттара диэтэххэ, нэһиилэ икки путевканы ыллылар: Отогуро уонна 74 кг Окуи бэһис миэстэ буолан тураннар. Хаалбыт ыйааһыннартан 57 киилэҕэ ылыахтарын сөп, атыттарга – саарбах. Оттон эһиги туох дии саныыгыт?

Кубинецтар быстар мөлтөхтүк кытыннылар. Дьиҥэ Бонне, Вальдес, Торребланко мэтээл иһин киирсиэхтэрин сөп этэ. Биллэр бөҕөстөр Рейнери Ортега (57 кг), Франклин Марен (70 кг) уонна Рейнери Салас (97 кг) тоҕо эрэ тустубатылар. Уопсайынан, Куба бөҕөстөрө сааһырдылар. Билиҥҥитэ эдэр солбук баара биллибэт.

Оттон болгардар мөлтөөбүттэрэ ыраатта. Күүстээх бөҕөстөрө Георгий Вангелов уонна Владимир Дубов араас биричиинэнэн кыттыбатылар. Урут хаһан эрэ, ааспыт үйэ 60-с, 70-с, 80-с сылларыгар оннооҕор аатырбыт ССРС хамаандатын Олимпиада турнирыгар, Европа чемпионатыгар иккис миэстэҕэ үтүрүйэр хамаандаттан Нур-Султаҥҥа сыччах түөрт эрэ бөҕөс (!) кытынна. Бастыҥ специалистара Симеон Штерев уонна Радослав Великов быйылгыттан Россия дьахталларга хамаандатыгар тренеринэн үлэлииллэр.

Чемпионат түмүгүнэн аҕыс күүстээх хамаандаларынан буоллулар: Россия, Казахстан, АХШ, Иран, Грузия, Индия, Азербайджан, Узбекистан. Итинэн бу хамаандалар эһиил аан дойду Кубогар кыттар быраабы ыллылар.

Уопсайынан, чемпионат соһуччу түмүктэрдээх буолла. Биһиги эрэ бөҕөстөрбүт буолбакка, атын да хамаандаларга биирдиилээн күүстээхтэр үчүгэй тустар таһымнарыгар киирбэтэхтэрэ көһүннэ. Ол оннугар урукку өттүгэр соччо-бачча биллибэт бөҕөстөр: индус Рави Кумар, швейцарец Стефан Райхмут, македонец Магомедгаджи Нуров, узбек Хасанбой Рахимов соһуччу күөрэйэн тахсан боруонса мэтээл хаһаайыннарынан буолбуттарын тэҥэ, бэйэлэрин хамаандаларыгар олимпийскай путевка аҕаллылар.

Рахимов диэбиккэ дылы, чемпионаты судьуйалааһын араастаах буолла диэххэ сөп. Ол курдук, тус бэйэм төһө да чемпионакка тиийэн илэ көрбөтөрбүн Алиев-Рашидов, Ниязбеков-Бажранг, Рахимов-Денг хапсыһыыларыгар сыыһа, эбэтэр эрдэттэн куомуннаһан баран судьуйалааһын буолла дии саныыбын.

Чэ, кылгастык ити курдук. Оттон эһиги мин санааларбын туох дии саныыгытый?

Петр ПАВЛОВ.                                  

Добавить комментарий

Ваш адрес email не будет опубликован. Обязательные поля помечены *

18 − 6 =