Сахааччаҕа анаан ахтыы киэһэтэ тэрилиннэ

Номоххо киирбит, саха дьоно-сэргэтэ сүрдээҕин таптыыр, сүгүрүйэр бөҕөһө Николай Семенович Захаров – Сахаачча төрөөбүтэ 75 сылыгар сөп түбэһиннэрэн, Дьокуускайга, Чурапчыга уонна Аммаҕа анаан мустан, били телемост курдук, сибээс аныгы сайдыылаах ньыматын туһанан, быһа тахсыынан ахтыы киэһэтэ ыытылынна.

Ахтыы киэһэни аммалар сүрүннээтилэр. Куоракка мустубут дьон бөлөҕүттэн – Саха сирин суолун бочуоттаах үлэьитэ, Амма улууһун бочуоттаах гражданина Василий Алексеевич Пахомов, олимпийскай призёр, спорт үтүөлээх маастара Александр Николаевич Иванов, СР Спорка Албан аат музейын салайааччыта Михаил Егорович Друзьянов, Саха сирин үтүөлээх тренерэ Василий Петрович Уваров, биллиилээх суруналыыс, «Оо, Сахаачча, Сахаачча» кинигэ ааптара Иван Петрович Ушницкай:

Ити курдук Чурапчыттан – көҥүл тустууга спорт маастара, биир кэмҥэ тустубут доҕоро Семен Семенович Морфунов, спорт бэтэрээннэрэ Герасим Степанович Платонов, Виктор Семенович Дьяконов, онтон Амматтан – Сахаачча бииргэ төрөөбүттэрэ Иван Семенович, Семен Семенович, Анна Семеновна, спорт маастара Никон Иванович Брызгаев, Д.П. Коркин аатынан музей дириэктэрэ Егор Васильевич Пудов, бииргэ үөрэммит доҕоро Василий Петрович Кузьмин, кыраайы үөрэтээччи, Сахаачча аатын үйэтитээччи Михаил Васильевич Алексеев бары бэрт истиҥник үөрэнээччи Коля Захаров, тустуук Сахаачча туһунан иэйиилээх ахтыылары оҥордулар, бэйэлэрин санааларын үллэһиннилэр.

Аны ахсынньы 23 күнүгэр Аммаҕа, Николай Захаров – Сахаачча кэриэһигэр көҥүл тустууга үгэскэ кубулуйбут эдэрдэр республикатааҕы күрэхтэһиилэрэ ыытыллар.

Санатан эттэххэ, Советскай Союз чемпионатын, Ыччаттар уонна студеннар аан дойдутааҕы фестивалларын, «аан дойду аччыгый чемпионатынан» ааттаммыт Тбилиситээҕи норуоттар икки ардыларынааҕы турнир үрүҥ көмүс призердара, ССРС спордун маастара Николай Семенович Захаров – Сахаачча төрөөбүтэ 75 сылын бэлэтээһин өссө ахсынньы 14 күнүттэн «Саха» национальнай көрдөрөр-иһитиннэрэр хампаанньатын телевизорынан «Тайм-аут» биэриититтэн саҕаламмыта, салгыы – Амма оскуолаларыгар Сахааччаҕа аналлаах кылаас чаастара, ахсынньы 20 күнүгэр – төрөөбүт күнүгэр пааматынньыгар сибэккитин ууруу, киниэхэ анаммыт музейы көрүү, «Сахаачча ааҕыылара» научнай-практическай конференция, биллиилээх бөҕөстөр Виктор Рассадин уонна Владимир Егоров эдэр бөҕөстөргө анаан маастар-кылаастара буоллулар.

Аны күрэхтэһиини таһынан өссө Аммаҕа, Сахаачча тренерэ – ССРС, РСФСР, Саха АССР үтүөлээх тренерэ Д.П. Коркин 95 сылынан, «Коркин. Андаҕар» спектаклы туруоруу тэриллиэҕэ.

Ити курдук, саха норуота, эдэр сааһыгар олохтон туораабыт бэйэтин талааннаах ыччатын аатын хаһан даҕаны умнубат. Кини олоҕун кэрэ бэлиэ түгэнин кэриэстэбил быһыытынан сиэрдээхтик бэлиэтиир.

Петр Павлов.