Айсен Молуков: “Балаҕан ыйа миэхэ бааттаах буолла”

Нур-Султаҥҥа ыытыллыбыт көҥүл тустууга аан дойду чемпионатыгар анаан “Дьулурҕан” үгэс быһыытынан куонкурус тэрийдэ. Куонкуруска республика араас муннугуттан барыта 63 киһи бэйэтин хоруйун ыытта. Сорудахпыт борустуой, икки ыйытыыттан турбута: Ыйааһыннарынан кимнээх чемпионнуохтарай уонна Россия хамаандатыттан кимнээх иккис, үһүс миэстэни ылыахтарай диэн.

Биһиги куонкуруспут бэйэтэ ис тутуллаах. Ол быһыытынан, куонкурус түмүктэммитин кэнниттэн кыайыылаах хаартыскатын таһааран туран, дьоҥҥо-сэргэҕэ билиһиннэрии, кинини кытта сэһэргэһии хайаан даҕаны оҥоһуллар. Онон, бүгүн куонкурус кыайыылааҕынан тахсыбыт Айсен Молуковы кытта көрсөн бирииһин туттардым уонна сэһэргэстим.

Кини “Триумф” Спорка бэлэмнэнии киинигэр инструкторынан үлэлиир эбит. Оҕо сааһа Чурапчы Одьулуунугар ааспыт. Онно, спорт маастара Дмитрий Винокуров – Чаҕаан оҕолору тустууга эрчийэрин интэриэһиргээн көрөн улааппыт. Кэлин, Чурапчытааҕы физическэй култуура уонна спорт институтугар үөрэнэ сылдьан мас тардыһыынан дьарыктаммыт. Спорт бу көрүҥэр маастарга кандидат эбит. 2014 сыллааҕы Саха сирин мас тардыһыыга чемпионатын 74 киилэҕэ призера.

-“Триумфка” спортивнай-култуурунай тэрээһиннэри ыытыыны бэлэмнээһиҥҥэ үлэлиибин, – диир Айсен Молуков. – Отделбыт начаалынньыга көҥүл тустууга ССРС спордун маастара Михаил Васильевич Ноговицын. Кыра эрдэхпиттэн тустууну интэриэһиргии улааппытым. Манна, Дьокуускайга буолар күрэхтэһиилэри көтүппэппин. Онон тустуу сонуннарын көрө-билэ сылдьабын. Ватсаапка “Чыпчаал” тустууну таптааччылар бөлөхтөрүгэр баарбын. Оҕо сылдьан син тустуу кинигэлэрин мунньар, күрэхтэһиилэр түмүк көрдөрүүлэрин сурунар этим. Оттон билигин сонуну барытын ватсааптан билэбин. Кэргэннээхпин, икки оҕолоохпут. Кэргэним мас тардыһыыга спорт маастара, аан дойду чемпионатын иккис призера, Манчаары спартакиадатын икки төгүллээх кыайыылааҕа Светлана Артахинова.

Бу иннинэ “Дьулурҕан” куонкурсугар хаста да кыттыбытым. Уопсайынан, балаҕан ыйа миэхэ бааттаах буолла. Биир өрөбүлгэ дьиэ кэргэнинэн чааһынай тэрилтэттэн велосипед уларсан хатааһылабыппытыгар, купон биэрбиттэрэ, онтукалара лотореялаах этэ. Онно портативнай зарядник сүүйдүбүт. Урут хаһан даҕаны сүүйбэт этибит.

Оттон куонкуруска хоруйдарбын үчүгэйдик толкуйдаан, ырытан баран ыыппытым. Онуоха бииргэ үлэлиир табаарыһым, тустууга уонна хапсаҕайга спорт маастара Игнат Андросовтыын бииргэ ырытыспыппыт уонна бэйэ-бэйэбитигэр маарыннаспат эппиэттэри ыыта сатаабыппыт. Чуолаан, 70 киилэҕэ Давид Баев бастыыр диэн миэхэ Игнат сүбэлээбитэ.

Тустууну сэҥээрээччилэргэ анаан маннык куонкурус тэриллэрэ үчүгэй бөҕө буоллаҕа дии. Тэрийээччилэргэ улахан махтал! Күннэтэ, куонкурус хаамыытын, кимнээх бастаан иһэллэрин биллэрэ олорбуттара интэриэһинэй этэ. Миигин кытта Александр Посельскай уонна Андрей Александров тэҥ очукуону хомуйан баран, куонкурус балаһыанньатыгар олоҕуран хоттордулар. Кинилэргэ эмиэ махтанабын! Кыайыылаах чиэһинэйдик быһаарылынна дии саныыбын. Өссө маннык куонкурустар ыытылла туралларыгар уонна онно элбэх киһи кыттарыгар баҕарабын.     

Кыайыылаахха “Покорившие Олимп” диэн, көҥүл тустууга билиҥҥи кэмҥэ диэри баар бары олимпийскай чемпионнар киллэриллибит сэдэх кинигэтэ ааптартан илии баттааһыннаах туттарылынна. Бу бириис – Саха Республикатын сүүмэрдэммит хамаандаларын спортивнай бэлэмнэниилэрин киинин дириэктэрин бастакы солбуйааччы Михаил Дмитриевич Пахомов көмөтүнэн, өйөбүлүнэн булуллан туруорулунна. Онон Михаил Дмитриевичка махтал!

Түмүктээн эттэххэ, кыайыылаах Айсен Молукову өссө төгүл эҕэрдэлиибин! Итиэннэ кининэн сирэйдээн “Чыпчаал” тустууну таптааччылар бөлөхтөрүн эмиэ эҕэрдэлиибин. Бу, эмиэ кинилэр кыайыылара дии саныыбын.

Куонкуруска кыттыбыт дьоҥҥо барыларыгар барҕа Махтал! Өрүү даҕаны сүрүннээн тустууну сырдатар биһиги сайтпытын (http://dzulurgan.ru) көрө, ааҕа сылдьаргытыгар, кини ыытар үлэтигэр көхтөөхтүк кыттаргытыгар баҕарабын.

Петр ПАВЛОВ.

Ааптар хаартыскаҕа түһэриилэрэ.

 

Добавить комментарий

Ваш адрес email не будет опубликован. Обязательные поля помечены *

восемнадцать − десять =