Токио-2020: Россияннар наҕараада ахсаанынан билиҥҥитэ үһүс көрдөрүүлээхтэр

Япония киин куоратыгар XXXII сайыҥҥы Олимпийскай оонньуулар финалларын сэттис күнэ түмүктэннэ. Россия хамаандата бу күн – 2 кыһыл көмүс, 3 үрүҥ көмүс, 1 боруонса мэтээли ылары ситистэ. Хамаандаҕа мэтээллэри кимнээх аҕаллылар?

Биһиги сайтпытыгар россияннар Олимпиадаҕа хайдах кыттан иһэллэрин биирдии күнүнэн билиһиннэриибитин салгыыбыт.

От ыйын 30 күнүгэр бастакы мэтээли дьахталларга академическай эрдиигэ биирдиилээн бастыыр иһин күрэхтэһиигэ Анна Пракатень аҕалла. Кини иккис миэстэни ылан, үрүҥ көмүс мэтээлинэн наҕараадаланна.

Дьэ, ол кэнниттэн, били бу иннинээҕи суруйууга кыһыл көмүспүт кэмчи диирбитин истибиттии, олимпиецтарбыт төлө биэрдилэр. Маҥнай эр дьоҥҥо 200 миэтэрэҕэ көхсүнэн сытан харбааһыҥҥа Евгений Рылов Америка ааттааҕа Райан Мерфины баһыйа тутан, өссө олимпийскай рекорду олохтоон туран, кылбар кыайыыны ситистэ.

Чочумча буолаат, аны пневматическай бэстилиэтинэн 25 м ытыыга, бу оонньууларга Россия хамаандатыгар бастакы кыайыыны аҕалбыт Виталина Бацарашкина чаҕылхай көрдөрүүнү ситистэ. Манна сыһыары тутан эттэххэ, Евгений Рылов уонна Виталина Бацарашкина – Токиотааҕы Олимпиада икки төгүллээх чемпионнарынан буоллулар. Маны тэҥэ кинилэр өссө биирдии үрүҥ көмүстээхтэрин санатар тоҕоостоох.

Онтон оҕунан ытыыга дьахталларга Елена Осипова уонна шпажистар хамаандалара (Сергей Бида, Никита Глазков, Павел Сухов, Сергей Ходос) иккис миэстэни ыллылар.

Дзюдоист Тамерлан Башаев (+100 кг) боруонса мэтээл хаһаайынынан буолла.

Ким төһө мэтээллэннэ?

(От ыйын 30 күнүн туругунан)

  1. Кытай – 19+10+11 = 40
  2. Япония – 17+4+7 = 28
  3. АХШ – 14+16+11 = 41
  4. Россия – 10+14+10 = 34
  5. Австралия – 9+2+11 = 22
  6. Англия – 6+9+9 = 24
  7. Корея – 5+4+6 = 15
  8. Голландия – 3+7+5 = 15
  9. Франция – 3+5+5 = 13
  10. Германия – 3+4+9 = 16.

Онон Россия хамаандата билиҥҥи туругунан – 10 кыһыл көмүс, 14 үрүҥ көмүс, 10 боруонса, барыта 34 мэтээллээх, син биир төрдүс миэстэҕэ сылдьар. Оттон наҕараада ахсаанынан үһүс көрдөрүүлээх диэххэ сөп.

«Дьулурҕан».  

Хаартыскаҕа: ытыыга икки төгүллээх олимпийскай чемпион Виталина Бацарашкина.

Добавить комментарий

Ваш адрес email не будет опубликован. Обязательные поля помечены *

6 − 5 =