Токио-2020: Саатар биир финалга кыайбыттара буоллар…

Япония киин куоратыгар XXXII сайыҥҥы Олимпийскай оонньуулар финалларын бэһис күнэ түмүктэннэ. Россия хамаандата бу күн 3 үрүҥ көмүс, 2 боруонса мэтээли ылары ситистэ. Хомойуох иһин, кыһыл көмүс мэтээл мэлигир буолла.

«Дьулурҕан» хаһыат сайтыгар http://dzulurgan.ru Олимпиадаҕа Россия хамаандата хайдах кыттан иһэрин күннээҕинэн билиһиннэриини салгыыбыт. Ол курдук, бу күн биһиги олимпиецтарбытыттан бастакы мэтээли харбааһыҥҥа эр дьоммут (Иван Гирев, Михаил Довгалюк, Мартин Малютин, Евгений Рылов) 4х200 м эстафетаҕа иккис бастыҥ бириэмэни көрдөрөн аҕаллылар.

Дзюдоистка Мадина Таймазова (70 кг) үһүс бириистээх миэстэ иһин киирсиигэ Хорватия кыыһын хотон, боруонса мэтээл хаһаайкатынан буолла.

Спортивнай гимнастикаҕа эр дьоҥҥо биирдиилээн бастыыр иһин күрэхтэөиигэ Никита Нагорнай үһүс миэстэни кытаахтаан ылла.

Оттон 3х3 баскетболга Россия дьахталларга уонна эр дьоҥҥо хамаандалара барыллааһын күрэхтэһиигэ кыайыыны ситиһэн, финалга таҕыстылар. Ол эрээри, быһаарыылаах киирсиилэргэ дьахталлар – АХШ, эр дьон – Латвия хамаандаларыгар кыһыылаахтык хотторон кэбистилэр. Саатар биир финалга кыайбыттара эбитэ буоллар диэн санаа кыламнаан ааста…

Ким төһө мэтээллэннэ?

(От ыйын 28 күнүнээҕи туругунан)

Япония – 13+4+5 = 22

Кытай – 12+6+9 = 27

АХШ – 11+11+9 = 31

Россия – 7+10+6 = 23

Австралия – 6+1+9 = 16

Англия – 5+6+5 = 16

Корея – 4+2+5 = 11

Германия – 3+2+5 = 10

Франция – 3+2+3 = 8

Голландия – 2+6+3 = 11.

Онон бу күҥҥэ диэри Россия Олимпийскай комитетын хамаандата – 7 кыһыл көмүс, 10 үрүҥ көмүс, 6 боруонса мэтээллээх. Барыллааһын ааҕыыга билиҥҥитэ син биир төрдүс миэстэҕэ сылдьар. Оттон, Олимпиада бэһис күнэ эһиэхэ туох санааны үөскэттэ?

Аны сарсыҥҥы, от ыйын 29 күнүнээҕи күрэхтэһиилэри эрэнэ кэтэһэбит.

«Дьулурҕан».

Хаартыскаҕа: харбааһын эстафетатыгар иккис миэстэлээх Россия эр дьоҥҥо хамаандата.

Добавить комментарий

Ваш адрес email не будет опубликован. Обязательные поля помечены *

12 + 4 =