Такахаши – Хигучи 4:2

Дьэ, Хигучи – Такахаши тустуулара буолан ааста. Бүгүн, Токио Аджиномото спортивнай киинигэр, спортивнай тустуу федерациятын быһаарыытынан, 57 кг ыйааһыҥҥа олимпиец аатын ким ыларын быһаарар хапсыһыы тэрилиннэ уонна Ютуб каналынан көрдөрүлүннэ.

Түмүккэ Такахаши 4:2 ахсаанынан хотто. Дьиҥэ, тыҥааһыннаах, сытыы хапсыһыыны көрөрбүт буолуо дии санаабытым. Хапсыһыыны былаһын тухары Юки баһылаан, хонтуруоллаан ыытта диэххэ сөп.

Хигучи араастаан киирэ сатаата да, биир эрэ түгэҥҥэ атахтааһына табыллан, 2 бааллы сурунна. Салгыы, тоҕо эрэ партерга үлэлии сатаабата. Уопсайынан, кэнники кэмҥэ били Рио-2016 көрбүт Хигучибыт ханан да суох. Ханнаный сытыы, эрчимнээх хамсаныылара, кимээһиннээх киириилэрэ? Бэл, көрөрдүүн-истэрдиин уларыйбыт. Сэрэйдэххэ, кини бу киирсиигэ элбэх ыйааһыны түһэринэн, кыаҕын былдьаппыт дии саныыбын.

Бу киирсиигэ эрдэттэн, «Такахаши кыайара буолуо, ол эрээри, Хигучига ыалдьабын» диэн эппитим. Тоҕо диэтэххэ, кини Олимпиадаҕа киирдэҕинэ, билиҥҥи аан дойду бу ыйааһыҥҥа бастыҥнарын кытта Такахашитааҕар ситиһиилээхтик кыттыа дии санаабытым. Ханныгын да иһин, ураты тустар ньымалаах, Олимпиада финалыгар тиийэ тустубут үөрүйэхтээх бөҕөс. Ол эрээри, ол санаа туолбата, 57 киилэҕэ дьоппуоннартан Юки Такахаши олимпиец аатын ылла. Кини даҕаны күүстээх тустуук, киһи мээнэ ахсаантан бырахпат бөҕөһө.

Санатан эттэххэ, Токиотааҕы Олимпиадаҕа Япония көҥүл тустууга хамаандата маннык састаабынан кыттыаҕа: 57 кг – Юки Такахаши, 65 кг – Такуто Отогуро, 74 кг – Кэйсукэ Отогуро, 86 кг – Сосукэ Такатани.

Петр ПАВЛОВ.   

Добавить комментарий

Ваш адрес email не будет опубликован. Обязательные поля помечены *

четырнадцать − четыре =