Александр Азаров: “Дуобатчыттарбыт, Россия чемпионатыгар үчүгэйдик кытыннылар”

Сочига, сүүс харахтаах дуобакка Россия чемпионата ыытыллан түмүктэннэ. Онно классикаҕа дьахталларга Алена Большакова бастаата. Айгуль Идрисова (Башкортостан) иккис, Тунаара Федорова үһүс, Матрена Ноговицына төрдүс буоллулар.

Санатан эттэххэ, бу иннинэ блицкэ Аяника Колодезникова уонна Николай Гуляев бастаабыттара. Матрена Ноговицына блицкэ иккис, рапидка үһүс буолбута. Ону тэҥэ эр дьоҥҥо хамаандабыт үһүс миэстэҕэ таҕыста.

Онон, дуобатчыттарбыт Россия чемпионатыгар ситиһиилээхтик кытыннылар.

Хамаанда кыттыытын туһунан Саха сирин дуобакка кылаабынай тренерэ, гроссмейстер Александр Азаров биһиги сайтпытыгар анаан санаатын маннык үллэһиннэ:

Алена Большакова, Тунаара Федорова дойду чемпионатыгар классическай программаҕа үрдүк ситиһиилэринэн эҕэрдэлиибит! Биһиги бу түгэҥҥэ Башкортостан дуобатчыттарын иннилэригэр түстүбүт. Бу, сүүс харахтаах дуобакка биһиги эдэр тренердэрбит сөптөөх үлэни ыытан, ити ситиһиилэр кэллилэр. Онон мин тренердэрбэр олус махтанабын! Билигин дуобат тренердэрэ бары ситиһиилээхтик, дьаныардаахтык бу ыарыы эҥин диэбэккэ, оҕолорун олус ситиһиилээхтик эрчийэ  сылдьаллар. Уонна бу Россия чемпионатыгар бары биир сомоҕо буолан, ситиһиилээхтик кытыннылар.

Бу чемпионакка аан дойду чемпиона Тамара Тансыккужина классическай программаҕа кыттыбата, блицкэ уонна түргэн эрэ программаларга кытынна, ол да буоллар, оччо үчүгэй көрдөрүүнү ситиспэтэ. Биһиги кыргыттарбыт син биир кини иннигэр сырыттылар. Ити холобура, Аяника Колодезникова, Матрена Ноговицына, уонна эр дьоҥҥо Николай Гуляев блицкэ бастаабыта эмиэ улахан ситиһии.

Бу дойду чемпионатыгар эр дьоҥҥо билиҥҥи кэмҥэ Россияҕа күүстээхтэр бары кытыннылар. Ол эрээри, Санкт-Петербургтан Иван Трофимов бастаабыта соһуччу буолла. Ону элбэхтик үөрэтэн көрүөххэ наада. Тоҕо диэтэххэ, бу дуобатчыт кэнники кэмҥэ олус дьаныардаахтык, сөптөөхтүк дьарыктанан, куруутун бириистээх миэстэттэн түспэт оонньооччу. Ол оннугар Александр Шварцман, Александр Георгиев, Алексей Чижов уо.д.а. күүстээх гроссмейстердар ситиһиилэригэр ити биһиги уолаттарбыт Гермогенов, Гуляев үчүгэйдик кытыннылар. Бүтэһик туурга Николай Гуляев –  Александр Шварцмаҥҥа хоттордо гынан баран, кини кыайар эрэ түгэнигэр миэстэҕэ киириэн сөп этэ. Онон уол рискуйдаата диэххэ сөп.

Бу ый 27 күнүттэн – от ыйын 15-гэр диэри Таллиҥҥа (Эстония) сүүс харахтаах дуобакка аан дойду чемпионата ыытыллар. Онно билигин сүүс бырыһыан кыттар быраабы Матрена Ноговицына ылла. Кини бүгүн Москваҕа, Эстония посольствотыгар визатын оҥотторо кэллэ. Эр дьоҥҥо бу ый 11 күнүгэр ФМЖД биллэриэхтээх, манна Николай Гермогенов, былырыыҥҥы аан дойду призера (түргэн программаҕа) эмиэ киириэх курдук. Онон кэтэһэбит.

Бары дуобатчыттары, кинилэр тренердэрин – Сахабыт сиригэр элбэх мэтээли аҕалбыттарынан итиитик-истиҥник эҕэрдэлиибит!

Петр ПАВЛОВ.        

Добавить комментарий

Ваш адрес email не будет опубликован. Обязательные поля помечены *

1 × три =