Бастакы күн түмүктэннэ. Биһиги бөҕөстөрбүт – сарсын…

Япония Нагоя куоратыгар Азия сайыҥҥы ХХ оонньууларыгар бүгүҥҥүттэн көҥүл тустууга күрэхтэһии саҕаланна. Ол курдук, бастакы күн үс ыйааһыҥҥа кыайыылаахтар уонна иккис-үһүс миэстэлээхтэр быһаарылыннылар.

Кэлиҥҥи сылларга Азия континенын тустууктара сүрдээҕин күүһүрдүлэр. Аан дойду улахан таһымнаах күрэхтэһиилэригэр өрүү ситиһиилээхтик кытталлар. Ол да иһин, бу күрэхтэһиини киһи барыта кыраҕытык кэтээн көрдө.

Ыйааһын ахсын күүстээх, биллиилээх бөҕөстөр күөн көрүстүлэр. Көһүтүллүбэтэх көрдөрүүлэр, соһуччу түмүктэр да баар буоллулар. Ол курдук, бүгүҥҥү күрэхтэһиигэ олимпийскай чемпион Котаро Кийока (65 кг) табыллыбата диэххэ сөп. Кини бу күрэхтэһиигэ анаан-минээн оҥостон туран кытынна. Икки бастакы утарсааччыларын кыайталаан баран, финалга тахсар иһин киирсиигэ кэлиҥҥи кэмҥэ хотторуу хомолтотун билэ илик, күн-түүн күүһүрэн иһэр индиец Суджит Калкалга 3:3 ахсаанынан хотторуулааҕынан ааҕылынна.

Кийока төһө да үһүс бириистээх миэстэни ылбытын үрдүнэн, наҕараадалааһыҥҥа көрдөххө, бэйэтин көрдөрүүтүттэн астымматах көрүҥнээх. Оннук да буолуо, киһи барыта киниттэн кыһыл көмүс мэтээли кэтэспитэ.

Ити курдук, киһи эрэ барыта эрэнэ кэтэспит бөҕөһө Шамиль Шарипов (125 кг) финалга тахсыыга китаеһы эрэллээхтик хотон иһэн, наһаа үлүһүйэн, соһуччу бэйэтэ ыраастык баран хаалла. Бу хотторуу — бүгүҥҥү күн биир соһуччу түмүгүнэн буолла.

Бастакы күн түмүгэ:

65 кг: 1. Суджит Калкал (Индия), 2. Абдулмажид Кудиев (Таджикистан), 3. Котаро Кийока (Япония), Начын Куулар (Казахстан).

86 кг: 1. Мохаммад Ноходи (Иран), 2. Хаято Ишигуро (Япония), 3. Малик Шаваев (Кыргызстан), Сулдхуу Олонбаяр (Монголия).

125 кг: 1. Амин Заре (Иран), 2. Бухердун (Кытай), 3. Шамиль Шарипов (Бахрейн), Едиге Касымбек (Казахстан).

Биирдиилээн сытыы хапсыһыылар комментарийдаах видеоларын “Дьулурҕан” хаһыат телеграмҥа каналыгар t.me/dzulurgan киирэн көрүөххүтүн сөп.

Сарсын, алтынньы 3 күнүгэр сарсыарда 10:30 чаастан көҥүл тустууга күрэхтэһии иккис күнэ саҕаланар. Тустуу — 57, 74, 97 кг ыйааһыннарга буолуоҕа. Онуоха Таджикистан аатын көмүскүүр биһиги бөҕөстөрбүт Айаал Белолюбскай (57 кг) уонна Виктор Рассадин (74 кг) тусталлар. Санатан эттэххэ, сэрэбиэй түмүгүнэн Белолюбскай – иранец Моменины, Рассадин – Аслуевы (Бахрейн) кытта киирсиэхтэрэ.

Хапсыһыылары UWW TV анал сайтка, эбэтэр  “IRON спорт тула кэпсэтии” (ыытааччы Макар Зырянов) ВКонтакте таһаарыытыгар уонна телеграмҥа каналыгар көрүөххүтүн сөп.

Петр ПАВЛОВ.