Азия Олимпиадатыттан икки мэтээл

Азия дойдуларын XX спортивнай оонньууларын көҥүл тустууга иккис күнүгэр – 57, 74 уонна 97 кг ыйааһыннаахтар күөн көрүстүлэр. Өртөн күүппүт биһиги бөҕөстөрбүт көбүөргэ дьэ таҕыстылар.

57 кг Айаал Белолюбскай бастаан иранец Али Моменины 4:1 кыайан, күрэхтэһиини үчүгэйдик саҕалаабыта. Онтон кореец Кимы 6:2 ахсаанынан бэркэ кыайан баран, финалга тахсар иһин киирсиигэ Олимпиада-2024 боруонса призёра индиец Аман Сехраватка дьоһун утарсыыны оҥорон, 8:12 хотторон кэбистэ.

Салгыы, оонньуу боруонса мэтээлин ким ыларын быһаарар хапсыһыыга кини олохтоохтор эрэллэрэ – дьоппуон Ямата Огаваны кытта көрүстэ. Манна сүрдээх тыҥааһыннаахтык барбыт хапсыһыыга 1:1 ахсаанынан кыайыыны Айаал Белолюбскай ситистэ.

Бу кини, аан дойду таһымыгар бастакы улахан ситиһиитэ. Мантан инньэ Айаал дьэ бэйэтин күүһүгэр, кыаҕыгар эрэлэ улаатан, күүһүрэн – ситиһиилээхтик тустарыгар, туруоруммут сыалын-соругун ситиһэригэр баҕарабыт.

57 кг: 1. Аман Сехрават (Индия), 2. Хан (КНДР), 3. Айаал Белолюбскай (Таджикистан), Зоу Вэньхэ (Кытай), 5. Ямата Огава (Япония), Бекзат Уулу (Кыргызстан).

Бу түһүлгэҕэ иккис бөҕөспүт Виктор Рассадин (74 кг) бастакы утарсааччытын – Бахрейнтан кыттар дагестанец Магомедрасул Аслуевы 3:2 ахсаанынан кыайбыта. Онтон сэрэбиэй быһыытынан аан дойду былырыыҥҥы 70 киилэҕэ чемпиона Йошиносуке Аоягилыын (Япония) киирсиитигэр, тустуу саҕаланыыта атаҕыттан ылларан баран, тута «кириэс» диэн ыарыылаах албаска түбэһэн, хаста эмэ кэбирэхтик, утарсыыта суох эргиттэрэн, очукуонан ыраастык хотторон кэбистэ.

PS: Уолаттарбыт тустууларын видеотын көрүөххүтүн баҕарар буоллаххытына – олор барыта “Дьулурҕан” хаһыат телеграмҥа каналыгар t.me/dzulurgan бааллар.

Бу күрэхтэһиигэ Аояги утарсааччыларын киһилээбэтэ, барыларын кэриэтэ ити албаска киллэрэн, кэбэҕэс уонна түргэн кыайыылары ситиһэн, эрдэттэн сэрэйиллибитин курдук финалга таҕыста. Ол иһин, Рассадин “санааны уоскутар” бөлөххө киирэн, Индонезия уолун 10:0 ахсаанынан холкутук хотто.

Оттон үһүс бириистээх миэстэ иһин киирсиигэ, Азия чемпионатын призёра Орозобек Токтомамбетовтыын (Кыргызстан) туһунна. Итиэннэ 4:3 ахсаанынан хотон, син эмиэ Айаал Белолюбскай курдук, икки күнү быһа кэтээн көрбүт, ыалдьыбыт Саха сирин олохтоохторун сүрдээҕин үөртүлэр.

74 кг: 1. Юнес Эмами (Иран), 2. Йошиносуке Аяоги (Япония), 3. Виктор Рассадин (Таджикистан), Нуркожа Кайпанов (Казахстан), 5. Орозобек Токтамамбетов (Кыргызстан).

Онон бөҕөстөрбүт син эмиэ тустууктар Леонид Спиридонов, Айаал Лазарев курдук, Азия континенын Олимпиадатыттан икки мэтээли ылары ситистилэр. Манан кинилэр Саха сиригэр көҥүл тустуу сайдыбыта 70 уонна саха олимпиецтара Монреаллааҕы Олимпиадаҕа өрөгөйдөрүн 50 сыллаах үбүлүөйдээх сылларыгар бэйэлэрин ситиһиилэринэн бэлэх оҥордулар диэххэ сөп.

Түгэнинэн туһанан, Айаал Белолюбскайы, Виктор Рассадины уонна кинилэр тренердэрэ Б.Г. Яковлевы, А.К. Константиновы, И.П. Белолюбскайы, бүтүн Саха сирин олохтоохторун эҕэрдэлиибит! Тустуута суох – саха суох, сахата суох – тустуу суох!

Петр ПАВЛОВ.