«Урожай» үбүлүөйүн чэрчитинэн…

Саха Өрөспүүбүлүкэтин Ил Дархана Айсен Сергеевич Николаев, бу дьыл атырдьах ыйын 3 күнүгэр, тыа сиринээҕи көҥүл спортивнай хамсааһын 75 сыллаах үбүлүөйүн үөрүүлээхтик бэлиэтиир туһунан 542 №-дээх анал дьаһала тахсыбыта.  

Ол быһыытынан, өрөспүүбүлүкэҕэ үбүлүөйдээх дьаһаллары тэрийэн ыытарга сорук турар. Ону бэлэмнээн уонна тэрийэн ыытарга СӨ Бырабыыталыстыбатын бэрэссэдээтэлэ Сергей Местников салайааччылаах анал хамыыһыйа тэриллибитэ.

Дьэ, бу дьаһалга олоҕуран «Коркинныы олоруохха! Коркинныы айыахха!» өрөспүүбүлүкэтээҕи VIII быыстапкаҕа бүгүн, «Урожай» спортивнай уопсастыба 75 сыллаах үбүлүөйүнэн сибээстээн «төгүрүк остуол» тэрилиннэ.

Тэрээһини өрөспүүбүлүкэтээҕи анал хамыыһыйа чилиэнэ, «Чолбон» спорт оскуолатын дириэктэрин солбуйааччы Юрий Петрович Баишев салайан ыытта.

Киирии тылыгар кини, бастатан туран, улуу тренер Д.П. Коркин аатынан бэртээхэй быыстапка тэриллибитин этэн туран, салайааччы Татьяна Афанасьевна Гоголеваҕа уонна быыстапка чэрчитинэн бүгүҥҥү тэрээһин ыытыллыытын көҕүлээбит Дмитрий Афанасьевич Егоровка махталын биллэрдэ.

Салгыы Юрий Петрович, өрөспүүбүлүкэҕэ «Колхозник» («Урожай») спортивнай уопсастыба 75 сыллаах үбүлүөйүн бэлиэтииргэ Ил Дархан дьаһала тахсыбытын, анал хамыыһыйа тэриллибитин, бу кэмҥэ улуустарга үөрүүлээх дьаһаллар ыытыллалларын, сыл бүтүүтэ киин куоракка үбүлүөйдээх тэрээһин буоларын иһитиннэрдэ.

Билигин «Урожай» үбүлүөйүгэр бэлэмнэнии үлэлэр ыытылла туралларын, биллиилээх суруналыыс, элбэх кинигэ ааптара Родион Кривогорницын анаан кинигэ бэлэмнии сылдьарын эттэ.

Итиэннэ С.В. Местников этиитинэн, Тыа хаһаайыстыбатын министиэристибэтэ уонна СӨ физическэй култуураҕа, маассабай спорка управлениета кыттыһан, «Урожай» уопсастыбаны сөргүтэллэригэр кэпсэтии бара турарын санатан, мустубут дьону сэргэхситтэ.

«Төгүрүк остуол» тула кэпсэтиигэ, санаа атастаһыытыгар «Урожай» урукку салайааччылара Прокопий Прокопьевич Готовцев, Егор Егорович Неустроев, СӨ спорка бэтэрээннэрин түмсүүтүн салайааччы Гаврил Гаврильевич Сивцев, СӨ спорка түмэллэрин салайааччы Михаил Егорович Друзьянов, Олимпиада-76 призера, спорт үтүөлээх маастара Александр Николаевич Иванов, СӨ адаптивнай спорка киинин дириэктэрин солбуйааччы Анастасия Семеновна Михайлова, Саха сирин спортсменнарын сойууһун салайааччы Мария Семеновна Алексеева, спорт бэтэрээнэ Николай Данилович Кронников уо.д.а. кыттыыны ыллылар. Кинилэр урукку үлэлэрин ахтан-санаан туран, “Урожай” үбүлүөйэ үрдүк таһымнаахтык ыытылларыгар уонна бу спортивнай уопсастыба сөргүтүллэригэр, олоххо киирэригэр баҕардылар.

Маны тэҥэ «Төгүрүк остуолга» үлэтигэр спорт бэтэрээннэрэ Римма Семеновна, Александр Семенович Крыловтар (хаартыскаҕа), Алексей Васильевич Мокрощупов, Олег Софронович Осипов, уо.д.а. кыттыыны ыллылар.

Санаалар, этиилэр барыта «Коркинныы олоруохха! Коркинныы айыахха!» быыстапка архыыбыгар киллэриллэн, анаан видеоҕа, хаартыскаҕа уһуллан-түһэриллэн үйэтитиллэн, «күөх экраҥҥа» анал биэрии буолан оҥоһуллан тахсарга бэлэмнэниллэр.

Аны сарсын, балаҕан ыйын 8 күнүгэр күнүс 11:00 чаастан – сахалартан бастакы олимпийскай чемпион Роман Михайлович Дмитриев төрөөбүт дойдута – Эдьигээн улууһун анал тэрээһинэ ыытыллар. Буолар сирэ – Дьокуускай к., «Строительнай» Атыы-эргиэн киинин Быыстапкалыыр саалата, Жорницкай уул. 35 №-дээх дьиэтэ.

Барыгытын быыстапкаҕа ыҥырабыт!         

Петр ПАВЛОВ.

Дмитрий ЕГОРОВ хаартыскалара.