Спорт туоната диэх курдук…

«Коркинныы олоруохха! Коркинныы айыахха!» диэн ССРС, РСФСР, Саха АССР үтүөлээх тренерэ, Саха сирин үтүөлээх учуутала Дмитрий Петрович Коркин сырдык аатыгар – республикаҕа көҥүл тустуу сайдыбыта 70, олимпиецтарбыт Павел Пинигин, Роман Дмитриев, Александр Иванов Монреаллааҕы-76 оонньууларга өрөгөйдөрүн 50, Василий Гоголев Үтүө Дьулуур оонньууларыгар кыайбыта 40 сылларыгар аналлаах быыстапка бэһис күнүн сүрүн тэрээһинин Тоҕус томтордоох, спорт туонатынан биллибит Чурапчы улууһа үүннээн-тэһииннээн ыытта.

Ол курдук, «Олимпийскай чемпион Павел Пинигин дойдута – Чурапчы» диэн көрсүһүүнү улуус дьаһалтатын баһылыгын солбуйааччы Мария Филипповна Кронникова салайааччылаах анал бөлөх кэлэн салайан ыытта. Бөлөххө Чурапчытааҕы физическэй култуура уонна спорт институтун бочуоттаах президенэ Михаил Гуляев, улуус спорка управлениетын начаалынньыга Дьулустаан Егоров, Д.П. Коркин аатынан спортивнай интернат-оскуола дириэктэрэ Станислав Захаров, Спорка Албан аат музей дириэктэрэ Егор Пудов, Кытаанах нэһилиэгин баһылыга Егор Пономарев, уо.д.а. киирдилэр.

Манан чурапчылар, аатырбыт биир дойдулаахтара, Саха сирин ХХ үйэҕэ бастыҥ киһитинэн ааттаммыт Д.П. Коркиҥҥа бэриниилээхтэрин, кинини ытыктыылларын көрдөрдүлэр.

Көрсүһүү саҕаланыыта «Коркинныы олоруохха! Коркинныы айыахха!» быыстапка көҕүлээччитэ уонна салайааччыта, Чурапчы уонна Уус Алдан улуустарын бочуоттаах гражданина, Саха Республикатын култууратын үтүөлээх үлэһитэ Татьяна Афанасьевна Гоголеваҕа – «Чурапчы улууһун бочуоттаах бэтэрээнэ” диэн анал бэлиэ уонна дастабырыанньа үөрүүлээх быһыыга-майгыга туттарылынна.

Кэпсэтии сүрүннээн улуу тренер Дмитрий Петрович Коркин уонна олимпийскай чемпион Павел Пинигин тустарынан барда.

Чурапчы мээнэҕэ Спорт туонатынан ааттаммат, соторутааҕыта бөҕөстөрбүт Канадаҕа, XXI сайыҥҥы Олимпийскай оонньууларга ситиһиилээх кыттыыларын үөрүүлээхтик бэлиэтээһин ыытыллан, олимпиецтары чиэстээһин, анал өйдөбүнньүк сэргэ туруоруу буолбута.

Бу да сырыыга чурапчылар тэрээһиннээхтик оҥостон кэлэн, быыстапка үлэтигэр көхтөөхтүк кыттан, үрдүк таһымнаах көрсүһүүнү көҕүлээн ыыттылар.

Элбэх киһи тыл эппититтэн, Монреаллааҕы-76 Олимпиада үрүҥ көмүс призера, спорт үтүөлээх маастара Александр Николаевич Иванов, Д.П. Коркин төрөөбүтэ 100 сылын көрсө, кини оҥорбут үтүөтүн учуоттаан кэргэнэ Александра Семеновнаҕа анаан киин куоракка учаастак ылан, дьиэ тутан биэрэргэ этиитин мустубут дьон кэрэхсии иһиттэ уонна туһааннаах салайааччылар бу санааны олоххо киллэрэллэригэр баҕарда.

Көрсүһүүгэ Саха Республикатын спорка сүүмэрдэммит хамаандаларын бэлэмнэниилэрин киинин дириэктэрэ Михаил Дмитриевич Пахомов кыттыыны ылан, соторутааҕыта Чурапчыга, СР Ил Дархана Айсен Николаев кыттыылаах, 2028 сылга буолуохтаах үтүөлээх тренер Д.П. Коркин 100 сылын үөрүүлээхтик бэлиэтээһини дьүүллэһэр сүбэ мунньах түмүктэрин, туох дьаһаллар ыытыллалларын туһунан иһитиннэрдэ.

Тэрээһиҥҥэ кэлбит дьон бары, аны икки сылынан Дмитрий Петрович Коркин үбүлүөйүн үрдүк таһымнаахтык тэрийэн ыытарга баҕаларын биллэрдилэр.

Онон, быйылгы быыстапкаҕа олимпиецтарбыт Роман Михайлович Дмитриев, Александр Николаевич Иванов, Павел Павлович Пинигин төрөөбүт улуустара — Эдьигээн, Сунтаар, Чурапчы туспа тэрээһиннэри ыытан, үйэ аҥардаах үбүлүөй дьаһалларын ситэрэн биэрдилэр диэххэ сөп.

Түмүккэ Чурапчы улууһун дьаһалтата (баһылык С.А. Саргыдаев), быыстапкан тэрийэр бөлөх (салайааччы Т.А. Гоголева) – бу тэрээһиҥҥэ анаан дьиэтин-уотун туран биэрэн, усулуобуйаны тэрийбит “Строительнай” Атыы-эргиэн киинин салайааччыта, бэйэтэ көҥүл тустууга Россия спордун маастара, Ил Түмэн депутата Иван Иванович Даниловка махталларын тиэрдэллэр.

Быыстапка үлэтин салгыыр. Дьокуускай куорат олохтоохторо уонна ыалдьыттара, балаҕан ыйын 12 күнүгэр диэри, түгэни мүччү туппакка, улуу тренербит Д.П. Коркин аатынан республикатааҕы быыстапканы кэлэн көрөргүтүгэр ыҥырабыт!                   

Петр ПАВЛОВ.

Ааптар хаартыскалара.