Сэттэ күн биллибэккэ ааста, эбэтэр түмүктүүр түһүмэххэ

«Строительнай» Атыы-эргиэн киинин Быыстапкалыыр саалатыгар нэдиэлэ устата – ССРС, РСФСР, Саха АССР үтүөлээх тренерэ Дмитрий Петрович Коркин сырдык аатыгар сыһыаннаан быйылгы сыл кэрэ-бэлиэ түгэннэригэр: республикаҕа көҥүл тустуу сайдыбыта 70, аатырбыт олимпиецтарбыт Монреаллааҕы-76 оонньууларга өрөгөйдөрүн 50 уонна биллиилээх бөҕөс Василий Гоголев Үтүө Дьулуур оонньууларыгар кыайбыта 40 сылларыгар анаммыт «Коркинныы олоруохха! Коркинныы айыахха!» ахсыс быыстапка ситиһиилээхтик үлэлээтэ.

Ол курдук, Д.П. Коркин төрөөбүт күнүгэр – балаҕан ыйын 5 күнүгэр үөрүүлээхтик аһыллан баран, сэттэ күн араас таһымнаах тэрээһиннэр: Роман Михайлович Дмитриев дойдута Эдьигээн, Александр Николаевич Иванов дойдута Сунтаар, Павел Павлович Пинигин дойдута Чурапчы улуустара улахан таһымнаах көрсүһүүлэрэ тэриллэн, быыстапканы киэргэтэн биэрдилэр.

Быйылгы спорка үбүлүөйдээх сыл биир бэлиэ түгэнинэн «Урожай» спортивнай уопсастыба 75 сылынан «төгүрүк остуол» тэриллэн, спорт бэтэрээннэрин сэргэхситтэ.

Ити курдук, Саха сиригэр оҕунан ытыы спордун аҕатынан билиниллибит Павел Михайлович Стасов төрөөбүтэ 90 сылыгар анаан истиҥ көрсүһүү буолла. Маны тэҥэ спорт суруналыыстара Владислав Коротов, Петр Павлов быыстапка чэрчитинэн анал көрсүһүү тэрийдилэр.

Манна барытыгар элбэх киһи кыттыбытыттан, биһиги быыстапкабытын көрбүтүттэн — астынабыт. Ол курдук, киин куорат спорка оскуолаларын иитиллээччилэрэ, устудьуоннар, Дьокуускай олохтоохторо уонна ыалдьыттара күннэтэ ыытыллар тэрээһиннэргэ көхтөөхтүк кыттыбыттарын бэлиэтиибит.

Бу улахан таһымнаах, республика култуурунай олоҕор биир сэргэх тэрээһини хара бастакыттан Саха Республикатын култууратын үтүөлээх үлэһитэ, Чурапчы уонна Уус Алдан улуустарын бочуоттаах гражданина, “Хотугу Сулус” оҕо академиятын дириэктэрэ Татьяна Афанасьевна Гоголева салайан, үүннээн-тэһииннээн ыытар.

Тэрийэр бөлөх биир төһүү киһитинэн – Д.П. Коркин үөрэнээччитэ, СР наукатын уонна үрдүк үөрэхтээһинин бочуоттаах үлэһитэ, СР үөрэҕириитин туйгуна, общественник, суруналыыс Дмитрий Афанасьевич Егоров – Амид буолар.

Сыллата ыытыллар “Коркинныы олоруохха! Коркинныы айыахха!” быыстапкаҕа А.С. Пушкин аатынан республикатааҕы библиотека, Ем. Ярославскай аатынан Саха сирин кыраайы үөрэтэр түмэлэ, Р.М. Дмитриев аатынан Олимпийскай эрэл училищета, Чурапчытааҕы Д.П. Коркин аатынан спорка аатын түмэлэ бэйэлэрин туһааннаах анал быыстапкаларынан кыттан, тэрээһин таһымын үрдэтэн биэрэллэрэ хайҕаллаах.

Быыстапка тэрээһинигэр өрүү Саха Республикатын физическэй култуураҕа уонна спорка министиэристибэтэ (министр Л.Н. Спиридонов), СР Спорка бэлэмнэнии киинэ (дириэктэр М.Д. Пахомов), «Саха» национальнай көрдөрөр-иһитиннэрэр хампаанньа (генеральнай дириэктэр О.О. Марков) күүс-көмө, өйөбүл буолалларын санатар тоҕоостоох.

Бүгүн, балаҕан ыйын 11 күнүгэр быыстапканы үөрүүлээхтик түмүктээһин буолла. Тэрийээччи Т.А. Гоголева быыстапка ситиһиилээхтик ыытыллыбытынан кыттыбыт тэрилтэлэргэ, биирдиилээн дьоҥҥо махтанна уонна бу тэрээһин – улуу тренер Д.П. Коркин 2028 сылга төрөөбүтэ 100 сылынан тэриллэр улахан таһымнаах быыстапкаҕа бэлэмнэнии буоларын тоһоҕолоон бэлиэтээтэ.

Эрдэ иһитиннэрбиппит курдук, быйылгы ахсыс быыстапка уратытынан, олимпиецтарбыт дойдулара – улуустара киэн хабааннаах быыстапка туруоран, анал көрсүһүүлэри тэрийиилэрэ буолар.

Онно эппиэттээх үлэһиттэргэ: Д.П. Коркин аатынан Спорка Албан аат музейын эппиэттээх үлэһитэ Дмитрий Гаврильевич Решетниковка, Сунтаар улууһуттан Учууталлар учууталлара Афанасий Терентьевич Жараевка, Эдьигээн улууһун кыраайы үөрэтэр музейын сотруднига Виктория Николаевна Семеноваҕа, Чурапчытааҕы история уонна этнография түмэлин үлэһитэ Анна Николаевна Яковлеваҕа, сэдэх экспонаттаах коллекционер Юрий Иванович Щукиҥҥа, итиэннэ быыстапка туруоруутугар, илии-атах үлэтигэр күүс-көмө буолбут “Строительнай” Атыы-эргиэн киинин үлэһит уолаттарыгар — быыстапка көҕүлээччитэ Татьяна Афанасьевна Гоголева, оттон биллиилээх общественнай деятель, суруналыыс Владислав Петрович Коротовка уонна бу строкалар ааптардарыгар  — Чурапчытааҕы Д.П. Коркин аатынан Олимпийскай эрэллэри бэлэмниир спортивнай интернат-оскуола дириэктэрэ Станислав Афанасьевич Захаров СР спорка уонна физическэй култуураҕа министиэристибэтин Махтал суруктарын туттардылар.

Бэйэтин дьиэтин-уотун туран биэрэн, быыстапка үлэтэ үрдүк таһымнаахтык барарыгар усулуобуйаны тэрийбит “Строительнай” Атыы-эргиэн киинин генеральнай дириэктэрэ, Ил Түмэн депутата, спорт куттаах Иван Иванович Даниловка махтанабыт!

Быыстапка түмүктэннэ. Саха сирин ХХ үйэҕэ Бастыҥ киһитинэн билиниллибит үтүөлээх тренер Дмитрий Петрович Коркин уонна кининэн сирэйдээн биир санаалаахтарын, иитиллээччилэрин үтүө ааттарын үйэтитэр, дьоҥҥо-сэргэҕэ, ыччакка тарҕатар, иитэр-өйдөтөр, кэпсиир-ипсиир сыаллаах тэрээһин көҕүлээччилэрэ уонна кыттааччылара, быыстапка табыллыбытыттан санаалара көтөҕүллэн, аныгыскы маннык тэрээһиҥҥэ өссө күүстээхтик бэлэмнэнэн кэлэн кыттарга бөҕөх санаалаах тарҕастылар.

Петр ПАВЛОВ.

Ааптар хаартыскалара.