Олимпийскай чемпион Роман Дмитриев дойдута — Эдьигээн

Итинник ааттаах көрсүһүү «Строительнай» Атыы-эргиэн киинигэр ыытылла турар «Коркинныы олоруохха! Коркинныы айыахха!» диэн — ССРС, РСФСР, Саха АССР үтүөлээх тренерэ Дмитрий Петрович Коркин сырдык аатыгар, Саха Республикатыгар көҥүл тустуу сайдыбыта 70 сылыгар, Павел Пинигин, Роман Дмитриев, Александр Иванов Монреаллааҕы XXI сайыҥҥы Олимпийскай оонньууларга өрөгөйдөрүн 50 сылыгар анаммыт республикатааҕы таһымнаах быыстапкаҕа тэрилиннэ.

Көрсүһүү наһаа истиҥ быһыыга-майгыга ыытылынна. Сахалартан бастакы олимпийскай чемпион, ССРС спордун үтүөлээх маастара уонна үтүөлээх тренерэ Роман Михайлович Дмитриев аатыгар сүгүрүйэн уонна кэриэстээн — ис сүрэхтэн тахсар ахтыылар, санаалар этилиннилэр.

Тэрээһиҥҥэ ыраахтан-чугастан Роман Михайловиһы чугастык саныыр, ытыктыыр дьон мустан, маннык дьаһал тэриллибитигэр бастатан туран, быыстапка салайааччыта — Саха Республикатын култууратын үтүөлээх үлэһитэ Татьяна Афанасьевна Гоголеваҕа махталларын биллэрдилэр. Ону тэҥэ Эдьигээннээҕи кыраайы үөрэтэр музей (сотрудник Виктория Николаевна Семенова), Р.М. Дмитриев аатынан Олимпийскай эрэл училищетын Спорка Албан аатын музейа (салайааччы Николай Николаевич Константинов) — Р.М. Дмитриев спорка ситиһиилэрин, олоҕун кэпсиир-көрдөрөр сэдэх экспонаттары туруоран, быыстапканы киэргэтэн, сайыннаран биэрдилэр. Истиҥ көрсүһүүгэ Эдьигээн улууһун общественноһа, киин куоракка олорор биир дойдулаахтара көхтөөхтүк кытыннылар.

Владислав КОРОТОВ хаартыскаҕа түһэриилэрэ.