Никита Хабаров кыайда

Кыргызстаҥҥа Көс омуктар VI оонньуулара үгэннээн ыытылла турар. Бүгүн саха төрүт көрүҥэр – хапсаҕайга күрэхтэһии ыытылынна. Манна ыарахан ыйааһыҥҥа, ол аата 90-тан үөһэ киилэлээхтэр, барыта 27 боотур күөн көрүстэ.

Хас биирдии дойдуттан – биирдии бастыҥ бөҕөс кииристэ. Россия чиэһин биһиги Никита Хабаровпыт көмүскээтэ. Быраабыла быһыытынан, сэрэбиэй кэнниттэн хотторбут туораан иһэр гына хапсыһыылар ыытылыннылар.

Никита – Сахатын сирин түһэн биэрбэтэ. Харан маҥнайгыттан утуу-субуу азербайджанец Абдулланы, поляк Шепанягы, грузин Чихрадзены, узбек Холматовы уонна быһаарыылаах хапсыһыыга китаец Тухигены, барыларын умсарыта тардыалаан охторон, эрэллээх кыайыыны ситистэ.

Күрэхтэһии түмүгэ:

+90 кг 1. Никита Хабаров (Россия, Саха сирэ), 2. Тухиге (Кытай), 3. Сардарбек Холматов (Узбекистан) уонна Мунхбаяр Баасанжав (Монголия).

Бөҕөспүт киирсиилэрин видеотын барытын «Дьулурҕан» хаһыат телеграмҥа каналыгар t.me/dzulurgan киирэн көрүөххүтүн сөп.

Кыргызстантан быһа биэриини көрдөрөн үөрүүнү үксэппит «Саха» НКИХ салалтатыгар уонна үлэһиттэригэр, хапсыһыылары кэпсээн, быһааран биэрбит ыытааччы Максим Дмитриевкэ, биллиилээх бөҕөс Александр Руминна барҕа махтал!

Никитаны бу дьоһун кыайыытынан бары эҕэрдэлиибит!

Аны өйүүн, балаҕан ыйын 6 күнүгэр, Көс омуктар оонньууларын тустуу көрүҥнэригэр бастаабыттары барыларын түмэн, Муҥутуур кыайыылааҕы быһаарар түһүлгэлэрэ тэриллэр. Уолбут онно кыттар кыахтанна. Улаханнык саҥарбаппыт, ситиһиини баҕарабыт уонна Кыргызстантан сэмээр үчүгэй сонуннары кэтэһэбит.

Петр ПАВЛОВ.