“Маннык үтүө тэрээһиҥҥэ кыттыбыппыттан астынабын”

«Строительнай» Атыы-эргиэн киинигэр «Коркинныы олоруохха! Коркинныы айыахха!» быыстапка үгэннээн ыытылла турар. Быйылгы тэрээһин уратытынан, биһиги аатырбыт олимпиецтарбыт төрөөбүт дойдулара – Сунтаар, Эдьигээн, Чурапчы улуустара анал тосхолунан кыттыылара буолла.

Ол курдук, олимпийскай чемпион Павел Пинигин төрөөбүт улууһа – Чурапчы улахан быыстапканы аҕалан туруорда уонна анал көрсүһүүнү тэрийдэ. Онуоха биир тэрийээччинэн Анна Николаевна Яковлева буолар. Биһиги кинилиин сэһэргэстибит.

-Мин Андрей Андреевич Саввин аатынан Чурапчытааҕы история уонна этнография түмэлиттэн кэлэ сылдьабын. Быйылгы киэҥ хабааннаах, чулуу дьоммутун үйэтитэр сыаллаах-соруктаах сүрдээх үчүгэй тэрээһиҥҥэ кытта сылдьарбыттан олуһун диэн үөрэбин, астынабын.

Биһиги быыстапкабыт – Боотурускай улуус уруккутуттан-билиҥҥитигэр диэри историятын туһунан. Бу быыстапкаҕа Чурапчыбыт хайдах төрүттэммититтэн, туохтан саҕаламмытыттан саҕалаан – спорка хайысхабытыгар тиийэ барыта көрдөрүллэр, сырдатыллар. Быыстапкаҕа оскуола оҕолоро, студеннар күннэтэ күргүөмүнэн кэлэн көрдүлэр-иһиттилэр. Бу тэрээһин кинилэргэ, биһиги биллэр дьоммут олохторун, үлэлэрин-хамнастарын туһунан билэннэр-истэннэр, суолларын арыйалларыгар, бу олоххо бэйэлэрин булалларыгар көмөлөөх буолуо дии саныыбын.

Уонна бэлиэтии көрбүппүнэн, биһиги экспозициябытын үксэ Чурапчыттан төрүттээх, сыдьааннаах дьоннор кэлэн көрдүлэр-иһиттилэр. Холобур, ордук Владислав Николаевич Кривошапкин быыстапкатын сэргээтилэр. Онно биһиги үлэлии-хамныы сылдьар дьоммут Кыайыы парадыгар кыттыбыт хаартыскаларыгар билэр дьоннорун булан көрөн, сөхтүлэр-махтайдылар. Ити курдук, улуус историятын туһунан быыстапканы сыныйан көрдүлэр. Кулубалар ааттарын, төрүччүнү сэҥээрдилэр.

Бу «Коркинныы олоруохха! Коркинныы айыахха!» диэн улахан таһымнаах быыстапкаҕа маҥнайгыбын сүрэхтэнним. Наһаа үчүгэй энергетикалаах, кэрэни-сырдыгы сыдьаайар, билиини-көрүүнү тарҕатар дьону кытта алтыспыппыттан астынным. Үтүө дьоммут туһунан үчүгэйи эрэ истэ-билэ сылдьар – наһаа үчүгэй. Уонна бу быыстапкаҕа кытта сылдьар киһи биир дойдулаахтарынан киэн туттар. Холобура, аатырбыт тустууктарбыт Александр Иванову, Василий Гоголевы илэ көрөн, атах тэпсэн олорон кэпсэтэн, сүрдээх үчүгэй энергетиканан сэрээттэнним диэххэ сөп. Киһи кырдьык, нууччалыы эттэххэ, мотивацияланар, маннык тэрээһиҥҥэ сырыттым, маннык дьону көрүстүм, кинилэр холобурдарын батыһан, сайдыыга талаһыаҕым.

Биһиги Чурапчы спорка түмэлин кытта тэҥҥэ тураммыт, быыстапкабытын күн бүгүҥҥэ диэри ыыта сылдьабыт. Бэҕэһээ “Олимпийскай чемпион Павел Пинигин дойдута – Чурапчы” диэн дьоро күммүт ситиһиилээхтик ыытылынна. Дьоннор кэпсээннэриттэн, ахтыыларыттан бэйэбэр даҕаны элбэх саҥаны-сонуну биллим-көрдүм. Бу курдук, дьоллоох, чулуу дьону кытта сылдьарбыттан махтанабын.

Андрей Андреевич Саввин аатынан түмэлигэр үлэлээбитим иккис ыйым. Бу иннинэ бэйэм идэбинэн – нуучча тылын учууталынан оскуолаҕа итиэннэ Чурапчытааҕы государственнай федеральнай институкка үлэлээбитим, ол иһин спорт эйгэтигэр син тэҥҥэ салайтаран сылдьабын дэнэбин. Тэрилтэбитигэр биир сомоҕо курдук үлэлиибит. Наставниктарым миигин салайаннар, бу быыстапкаҕа бэлэмнээн туран ыыппыттара, бэйэбэр эрэнэбин, дьоммор даҕаны эрэнэбин.

—Анна Николаевна, быыстапкаҕыт, тэрээһиҥҥит иһин махтал! Кырдьык даҕаны быйылгы быыстапканы улуустар кэлэн киэргэттигит.

Дьокуускай куорат олохтоохторун уонна ыалдьыттары сарсын – балаҕан ыйын 11 күнүгэр сарсыарда 10:00 чаастан – күнүс 13:00 чааска диэри «Строительнай» Атыы-эргиэн киинигэр (Жорницкай уул. 35 №-дээх дьиэтигэр) сыллата тэриллэн ыытыллар быыстапка түмүктүүр түһүмэҕэр барыгытын ыҥырабыт.

Петр ПАВЛОВ.

Ааптар хаартыскалара.