«Коркинныы олоруохха! Коркинныы айыахха!» быыстапкаҕа ыҥырабыт

«Строительнай» Атыы-эргиэн дьиэтин Быыстапкалыыр саалатыгар сылын аайы үгэскэ кубулуйуллан тэриллэр «Коркинныы олоруохха! Коркинныы айыахха!» республикатааҕы быыстапка үлэтин саҕалыыр.

Бу киэҥ хабааннаах тэрээһин көҕүлээччитинэн уонна салайааччытынан «Хотугу сулус» оҕо телеакадемиятын дириэктэрэ, Саха Республикатын култууратын үтүөлээх үлэһитэ Татьяна Афанасьевна Гоголева буолар.

Быыстапка үөрүүлээх аһыллыыта, сыл аайы буоларын курдук, улуу тренер Дмитрий Петрович Коркин төрөөбүт күнүгэр – балаҕан ыйын 5 күнүгэр күнүс 12 чаас 30 мүн. буолуоҕа.

Быйылгы быыстапкабыт Д.П. Коркин иитиллээччилэрэ Монреаллааҕы-76 Олимпиадаҕа өрөгөйдөрүн 50, Саха сиригэр көҥүл тустуу сайдыбыта 70 уонна биллиилээх бөҕөс Василий Гоголев Үтүө Дьулуур оонньууларыгар кыайыытын 40 сылларыгар ананар.

Хаһан баҕарар буоларыныы, бу тэрээһиҥҥэ Д.П. Коркин аатынан Чурапчытааҕы спорка Албан аат музейа, Эдьигээн улууһунааҕы музей, Р.М. Дмитриев аатынан Олимпийскай эрэл училищета, олимпиецтар Павел Пинигин, Александр Иванов, спорт үтүөлээх маастара Василий Гоголев, үтүөлээх тренер Прокопий Иванов тус бэйэлэринэн, А.С. Пушкин аатынан республикатааҕы библиотека, суруналыыстар, биирдиилээн коллекционердар өрүү көхтөөхтүк кытталлар.

Быйылгы быыстапка уратытынан — Сунтаар уонна Чурапчы улуустарын дьаһалтара бэйэлэрин экспонаттарын туруоран, тэрээһин дьаһалтатыгар кыттыһыылара буолар.

Быыстапка балаҕан ыйын 11 күнүгэр диэри сарсыарда 10:00-тан киэһэ 17:00 чааска диэри үлэлиэҕэ. Анал былаан оҥоһуллан, бу кэм устата араас тэрээһиннэр, көрсүһүүлэр буолуохтара. Холобур, быыстапка үөрүүлээхтик аһыллыбытын сарсыныгар – балаҕан ыйын 6 күнүгэр күнүс 11:00 чаастан “Олимпиец Александр Иванов – Пехлеван дойдута Сунтаар” диэн тэрээһин ыытыллар.

Сылын аайы быыстапкаҕа туруоруллар экспонаттар уларытыллан, саҥардыллан иһэллэр. Бу да сырыыга дьон болҕомтотун тардар сэдэх экспонаттар аҕыйаҕа суохтар.

Барыгытын быыстапкаҕа ыҥырабыт! Аадырыспыт: Дьокуускай, Жорницкай уул. 35 №-дээх (кыһыл өҥнөөх) дьиэтэ, бастакы этээскэ – Быыстапкалыыр саала.

Тэрийэр бөлөх.