Кэрэ бэлиэ түгэннэрдээх тэрээһин

Бүгүн, улуу тренер Дмитрий Петрович Коркин төрөөбүт күнүгэр сөп түбэһиннэрэн, “Строительнай” Атыы-эргиэн киинин Быыстапкалыыр саалатыгар “Коркинныы олоруохха! Коркинныы айыахха!” диэн үгэскэ кубулуйбут республикатааҕы быыстапка үөрүүлээх аһыллыыта буолла.

Саха Республикатын культуратын үтүөлээх үлэһитэ Татьяна Афанасьевна Гоголева үүннээн-тэһииннээн хаһыс да сылын тэрийэн ыытар быыстапката быйыл уратылаах. Ол курдук, аатырбыт олимпиецтарбыт Роман Дмитриев, Павел Пинигин, Александр Иванов төрөөбүт улуустара – Эдьигээн, Чурапчы, Сунтаар улуустарын дьаһалталарын туспа тэрээһиннэрэ ыытыллыахтара.

Ол сиэринэн, бүгүн быыстапка үөрүүлээх аһыллыытыгар Сунтаар улууһун баһылыга Анатолий Васильевич Григорьев, Чурапчы улууһун депутаттарын Сэбиэтин бэрэссэдээтэлэ Яков Павлович Оконешников кыттыыны ылан, бэйэлэрин эҕэрдэлэрин тиэртилэр.

Үөрүүлээх аһыллыы биир бэлиэ түгэнинэн “Чурапчы” тыа хаһаайыстыбатын тэрилтэтэ – Үтүө Дьулуур оонньууларын кыайыылааҕа, спорт үтүөлээх маастара Василий Гоголевка биир дьааһык арыы бэлэхтээбитэ буолла. Санатан эттэххэ, бу тэрилтэ соторутааҕыта, Монреаллааҕы-76 Олимпиада дьоруойдарыгар үбүлүөйүнэн эмиэ биирдии дьааһык арыыны туттаран, үтүө холобуру көрдөрбүтэ.

Саха Республикатын физическэй култуураҕа уонна спорка министиэристибэтин тэрийэр үлэҕэ отделын салайааччыта Семен Петрович Степанов, быйылгы сыл Саха сиригэр көҥүл тустуу сайдыбыта 70 сылыгар уонна тумус туттар тустууктарбыт Павел Пинигин, Роман Дмитриев, Александр Иванов Монреаллааҕы-76 Олимпиадаҕа өрөгөйдөрүн 50 сылыгар туох үлэ ыытылларын билиһиннэрдэ.

Ол курдук, Ил Дархаммыт Айсен Николаев соторутааҕыта Чурапчыга тиийэ сылдьан Д.П. Коркин төрөөбүтэ 100 сылын улахан таһымнаахтык тэрийэн ыытарга дьаһалын бэрээдэгинэн, бэлэмнэнии үлэтин чэрчитинэн сүбэ мунньаҕы ыыппытын, сэтинньи ыйга «Өрөгөй» күрэс уораҕайыгар улуу тренер аатынан көҥүл тустууга үгэскэ кубулуйбут норуоттар икки ардыларынааҕы турнир ыытылларын санатта.

“Коркинныы олоруохха! Коркинныы айыахха!” быыстапка сыл ахсын кэҥээн, тупсан иһэрин бэлиэтииллэр. Манна сыһыары тутан эттэххэ, бу тэрээһини көҕүлээн ыытааччылар сүрүн сыаллара-соруктара – 2028 сылга Дмитрий Петрович Коркин төрөөбүтэ 100 сылыгар улахан быыстапканы тэрийии буолар. Онон инники тэрээһиннэр бары онно бэлэмнэнии чэрчитинэн бараллар.

Тыл эппит дьону тэҥэ, быыстапка тэриллиитин эҕэрдэлээн Климент Егорович Иванов, Ил Түмэн депутаттара Георгий Русланович Балакшин, Владимир Михайлович Прокопьев сурук ыыппыттарын ааҕан иһитиннэрдилэр. Олортон биир суругу ааҕааччыларга билиһиннэрэбит:

Судаарыстыбаннай сулууспа бэтэрээнэ, СӨ бочуоттаах гражданина, норуот хаһаайыстыбатын үтүөлээх үлэһитэ, Бочуот знага, Үлэ Кыһыл Знамята, Норуоттар доҕордоһууларын уордьаннарын кавалера Климент Егорович ИВАНОВ:

Ытыктабыллаах Татьяна Афанасьевна уонна быыстапка тэрийээччилэрэ!

Бүгүҥҥү улахан суолталаах тэрээһиҥҥэ мустубут дьону истиҥник эҕэрдэлиибин. Хайа даҕаны бэйэтин билинэр омук этин-хаанын сайыннарарга национальнай традициялаах буолар. Спорт көрүҥэр сахаларга хапсаҕайдаһан тустуу инники күөҥҥэ сылдьара. Күүстээх, нымса тустааччылар норуот тылынан номоҕор киирэллэрэ. Дьэ ону утумнаан  Саха сиригэр көҥүл тустуу сайдыбыта ыраатта. Маҥнайгы дьоҕурдаах тренердэр Василий Румянцев, Кирилл Григорьев, Семен Зедгенидзев, Николай Волков Россияҕа биллэр тустааччылары бэлэмнээн таһаарбыттара. Ордук ыччакка холобур буолбут тустааччылар тахсыбыттара:  Дмитрий Данилов, Петр Алексеев, Николай Гоголев, Альберт Захаров, Алкивиад Иванов, Владимир Данилов, Эдуард Гегеев, Петр Попов уо.д.а.

Дьэ онтон Дмитрий Петрович Коркин тренер быһыытынан үүнэн-сайдан тахсыбыта, оскуоланы арыйбыта, республика талааннаах ыччаттарын мунньан күүскэ, дьоҕурдаахтык эрчийбитэ. Саха сиригэр көҥүл тустууну саҥа үрдүк таһымҥа таһаарбыта. Саха уолаттара  Роман Дмитриев, Павел Пинигин, Александр Иванов Олимпиада үрдүкү мэтээллэрин ылан, Саха сирин аан дойдуга аатырдыбыттара. Көҥүл тустууга кэнники сылларга саха дьонун өрөгөйдөөх үөрүүтүн кэмчитик аҕалар буоллулар. Ол хомолтолоох. Онон бүгүҥҥү курдук тэрээһиннэри сөргүтэн, тренердэр үлэлэрин тупсаран, көҥүл тустууну салгыы сайыннарар олус наадалаах. Кырдьаҕас көлүөнэ аатыттан ситиһиилэри баҕарабын.

Ити курдук, быыстапка үөрүүлээх быһыыга-майгыга аһылынна, бастакы күн ситиһиилээхтик түмүктэннэ.

Бу тэрээһин балаҕан ыйын 12 күнүгэр диэри үлэлиэҕэ. Онон куорат олохтоохторун уонна ыалдьыттары «Строительнай» Атыы-эргиэн киинин Быыстапкалыыр саалатыгар (Жорницкай уул. 35, кыһыл өҥнөөх дьиэ) “Коркинныы олоруохха! Коркинныы айыахха!” быыстапкаҕа ыҥырабыт.

Быыстапка сорох түгэннэрин, хаартыскалары, видеолары «Дьулурҕан» телеграмҥа каналыгар t.me/dzulurgan көрөргүтүгэр.

Петр ПАВЛОВ.

Ааптар хаартыскалара.