Ини-бии Хадарцевтар түһүлгэлэригэр

Балаҕан ыйын 5-6 күннэригэр Хотугу Осетия – Алания киин куоратыгар Владикавказка албан аатырбыт бөҕөстөр, ини-бии Аслан, Махарбек Хадарцевтар ааттарынан көҥүл тустууга норуоттар икки ардыларынааҕы III күрэхтэһии ыытыллар.

Тэрийээччилэр биллэрбиттэринэн, бу түһүлгэҕэ Россия регионнарын тэҥэ – Азербайджан, Узбекистан, Индия, Монголия, Италия, Таджикистан, Македония, Беларусь, Казахстан, Болгария, Израиль, Молдова, Венгрия, Греция биирдиилээн бөҕөстөрө кыттыахтара.

Биллэн турар, ордук элбэх кыттааччыны олохтоохтор – хотугу осетиялар уонна дагестаннар туруораллар. Итиэннэ күрэхтэһии — хас ыйааһын кэриэтэ бу республикалар күөн көрсүүлэрин, илин былдьаһыыларын быһыытынан барара сэрэйиллэр.

Саха сириттэн биэс бөҕөс тустар: 57 кг – Лев Павлов, 65 кг – Виктор Яковлев, Николай Щеглов, 74 кг – Анатолий Иванов, 97 кг – Никита Софронов. Итиэннэ Хотугу Осетияттан биир дойдулаахпыт, Ньурба ыччата Алексей Антипин сайаапкаҕа баар.

Уолаттарбытыгар барыларыгар ыалдьабыт, ситиһиилээх кыттыыны баҕарабыт. Лев Павлов Россия чемпионатыгар хотторуутун боруостууругар буоллар. Күрэхтэһии сайаапкатыгар көрдөххө, 57 киилэҕэ кини сүрүн утарсааччыларынан Тунджай Вердиев, Юнус Явбатиров, Амир Чамзын буолуохтара.

Оттон 23-гэр диэри саастаахтарга аан дойду түһүлгэтигэр кытта бараары сылдьар Виктор Яковлев 65 кг ыйааһыҥҥа тустуоҕа. Киниэхэ бу күрэхтэһии – аан дойду түһүлгэтин иннинэ, хамаанда састаабыгар чиҥник киирэргэ тургуутунан буолуоҕа.

Күрэхтэһии тосхоло (Дьокуускай бириэмэтинэн)

Балаҕан ыйын 5 күнэ, субуота

17:00 Бары ыйааһыннарга барыллааһын хапсыһыылар

23:00 Финалга тахсар иһин киирсиилэр.

Балаҕан ыйын 6 күнэ, өрөбүл

17:00 Санааны уоскутар бөлөх тустуулара. Бары ыйааһыннарга үһүс миэстэ иһин тустуулар.

23:30 Күрэхтэһиини үөрүүлээхтик аһыы

00:15 Бары ыйааһыннарга быһаарыылаах хапсыһыылар.

Тустууну WrestlingTV уонна ВКонтакте https://vk.ru/sakhastream быһа биэриилэрин көрүөххүтүн сөп.

Петр ПАВЛОВ.