Дуобат тумара хонуутугар көрсүөххэ диэри

Суотту нэһилиэгэ Алексей Львов, Иван Васильев, Григорий Портнягин, Николай Пермяков, Иван Заровняев, Михаил Охлопков, Сергей Николаев, убайдыы-бырааттыы Ян, Андрей Пермяковтар курдук күүстээх дуобаччыттардааҕынан биллэр.

Мин, дуобатчыттар маннык уутуйан үөскээбит нэһилиэктэрэ чугаһынан суоҕа буолуо диибин. “Доҕордоһуу” музей коллектива биир дойдулаахпыт, нуучча дуобатыгар ССРС спордун маастарыгар кандидат Алексей Алексеевич Львов аатынан республиканскай турниры тэрийэн ыыппыта ыраатта. Бу тэрээһиммит улам-улам  кэҥээн, сайдан, күүстээх дуобаччыттары түмэр, ботуччу бириистээх, дьон кэтэһэр күрэхтэһиитэ буолбута, эдэр оонньооччулар, ыччаттар үүммүттэрэ.

Балаҕан ыйын 12 күнүгэр Суоттуга спорт энтузиаһа, улууспут хас эмэ төгүллээх чемпиона, республикаҕа биллэр дуобаччыт, саахыматчыт Сергей Константинович Николаев үбүлүөйдээх 65 сааһынан аһаҕас турнир тэриллиэҕэ. Биһиги спорду сэҥээрээччилэр, бу күрэхтэһии үрдүк таһымнаах, элбэх кыттааччылаах, хатыһыылаах буолуон баҕарабыт.

Аны бу кыһын, эмиэ биир дойдулаахпыт, күүстээх оонньооччу, ССРС спордун маастарыгар кандидат Иван Алексеевич Васильев кэриэһигэр аһаҕас турниры ыытарга былаанныыбыт. Ол туһунан кини оҕолорун кытта сүбэлэстибит, күнүн-дьылын өрүһүнэн сырыы саҕаланнаҕына диэн болдьостубут.

Онон дуобат тумара хонуутугар көрсүөххэ диэри уонна бу уонтан тахса сыллааҕыта А.А. Львов турнирын түгэннэриттэн аҕыйах  хаартысканы ыытабын!

АЙЫМ.

Уус Алдан.