Дмитрий Петрович үтүө аатыгар сүгүрүйэн…

Бүгүн, балаҕан ыйын 5 күнүгэр – ССРС, РСФСР, Саха АССР үтүөлээх тренерэ, Саха сирин үтүөлээх учуутала Дмитрий Петрович Коркин (1928 — 1984) төрөөбүт күнүгэр – кини үлэлээбит Тустууга саалатын таһыгар баар пааматынньыгын иннигэр үгэскэ кубулуйан, бэлиэ түгэн буолла.

Бэлиэ күҥҥэ Дьокуускай куорат дьаһалтатын баһылыга Дмитрий Садовников, Олимпиада-76 үрүҥ көмүс призера Александр Иванов, спорт маастара Семен Морфунов, СР физическэй култуураҕа уонна спорка министиэристибэтин эппиэттээх үлэһитэ Семен Степанов, Д.П. Коркин кыыһа Гея Дмитриевна бэйэлэрин эҕэрдэлэрин тиэртилэр, санааларын эттилэр.

Ол курдук, Александр Николаевич Иванов бэйэтин этиитигэр, Дмитрий Петрович аатын үйэтитиигэ өссө күүскэ ылсан үлэлэһэргэ, кини нэһилиэстибэтин хасыһан үөрэтэн киэҥ араҥаҕа таһаарарга ыҥырда. Ити барыта, саха тустуута инники сайдыытыгар туһалаах буоларыгар баҕарда.

Оттон Д.П. Коркин биир бастыҥ иитиллээччитэ, оҕолорго ССРС икки төгүллээх чемпиона буола сылдьыбыт спорт маастара Семен Семенович Морфунов, тренерин аатын өрүү үрдүктүк тута сылдьарга этэн баран, Дмитрий Петрович үтүөтүн-өҥөтүн учуоттаан туран, кэргэнэ Александра Семеновнаҕа дьиэ тутан биэрэргэ эттэ. Итиэннэ ол кыаллар буоллаҕына, 2028 сылга, биһиги улуу тренербит төрөөбүтэ 100 сылыгар сөп түбэһиннэрэн олоххо киллэрэллэригэр баҕарда.

Тэрээһин бэлиэ түгэнинэн, Дмитрий Петрович Коркин өйдөбүнньүк пааматынньыгар сибэкки дьөрбөтүн ууруу буолла. Ааттаммыт дьону тэҥэ бу сиэргэ-туомҥа өссө спорт үтүөлээх маастардара Василий Гоголев, Василий Стрекаловскай, Саха сирин үтүөлээх тренердэрэ Прокопий Иванов, Николай Константинов, ССРС спордун маастардара Гаврил Троев, Семен Окоемов, Василий Алексеев, Анатолий Михайлов, Сергей Никифоров, Андрей Филиппов, Дьокуускай куорат спорка управлениетын начаалынньыга Александр Бугаев, билиҥҥи туста сылдьар уолаттар: Константин Капрынов, Александр Авелов, Манчаары Ильинов уо.д.а. кыттыыны ыллылар.

Мустубут дьон Дмитрий Петрович үтүө аатын кэриэстээн, ытыктаан, билинэн – киниэхэ сүгүрүйэллэрин биллэрдилэр.

Петр ПАВЛОВ.

Ааптар хаартыскалара.