“Быыстапка кэҥээн, тупсан иһэрэ кэрэхсэбиллээх”

«Строительнай» Атыы-эргиэн киинигэр «Коркинныы олоруохха! Коркинныы айыахха!» диэн, ССРС, РСФСР, Саха АССР үтүөлээх тренерэ, Саха сирин үтүөлээх учуутала Дмитрий Петрович Коркиҥҥа сыһыаннаах республикатааҕы быыстапка тардыллан үлэлии турар.

Быйылгы быыстапка уратыта – Монреаллааҕы Олимпиадаҕа өрөгөйү ситиспит бөҕөстөрдөөх улуустар анал быыстапка туруоран, туспа тэрээһин ыытыылара буолар. Ол курдук, бастакынан Сунтаар улууһун тэрээһинэ буолла. Аны Эдьигээн, Чурапчы улуустарын кыттыылара буолуоҕа.

Манан сибээстээн биһиги, Сунтаар улууһун бочуоттаах гражданина, Учууталлар учууталлара, доруобуйаларыгар хааччахтаах спортсменнарын улуустааҕы хамаандатын тренерэ Афанасий Терентьевич Жараевтан аҕыйах ыйытыыга хоруйдууругар көрдөстүбүт.

-Афанасий Терентьевич, быыстапканы быйыл сунтаардар кэлэн киэргэттилэр диэн дьоннор сөҕөллөр-махтайаллар. Кырдьык да оннук. Эһиги хайдах бэлэмнэнэн, тэринэн бачча ыраах сиртэн кэлбиккитин, туох экспонаты, экспозицияны туруорбуккутун кылгастык билиһиннэр эрэ.

-Быйыл Монреаллааҕы Олимпиадаттан үс саха уола мэтээл аҕалбыта 50 сыла буолла. Уонна биһиги улуу тренербит Дмитрий Петрович Коркин төрөөбүтэ 98 сыла. Инньэ гынан, маннык улахан тэрээһиҥҥэ биһиги, сунтаардар анаан оҥостон кэллибит.

Бэһиэ буолан кэллибит: спорт үлэһитэ Петр Владимирович Петров, улууспут култуураҕа управлениетын начаалынньыга Саргылана Омукова, кини кэргэнэ, биллиилээх алгысчыт, С.А. Зверев аатынан түмэл методиһа Николай Омуков, култуура үлэһитэ Николай Баянаев уонна мин. Биһиги бу быыстапкаҕа анал тосхол быһыытынан Олимпиада-76 призёра, Пехлеван Алекандр Николаевич Иванову, кини дьиэ кэргэнин кытта көрсүһүүнү тэрийэн ыыттыбыт.

Манна, биир дойдулаахпыт Александр Иванов ситиһиилэрин, кини Сунтаарга үөрэнэ сылдьыбытын көрдөрөр уонна Сунтаар спорка историятын кэрэһэлиир матырыйааллары аҕаллыбыт. Александр Николаевич кимиэхэ бастаан дьарыктаммытын сорохтор билбэттэр эбит. Төрөөбүт дойдута Туой Хайа ууга барбытын кэнниттэн, олохтоохтор Мирнэйинэн, Сунтаарынан көспүттэрэ. Аан маҥнай кини 1966-1967 сс. Сунтаарга кэлэн, тустуунан дьарыктаммыта. Бастакы тренерэ – Габышев Анатолий Прокопьевич, Москватааҕы Сталин аатынан Ленин орденнаах физическэй култуура уонна спорт институтун бүтэрэн кэлэн, биһиги оройуоммутугар үлэлээбитэ, оҕолору тустууга дьарыктаабыта. Александр Николаевич бэйэтэ эппитин курдук, тустууга сүрүн өйдөбүлү, оскуоланы кини биэрбитин быһыытынан, киниэхэ куруук махталлаах.

Ону тэҥэ манна Сунтаар спордун историятын кэрэһэлиир матырыйааллары аҕаллыбыт. Бу, Альберт Захаров, Владимир Данилов, Петр Попов уо.д.а. тустарынан анал паапкалар. Бу – биһиги улууспут спорка сыһыаннаах түмэлин матырыйааллара. Онно мин үөрэппит кыыһым Мария Васильевна үлэлиир. Ити курдук, холобур, көҥүл тустууга ылан көрдөххө, көлүөнэлэринэн аттаран анал пааркалары оҥорбуттарын көрдөрүүгэ туруордубут. Холобур, Россия чемпиона Николай Яковлев, бу билиҥҥи күүстээх тустуукпут Лев Павлов тустарынан анал матырыйааллар бааллар. Итиэннэ бу инники кэскиллэрбит: охчут Мария Тараярованы, буулдьанан ытыыга Петр Егоровы көрдөрөбүт, кэпсиибит. Кинилэринэн киэн туттабыт.

Бу быыстапкаҕа мин аан бастаан кыттабын. Бэйэм да көрбүппүнэн, атын дьон да этэринэн, быыстапка сылтан сыл аайы кэҥээн, тупсан иһэр эбит. Аны икки сылынан Д.П. Коркин 100 сыла буолар. Онно өссө улахан быыстапка турара былааннанар. Биһиги онно эмиэ кыттыахпыт.

-Афанасий Терентьевич, наадалаах уонна туһалаах дьыаланан дьарыктана сылдьаргытынан улахан махтал! Инники үлэҕитигэр ситиһиилэри баҕарабыт. 

Күндү Дьокуускай куорат олохтоохторо уонна ыалдьыттара! “Строительнай” Атыы-эргиэн киинигэр (Жорницкай уул. 35 №-дээх дьиэтэ) буола турар “Коркинныы олоруохха! Коркинныын айыахха!” диэн баай ис хоһоонноох быыстапканы кэлэн көрөргүтүгэр, тустуу уонна тустууктар тустарынан билиигитин-көрүүгүтүн хаҥатаргытыгар, бэйэҕитигэр туһанаргытыгар ыҥырабыт.

Петр ПАВЛОВ.

Ааптар хаартыската.