Биир эйгэлээх, биир хайысхалаах дьон көрүстүлэр

«Коркинныы олоруохха! Коркинныы айыахха!» быыстапка алтыс күнүгэр «Саха сиригэр спорт суруналыыстыкатын бэҕэһээҥҥитэ, бүгүҥҥүтэ уонна сарсыҥҥыта» диэн ааттаах көрсүһүү ыытылынна.

Тэрээһини элбэх кинигэ, сурунаал ааптара, хаартыскаҕа түһэрээччи, биллиилээх общественнай деятель, Саха сирин үтүөлээх суруналыыһа Владислав Петрович Коротов уонна бу суруйуу ааптара көҕүлээн, салайан ыыттыбыт.

Биһиги сүрүннээн үлэбит туһунан кэпсээтибит. Республикаҕа спорду сырдатыы туһунан эттибит. Билиҥҥи кэмҥэ кумааҕынан бэчээттэн (хаһыат, сурунаал) уонна электроннай сибээстэн (ватсап, сайт) суруйуу, сырдатыы, ааҕыы боппуруостарыгар бэйэбит санаабытын үллэһиннибит.

Кэпсэтии сүрүннээн кумааҕы бэчээт, эбэтэр сыыппара? Спорду сырдатыыга саха тыла. Күрэхтэһиилэри быһа сырдатыы: куйаар ситиминэн көрдөрүү, кэмэнтээрий… диэн тиэмэҕэ барда.

Көрсүһүүгэ М.К. Аммосов аатынан Хотугулуу-Илиҥҥи федеральнай университет физическэй култуураҕа уонна спорка институтун кафедратын доцена, педагогическай наука кандидата Марианна Ильинична Северьянова салайааччылаах студеннар бөлөхтөрө кытынна.

Бастакы куурус студеннара Эрэл Тарков, Андрей Егоров, Арылхан Степанов кэпсэтиигэ кыттыһан, сонуну-нуомаһы билигин хаһыатынан да, электроннай да ньыманан ааҕан ылар иккиэн туһалаахтарын туһунан санааларын сайа эттилэр. Онон икки өттүттэн көхтөөх кэпсэтии таҕыста диэххэ сөп.

Түмүккэ, спорт институтун студеннара уонна спорду сырдатар суруналыыстар – биир эйгэлээх, биир хайысхалаах дьон буолалларынан, инникитин бииргэ сүбэлэһэн үлэлииргэ сүбэлэстилэр.

Холобур, Владислав Коротов, Манчаары аатынан «Модун» күрэс төрүт көрүҥнэрин киинигэр баар библиотекатыгар ыҥырда. Үөрэхтэрин саҥа саҕалаабыт оҕолор бу библиотекаттан Россия уонна Саха сирин спорка историятын туһунан литература көрөн, уларсан туһаныахтарын сөп эбит.

Ити курдук, ыкса ситимнээхтик үлэлэһэн, студеннар суруйууларын «Дьулурҕан” балаһаларыгар таһаарарга кэпсэтии оҥоһулунна.

Быыстапканы тэрийээччилэр ааттарыттан, биллиилээх бөҕөстөр Захар Чукров, Иннокентий Аянитов, Михаил Ноговицын, Алексей Стручков тустарынан кинигэлэр ааптардара Дмитрий Афанасьевич Егоров – Амид бэйэтин айар үлэтин билиһиннэрэн баран, студеннарга уонна кинилэр салайааччылара М.И. Северьяноваҕа бу көрсүһүүгэ көхтөөхтүк кыттыбыттарыгар махталын биллэрдэ.

Онон, төһө да биир идэлээхтэрбит, анаан ыҥырбыт дьоммут кэлбэтэхтэрин үрдүнэн, син добуоччу сэргэх тэрээһин буолла диэххэ.

Сарсын, балаҕан ыйын 11 күнүгэр – быыстапка бүтэһик күнэ. Көрө, сылдьа иликтэр кытаатыҥ! Аадырыспыт: «Строительнай» Атыы-эргиэн киинин Быыстапкалыыр саалата. Жорницкай уул. 35 (кыһыл өҥнөөх дьиэ бастакы этээһэ).

Петр ПАВЛОВ, “Дьулурҕан” хаһыат редактора, Саха Республикатын үтүөлээх суруналыыһа.

Дмитрий ЕГОРОВ хаартыскалара.