Спортсменнарбыт үрдүк таһымнаахтарын сөхтүлэр

Бу дьыл, атырдьах ыйын 22 күнүгэр Саха сириттэн остуол тенниһигэр оонньооччу 21 бэтэрээн-спортсмен Бурятияҕа буолар Митыпов Михаил Будажапович аатынан аһаҕас турнирга айаннаатыбыт.

Митыпов М.Б. олоҕун оҕо спордун сайыннарыытыгар анаабыт, элбэх сыратын биэрбит, спорду күүскэ сайыннарбыт Бурятия киэн туттар улуу киһитэ буолар эбит.

Максимиха диэн күрэххэ аналлаах зааллаах турбазаҕа хоно сытан үрдүттэн оонньоотубут.

Манна муһуннулар Кытайтан, Монголияттан, Саха сириттэн, Забайкальскай кыраайтан, Иркутскай уобаластан, Бурятияттан бэйэтиттэн элбэх кыттааччы, уопсайа 108 спорсмен 8 сааска арахсан, 40-49, 50-59, 60-64, 65-69, 70-74, 75 уонна үөһээ дьахталларга, маны таһынан 80 саастарыттан үөһээ эр дьоҥҥо туспа 2 аҕам саастаах күрэхтэстэ.

Ону таһынан команднай, парнай, смешка, абсолютка уонна шууд диэн күрэхтэргэ күрэс былдьаһыыта буолла. Сахалин спортсменнара заявкалаан баран, күн-дьыл туруга мөлтөөн самолеттара кыайан көппөккө кэлбэккэ хааллылар.

Бастакынан команднай күрэхтэһии буолла. «Стенка на стенку» диэн көрүҥҥэ биһигиттэн:

• Самсонов Василий (40-49)
• Слепцов Артур (50-59)
• Куприянов Еремей (60-69)
• Иванов Аркадий (60-69)
• Бабушкин Анатолий (70 лет и старше)
• Афонская Зульфия 50 сааска дылы
• Тутаева Александра 50 саастан үөһээ.
• Маннык састааптаах хамаанда турда, хара бастакыттан олох күүскэ эрийсиилээх күрэс буолла, тыҥааһынаах киирсиигэ Бурятия 1-кы хамаандата бастакы, иккис миэстэ кытайдар уонна Саха сирин хамаандата эрэллээхтик оонньоон 8 хамаандаттан үһүс миэстэ буолары ситистэ. Онтон парнай күрэхтэһии буолла – эр дьоҥҥо 30 паара, дьахталларга 20 паара, смешкаҕа 43 паара оонньоото. Онно биһиги спорстменнарбыт маннык ситиһиилэннилэр:

Паарнайга:

• Тутаева А.- Карпова С. — 2 миэстэ
• Слепцов А.- Иванов А. — 2 миэстэ

Смешаннай паараҕа:

Куприянов Е. — Тутаева А. — 1 миэстэ

Слепцов А. — Матвеева Е. — 3 миэстэ.

Түүн хойуут айаннаан кэлбит дьоҥҥо сылаалаах күн итинник ситиһиилэри аҕалла.

Дьэ, ити үрдүк ситиһии кэннэ күүспүтүгэр күүс эбиллэн, иккис  күн саастарынан арахсан оонньооһуҥҥа маннык ситиһиилэр буоллулар:

• Афонская Зульфия — 1 миэстэ (40-49 саастаахтарга)
• Карпова Сахая — 2 миэстэ (50-59 саастаахтарга)
• Слепцов Артур — 1 миэстэ (50-59 саастаахтарга)
• Самсонов Василий — 2 миэстэ (50-59 саастаахтарга)
• Куприянов Еремей — 2 миэстэ (60-64 саастаахтарга)
• Тутаева Александра — 2 миэстэ (65-69 саастаахтарга)
• Иванов Аркадий — 1 миэстэ (65-69 саастаахтарга)
• Басыгысова Ирина — 2 миэстэ (70-74 саастаахтарга)

75 саастан үөһээ:

• Матвеева Елизавета — 1 миэстэ
• Герасимова Антонина — 2 миэстэ
• Боронова Анастасия — 3 миэстэ.

Абсолюткаҕа эр дьоҥҥо Жчан Хайбо, кэрэ аҥаардарга Ли Шулинь – Кытай спортсменнара тэҥнээхтэрин булбатылар.

Шууд диэн бүрээттэр бэйэлэрин күрэхтэригэр эр дьоҥҥо Цыдыпов Баир, кэрэ аҥаардарга Атутова Наталья бастаан тыыннаах бараан бириис туттулар.

Ити курдук үс күн тилигирэччи оонньоон бэйэ-бэйэни билсэн үрдүк таһымнаах күрэх биллибэккэ ааста.

Атын дойду оонньооччулара биһиги спорстменнарбыт үрдүк таһымнаахтарын сөҕөн кэпсэтэллэрин истэргэ үчүгэйэ сүрдээх. Галактионова Светлана китаянканы кытта оонньуутун заал иһигэр баар дьон бары тыыммакка да чуумпуран көрдүлэр, олох дьикти чаҕылхай оонньуу буолан ааста, улуу Кытай норуотун дьоно олох сөҕө көрдүлэр, Сахая Карпова күүстээх монголкалыын киирсиигэ кыл-мүччү кыаттарыы буоллар да, эмиэ биир чаҕылхай киирсиини көрдөрдө.

Өссө биир түгэни тоһоҕолоон эттэххэ, Слепцов Артур оонньуутун дьон сэргээн, хайҕаан көрдүлэр. Уопсайынан, биһиги оонньооччуларбыт стиллэрэ атынын, күүстээхтэрин сэҥээрдилэр. Атын дойду спортсменнара бары шип ракетканан оонньуур буоллахтарына, биһиги эдэр бэтэрээннэрбит бары кэриҥэ «гладкай» ракетканан оонньуурбутун бэлиэтээн эттилэр.

Саха сирин хамаандатын оонньооччута Светлана Галактионова күрэхтэһии туһунан санаатын маннык үллэһиннэ: «Эта поездка в Бурятию стала для меня особенным событием, ведь я давно не выезжала на соревнования за пределы Республики Саха (Якутия). На турнире по настольному теннису в с. Максимихе я столкнулась с совершенно новым уровнем конкуренции и в упорной борьбе заняла 4-е место. Для меня очень приятно была сильная поддержка нашей команды. Хотя до призового места не хватило совсем чуть-чуть, этот дебют на международном уровне принес мне огромный опыт и мотивацию двигаться дальше.»

Күрэхтэһиигэ барааччылар кыттыһан Варвара Сотрудникова оҥорбут Саха сирин теннис спордун туһунан кинигэтин бэлэх ууммуппутун — наһаа сэргээн, астынан ыллылар. Бурятиялар итинник кинигэ таһааттарыахтарын баҕара сылдьаллар эбит, онон олох үөрэтиэхпит диэтилэр.

Түмүктүүр тылга бэтэрээннэр биһигини мунньан, тэрийэн аҕалбыт киһибитигэр Зульфия Николаевна Афонскаяҕа махтал тылбытын эттибит. Эдэр киһиэхэ маннык күрэскэ элбэх киһини тэрийэн илдьэн кытыннарбыта хайҕаллаах суол, инникитин даҕаны маннык тэрийэр-салайар үлэни үрдүк таһымнаахтык оҥоро тур диэн алгыыбыт!

Матрёна АРЖАКОВА.