Майатааҕы марафон бэйэтин тула 700 кыттааччыны түмтэ

Ааспыт өрөбүлгэ, атырдьах ыйын 22 күнүгэр, Мэҥэ Хаҥалас улууһун Майа сэлиэнньэтигэр Аан дойду кылаастаах успуорт маастара, РФ физическэй култуураҕа уонна успуорка үтүөлээх үлэһитэ, 100 км Аан дойду супермарафонун 3 төгүллээх кыайыылааҕа, бары киэн туттар, убаастыыр киһибит, биир дойдулаахпыт – Татьяна Юрьевна Жиркова аатынан Майа марафона үһүс сылын этэҥҥэ, үрдүк таһымнаахтык ыытыллан, бэйэтин тула 700 сүүрүк кыттааччыны түмэ тутта.

“Марафон” диэн тыл суолтатын кыратык этэр эбит буоллахпына, урут биһиги эрабыт иннинэ 490 сыллаахха Марафон диэн сэлиэнньэ аттыгар грек омуктар перстары кыайбыттар эбит. Ол номох этэринэн, Фидиппид диэн буойун Марафон сэлиэнньэтиттэн Афины куоракка диэри быыстала суох сүүрэн тиийэн, кыайбыттарын туһунан илдьити дьонугар-сэргэтигэр тиэрпит. Онон, марафону уһун тыыннаах, быһый атахтаах, айылҕаттан айдарыылаах, ону таһынан, олус үлэһит, сымса дьон сүүрэллэр дии саныыбын. Оннук спортсменнары олус сөҕө, киэн тутта көрөбүн.

Дьэ, ол курдук Комсомольскай болуоссакка үөрүүлээх быһыыга-майгыга Татьяна Жиркованы, марафон кыттыылаахтарын, бары ыалдьыттары бу успуорт бырааһынньыгынан  Мэҥэ Хаҥалас улууһун баһылыга Дмитрий Иванович Тихонов, Майа сэлиэнньэтин баһылыга Алексей Иннокентьевич Неустроев, СӨ үпкэ миниистирин солбуйааччы Николай Прокопьевич Старостин, Майатааҕы марафон сүрүн тэрийээччитэ, «Maya.run» түмсүү салайааччыта Александра Егоровна Мохначевская бэйэлэрин үтүө, эҕэрдэ тылларын анаатылар.

Болуоссакка атыы-тутуу дьаарбанката, бэйэни тургутан көрөр оонньуулар, доруобуйаны көрдөрүнэр киин үлэлээтэ. Ону тэҥэ, Мэҥэ Хаҥалас улууһун киэн туттар спортсменнарыгар анаммыт «Өрөгөй аартыга» диэн быыстапка тэриллибитэ. Онно киирбиттэрэ: Ньургун Скрябин, Василий Егоров, Игорь Скрябин, Афанасий Илларионов, Константин, Екатерина, Эрчимэн Драгуновтар дьиэ кэргэн, Виталий Пестряков, Александра Мохначевская уонна Татьяна Жиркова ситиһиилэрин түмэр кинилэр грамоталара, мэтээллэрэ дьон дьүүлүгэр көрдөрүллүбүттэрэ.

Марафон саҕаланыан иннинэ, Татьяна Юрьевна Жиркова бары кыттааччыларга разминка, сэрээккэ оҥотторбута. Уопсайа сэттэ араас уһуҥҥа сүүрүү саастарынан эр дьоҥҥо, кэрэ аҥаардарга, оҕолорго ыытылынна: 500 м, 1 км, 5 км, 10 км, 21 км, 42 км. Өссө Дмитрий Иванович кэлэр сылга эбии аҕам саастаах дьон хаамар суолларын оҥорор баҕа санаалаахпыт, кыттааччы ахсаанын элбэтэн 1000 киһини сүүрэр суолга таһаарыахтаахпыт, салгыытын даҕаны көхтөөх кыттыыны ыла тураргытыгар диэн көрөөччүлэргэ эттэ.

Марафоҥҥа профессиональнай ааттаах-суоллаах, биллэр-көстөр спортсменнар, сүүрүүнэн саҥа дьарыктанан эрэр дьон эдэрдиин-эмэнниин, дьиэ кэргэнинэн, соҕотохтуу өрөспүүбүлүкэбит 19 улууһуттан, улууспут 24 нэһилиэгиттэн, өссө эбии араас куораттартан кэлэн, уопсайа 700 киһи кыттыыны толору ыллылар. Финиш диэкитэ сүүрэн истэххинэ тэрийээччилэр плакаттаах, шардаах, көстүүмнээх, ырыалаах-тойуктаах, барабан доҕуһуоллаах көрсүбүттэрэ – сүүрүк дьоҥҥо күүстэригэр күүс, сэниэлэригэр сэниэ, өйөбүл, тирэх буолбута диэн эттэхпинэ алҕаһаабаппын.

Дьэ, бу курдук, үһүс сылын ыытыллар Т.Ю. Жиркова аатынан Майа марафона олус үрдүк таһымнаахтык этэҥҥэ ыытыллан түмүктэннэ. Тэрийээччилэр, волонтёрдар биир сомоҕо буоланнар бэртээхэй тэрээһини ыыталлара норуоту, эдэр көлүөнэ оҕолору, ыччаты успуорт умсулҕаннаах эйгэтигэр угуйаллара наһаа үчүгэй, биһирэмнээх уонна кэрэхсэбиллээх суол. Мэҥэм үтүө-мааны дьонунан-сэргэтинэн киэн туттабын, маннык хамсааһыннары куруутун өйүүбүн.

«Мэҥэлэр – хайа үрдүгэр», чөл олоҕу тутуһун, успуордунан, физкултууранан дьарыктанын, доруобай эрэ буолун, күндү доҕоттор!

Милена АНДРЕЕВА, М.К. Аммосов аатынан Хотугулуу-Илиҥҥи федеральнай университет 4-с куурсун студентката.