Константин Капрынов – Россия чемпионатын боруонса призера

Көҥүл тустууга Россия чемпионатын бүгүн үһүс, бүтэһик күнэ. Алта ыйааһыҥҥа кыайыылаахтар уонна иккис-үһүс миэстэлээхтэр быһаарыллыахтара.

Кылгастык бэҕэһээҥҥи тустуулары иһитиннэрдэххэ, 70 киилэҕэ хамаанда хапытаана Константин Капрынов боруонса мэтээл иһин тустууга Россия, Европа уонна аан дойду чемпиона осетин Давид Баевы 7:2 ахсаанынан эрэллээхтик кыайан, пьедестал үһүс үктэлигэр тахсар чиэскэ тигистэ. Итинэн кини былырыын Красноярскайга, Иван Ярыгин түһүлгэтин финалыгар тэҥ киирсиигэ кыранан сабырыйтарбытын боруостаата.

Манна сыһыары тутан эттэххэ, Капрынов бу иннинэ иллэрээ күн, утуу-субуу Кажаровы (КБР) 12:2, бэйэтин киһитэ Игорь Матвеевы 2:1, осетин Бугуловы ыраастык кыайталаан баран, финалга тахсар иһин хапсыһыыга дагестанец Азнаур Таваевка 3:7 ахсаанынан хотторон кэбиспитэ.

Онтон үөһэ ахтан аһарбыппыт курдук, боруонса мэтээл иһин тустууга кыайыы кынаттанна. Бу көрдөрүүтүнэн, Константин Капрынов дойду иһигэр 70 киилэҕэ иккис сылын эриэ-дэхси көрдөрүүлээх, күүстээх бөҕөс буоларын өссө төгүл итэҕэттэ.

Түгэнинэн туһанан, Константины уонна кини тус тренерэ Егор Пономаревы эҕэрдэлиибит!

Бастакы саҕалаабыт түөрт ыйааһыны ылан көрдөххө, өссө 61 киилэҕэ Александр Авеловтан үчүгэй тустууну эрэнэ күүппүппүт эрээри, биһиги баҕабыт туолбата. Уолбут санааны уоскутар бөлөххө киирэн бурят Бато Сультимовка хотторон кэбистэ. Өссө биир, чемпионат инниттэн сэмээр мэтээлгэ суоттаммыт киһибит – Ньургун Сергин эчэйии ылан, кыттыбакка хаалбыта хомолтолоох.

Эрдэ эппитим курдук, бу чемпионакка отучча бөҕөспүт кытынна. Кинилэр хас биирдиилэрэ туспа сыаллаах-соруктаах кытыннылар. Биирдиилэриттэн ирдэбил тус-туспа этэ. Ону сорохтор толордулар, сорохтор толорботулар. Чэ, ону бу кылгас суһал иһитиннэриигэ буолбакка, чемпионат бүппүтүн кэнниттэн ырытыыга суруйуохпут.

Чемпионат иккис күнүгэр алта олимпийскай ыйааһыҥҥа тустуулар буоллулар. Онно кимнээҕэр да ордук киһи барыта болҕомтотун Лев Павлов тустуутугар уурбута. Быйыл кыһыҥҥыттан кини биллиилээх тренер Владимир Модосян салалтатынан дьарыктанна. Соҕуруунан, Грузиянан, Армениянан анал эрчиллиилэри барда. Онон тустуутугар сэргэхсийии тахсыбыта буолуо диэн эрэнэ күүппүппүт.

Уолбут сэрэбиэйэ үчүгэй этэ. Бастаан дагестанец Абдурахимовы 8:0 ахсаанынан, онтон Анищенконы (Белгород) ыраастык кыайталаан баран, финал чиэппэригэр Оренбургтан кыттар эдэр бөҕөс Тунджай Вердиевка тахсыбыта. Манна даҕаны Лев кыайарыгар эрэллээх этибит. Ол эрээри, хапсыһыы көбүөргэ биһиги санаабыппыт курдук буолбата. Наһаа тыҥааһыннаах тустууга биһиги бөҕөспүт 1:2 ахсаанынан хотторуулааҕынан ааҕылынна. Бу хотторууттан, тустууну таптааччылар биирдэ ньаппас гына түстүбүт. Сатахха, салгыы күрэхтэһиигэ Вердиев – Муса Мехтихановка 1:4 хотторон, биһиги эрэлбитин букатыннаахтык сотон таһаарда. Онон бүттүбүт.

57 киилэҕэ атын эмиэ эрэммит бөҕөстөрбүт эрдэ туораан хааллылар. Ол туһунан, ким кими кытта хайдах киирсибитин барытын табло курдук «Дьулурҕан» хаһыат сайтыгар анаан сырдатан иһэрбитин көрөргүтүгэр баҕарабыт.

// бөҕөстөрбүт тустууларын видеотын «Дьулурҕан» телеграмҥа каналыгар t.me/dzulurgan көрөргүтүгэр.

Дьэ онон, иккис күннээҕи күрэхтэһии түмүгүнэн, 97 киилэҕэ кыттар Никита Софронов уонна 125 кг ыйааһыҥҥа Никита Хабаров син барбахтаһа түстүлэр. Кинилэр бүгүн санааны уоскутар бөлөххө тустуохтара. Ол курдук, Софронов – Константин Пшеничниковы (Кемерово) кытта киирсиэҕэ. Онно хайалара кыайбыта салгыы А.Бекоевка (Хотугу Осетия) тахсыаҕа. Манна кинилэри боруонса мэтээл иһин киирсиигэ А.Жабраилов (Дагестан) кэтэһэн олорор.

Оттон Никита Хабаров эмиэ санааны уоскутар бөлөххө, Мусаев (Дагестан) уонна Цыжипов (Бурятия) кыайыылааҕын кытта киирсиэҕэ. Онно кыайдаҕына үһүс миэстэ иһин Г.Бязровы (Хотугу Осетия) кытта тустуоҕа.

Бөҕөстөрбүтүгэр ыалдьабыт.

Бүгүҥҥү быһаарыылаах хапсыһыылар:

57 кг Муса Мехтиханов — Абубакар Муталиев (иккиэн — Дагестан)

65 кг Эльдар Ахмадудинов — Абасгаджи Магомедов (иккиэн — Дагестан)

74 кг Иналбек Шериев (Москва уоб) — Заурбек Сидаков (ХМАО-Югра)

86 кг Ибрагим Кадиев (Дагестан) — Артур Найфонов (ХМАО-Югра)

97 кг Мухамет-Тагир Ханиев — Магомед Курбанов (иккиэн — Дагестан)

125 кг Абдулла Курбанов (Дагестан) — Алан Хугаев (Осетия)

Чемпионат бүтэһик күнүн хапсыһыылара Дьокуускай бириэмэтинэн киэһэ 17:00 чаастан саҕаланаллар. Тэрийээччилэр биллэрбиттэринэн, санааны уоскутар бөлөх тустууларын кэнниттэн тута, үһүс бириистээх миэстэ иһин киирсиилэр ыытыллыахтара. Оттон кыайыылааҕы быһаарар хапсыһыылар түүн 01:30 чаастан саҕаланыахтара.

«Дьулурҕан» хаһыат сайтыгар көҥүл тустууга Россия чемпионатын туһунан:

Көҥүл тустууга Россия чемпионатыгар — Ссылка: https://dzulurgan.ru/2026/07/k%d3%a9%d2%a5%d2%afl-tustuuga-rossiya-chempionatygar/ 

Бастакы күн: бүгүн кимнээх тусталларый? — Ссылка: https://dzulurgan.ru/2026/07/b%d2%afg%d2%afn-kimneeh-tustallaryj/

Иккис күн: кимнээх тусталларый? — Ссылка: https://dzulurgan.ru/2026/07/ikkis-k%d2%afn-kimneeh-tustallaryj/

Константин Капрынов боруонса иһин тустуоҕа —  Ссылка: https://dzulurgan.ru/2026/07/konstantin-kaprynov-boruonsa-meteel-i%d2%bbin-tustuo%d2%95a/

Итоги первого финального дня — Ссылка: https://dzulurgan.ru/2026/08/itogi-pervogo-finalnogo-dnya/

Петр ПАВЛОВ.

Александр Назаров хаартыската.