Тютрин уонна Окороков – Венгрия көбүөрүгэр

От ыйын 15-19 күннэригэр Венгрия киин куоратыгар Будапештка – Имре Пояк, Янош Варга, Иштван Козма сырдык ааттарыгар Аан дойдутааҕы тустуу холбоһугун (UWW) спортивнай тустууга бүтэһик – төрдүс рейтиннээх норуоттар икки ардыларынааҕы турнира ыытыллар.

Күрэхтэһии – эр дьон көҥүл тустууга хапсыһыыларынан саҕаланар. Бастакы күн тосхол быһыытынан 57, 61,  65, 70, 74, 86 кг ыйааһыннаахтар тусталлар уонна бу күн иһинэн кыайыылааҕы быһаарсаллар. Оттон от ыйын 16 күнүгэр – 79, 92, 97, 125 киилэлээхтэр күөн көрсөллөр.

Салгыы 17-18 күннэргэ – дьахталлар, 18-19 күннэргэ гректии-римнии тустааччылар киирсиэхтэрэ.

Бу түһүлгэ көҥүл тустууга күрэхтэһиитигэр саха тустууга кыһатын икки иитиллээччитэ: Беларусь чиэһин көмүскүүр Арыйаан Тютрин 57 киилэҕэ уонна Австралия чемпиона Георгий Окороков 61 киилэҕэ кыттыахтара. Бу күрэхтэһии биһиги бөҕөстөрбүтүгэр аан дойду чемпионатын иннинэ бэлэмнэнии быһыытынан көрүллэр.

Сэрэбиэй түмүгүнэн бастакы эргииргэ Арыйаан Тютрин индиец Рахулу Аварены, оттон Георгий Окороков азербайджанец Нурадин Новрузовы кытта тустар буолбуттар.

Уолаттарбытыгар ситиһиилээх тустууну баҕарабыт!

Көбүөргэ хапсыһыылар Дьокуускай бириэмэтинэн киэһэ 17:30 саҕаланаллар. Оттон быһаарыылаах хапсыһыылар түүн 00:00 чаастан буолуохтара.

Петр ПАВЛОВ.