Тургутук: Успуорт историятын төһө билэҕин?

Успуорт эйгэтигэр буолан ааспыт чахчылартан тургутугу (ыйытыгы) таһаарыыны “Дьулурҕаҥҥа” салгыыбыт. Чэйиҥ, бэйэҕит билиигитин холонон, тургутаҥ көрүҥ эрэ.

1. Амматтан төрүттээх Платон Прокопьев — Оокко бухатыыр мас тардыһыытын тэҥэ, спорт ханнык көрүҥүнэн сөбүлээн дьарыктаммытай?

А. Гиирэнэн, Б. Штанганан, В. Тустуунан, Г. Остуол тенниһинэн.

2. Саха бөҕөстөрүттэн ким аан бастаан Азия чөмпүйэнээтигэр кыайбытай?

А. Владимир Торговкин, Б. Леонид Спиридонов, В. Семен Семенов, Г. Иннокентий Иннокентьев.

3. Манчаары оонньууларын онус үбүлүөйдээх түһүлгэтэ ханна ыытыллыбытай?

А. Майаҕа, Б. Бүлүүгэ, В. Аммаҕа, Г. Горнайга.

4. Футболга аан дойду чөмпүйэнээтэ бастакынан 1930 с. Уругвайга ыытыллыбыт, Европа элбэх судаарыстыбаларыттан ордон. Тоҕо? Биир саамай сүрүн төрүөтэ.

А. Уругвай ыытыллар бары ороскуотун бэйэтигэр ылыммытынан, Б. Ыаллара Бразилия, Аргентина о.д.а. күүстээх өйөбүллэринэн, В. Соҕуруу Эмиэрикэҕэ барытыгар футбол сайдыаҕа диэн, Г. 1924, 1928 сылларга Уругвай Олимпиадаҕа бастаабытын иһин.

5. Футболга аан дойду чөмпүйэнээтэ 1930 с. Уругвайга барбытыгар, Европа судаарыстыбалара утарбыттар, сорохтор кыттыбатахтар. Сүрүн биричиинэтэ?

А. Европаҕа ыыппатахтарынан, Б. Ыраах айан суолун төлөбүрүн булар уустуктардааҕынан, В. Ол кэмнэргэ айан суолугар олус элбэх бириэмэ барарынан, Г. Ханнык эрэ ыраах, сайдыыта суох кыра дойду диэн.

6. Штангаҕа Саха сириттэн бастакы маастар?

А. Михаил Скрябин, Б. Олег Пак, В. Валерий Кузьминых, Г. Гранит Пак.

7. «Үрдүк култууралаах тойоттор дуобаты хайаан да сатыахтаахтар» диэн ирдэбили туруорбут Арассыыйа ыраахтааҕыта. Кимий?

А. Николай I, Б. Николай II, В. Александр I, Г. Петр I

Редакцияттан: бу тургутук “Дьулурҕан” dzulurgan.ru сайтыгар таҕыста. Онно тургутук анныгар баар Комментарии колонкаҕа бэйэҕит хоруйдаргытын суруйуоххутун сөп. Сөптөөх хоруйдары хаһыат аныгыскы нүөмэригэр таһаарыахпыт.

Бэчээккэ бэлэмнээтэ Степан АНДРЕЕВ.

Майа.