Макар Зырянов: «Өссө да бииргэ үлэлэһэ туруохха»

Олохсуйбут үгэс быһыытынан, футболга аан дойду чемпионатыгар анаан “Дьулурҕан” хаһыат конкурс тэрийдэ. Быйылгы тэрээһиҥҥэ барыта 70 киһи кытынна. Кыайыылаахха бирииһи – спортивнай көстүүмү IRON COLLECTION хампаанньа туруорда.

Конкурс кыайыылааҕа Андрей Филипповка бирииһин туттарыыга, бу хампаанньа биир төрүттээччитэ уонна салайааччыта, көҥүл тустууга Россия спордун маастара Макар Николаевич Зыряновтан санаатын кылгастык үллэстэригэр көрдөстүм.

-Бастатан туран эһиэхэ, “Дьулурҕан” үлэтигэр өрүү күүс-көмө, өйөбүл буоларгытыгар, футболга аан дойду чемпионатыгар конкурс тэрийэрбэр бириис олохтуурга сөбүлэспиккитигэр улаханнык махтанабын. Дьэ, конкурс уонна футбол чемпионатын туһунан кылгастык бэйэҥ санааҕын үллэһиҥ эрэ.

-Бэйэм “Дьулурҕан” хаһыатынан улааппыт киһи буоламмын, хаһан баҕарар эһигини өйүү сатыыбыт. Биһиэхэ ол биһирэбили эрэ үөскэтэр. Маннык конкурс тэрийэргит олус үчүгэй, интэриэһинэй. Бэйэҕитигэр сэҥээриини тардаҕыт, дьоҥҥо үтүөнү, кэрэни, билиини-көрүүнү тарҕатаҕыт.

Биһиги бары спорт эйгэтин дьоно буоллахпыт дии. Олохпут спорду кытта ыкса ситимнээх. Ол да иһин, улахан таһымнаах күрэхтэһиилэри көтүппэппит. Бары көрөбүт, интэриэһиргиибит. Бэйэбит сөбүлүүр спортсменнарбытыгар ыалдьабыт. Футболга аан дойду чемпионатын финалын тэрилтэбитигэр мустан көрбүппүт. Месси аан дойду икки төгүллээх чемпиона буолуон баҕарбыппыт да, биһиги санаабыт туолбата. Ол да буоллар, кини өссө төгүл аатырбыт улуу спортсмен буоларын итэҕэттэ дии саныыбыт. Элбэх киһи аан дойду үрдүнэн киниэхэ ыалдьыбыт буолуохтаах.

Конкурс кыайыылааҕа Андрей Филиппов бэркэ таайбыт эбит. Испэр, Испания – Аргентина финалын кэтэспитим, «Барселона» фаната буоларым быһыытынан. Ол гынан баран, тоҕо эрэ эрдэттэн Франция тахсыа дии саныырым…

“Дьулурҕанна” махтал! Өссө да бииргэ үлэлэһэ туруохха, Саха спорда сайдарын туһугар. Итинник конкурстарда өссө даҕаны ыытыахха, футболга эрэ буолбакка, спорт атын көрүҥнэригэр эмиэ.

—Өссө төгүл махтал, Макар Николаевич! Үлэҕитигэр уонна тус олоххутугар ситиһиилэри баҕарабыт.  

Петр ПАВЛОВ.

Ааптар хаартыската