Көҥүл тустууга Россия чемпионатыгар

Дьэ, өр күүппүт күрэхтэһиибит саҕаланара бу кэллэ. От ыйын 30 – атырдьах ыйын 1 күннэригэр Москваҕа, көҥүл тустууга Россия чемпионата ыытыллар. Манна дойду күүстээх бөҕөстөрө бары кытталлар. Чемпионат сүрүн соругунан аны күһүн Казахстаҥҥа буолар аан дойду чемпионатыгар Россия хамаандатын талыы, сүүмэрдээһин буолар.

Бу эппиэттээх түһүлгэҕэ хамаандалар бары эрдэттэн сүрдээҕин кичэйэн бэлэмнэннилэр. Саха сирин хамаандата хас да сиринэн сылдьан эрчилиннэ. Ол курдук, Лев Павлов уонна Александр Авелов үтүөлээх тренер Владимир Модосян салалтатынан Грузиянан, Армениянан сылдьан дьарыктаннылар. Оттон Константин Капрынов, Ньургун Сергин, Манчаары Ильинов, Максим Толмачев тренер Егор Пономарев салалтатынан Хотугу Осетияҕа эрчилиннилэр.

Атыттар бары манна, Туймаадаҕа, “Өрөгөй” күрэс уораҕайыгар сүүмэрдэммит хамаанда сүрүн тренерэ Вадим Семенов салалтатынан анал бэлэмнэниини бардылар.

Саха сирин бөҕөстөрө:

57 кг: Валерий Андросов, Любомир Ашеин, Алексей Копылов, Данил Мохначевскай, Михаил Осипов, Лев Павлов, Федор Постников, Алексей Антипин (Хотугу Осетия-Алания)

61 кг: Александр Авелов, Манчаары Ильинов, Артур Макаров, Яков Павлов, Артем Слепцов, Ньургун Терентьев, Николай Щеглов

65 кг: Василий Григорьев, Юлиан Григорьев, Владислав Кривошапкин, Аслан Трофимов, Виктор Яковлев

70 кг: Константин Капрынов, Игорь Матвеев, Сергей Некрасов, Айсен Потапов

74 кг: Иннокентий Бабаранов, Владимир Бояновскай, Алексей Захаров, Олег Фомин

79 кг: Уйгун Бурцев, Андриан Ленскэй

92 кг: Ньургун Сергин

97 кг: Никита Софронов, Максим Толмачев

125 кг: Харысхан Баппаҕай, Никита Хабаров.

Онон Россия быйылгы чемпионатыгар Саха сириттэн барыта 33 уонна Хотугу Осетияттан 2 бөҕөс кыттар. Кинилэр бары араас сүһүөхтээх сүүмэрдээһини ааһан, дойду сүрүн күрэхтэһиитигэр кыттар кыахтаннылар. Көрөргүт курдук, састаапка үөрүйэхтээх бөҕөстөрү тэҥэ эдэр, кэскиллээх тустууктар киирдилэр Ол иһин, ирдэбил даҕаны оннук.

Тус бэйэм сылыктааһыммынан, уолаттарбыт – 57, 61, 70 уонна 92 кг мэтээл иһин киирсэр кыахтаахтар. Барытын түһүлгэ быһаарыа: бу күҥҥэ, бу чааска ким күүстээҕин, ким үчүгэй бэлэмнээҕин, кыайыыга дьулуурдааҕын…

Санатан эттэххэ, былырыын эмиэ Москваҕа буолбут чемпионакка Константин Капрынов 70 киилэҕэ үрүҥ көмүс, Александр Авелов 61 киилэҕэ боруонса мэтээллэри ылары ситиспиттэрэ.

Чемпионат тосхоло (Дьокуускай бириэмэтинэн):

От ыйын 30 күнэ, чэппиэр

17:00 – 61, 70, 79, 92 кг барыллааһын хапсыһыылар

23:00 – 61, 70, 79, 92 кг финалга тахсар иһин киирсиилэр.

От ыйын 31 күнэ, бээтинсэ

17:00 – 57, 65, 74, 86, 97, 125 кг барыллааһын хапсыһыылар. 61, 70, 79, 92 кг санааны уоскутар киирсиилэр.

00:00 – 57, 65, 74, 86, 97, 125 кг финалга тахсар иһин тустуулар

02:00 – 61, 70, 79, 92 кг финал хапсыһыылара.

Атырдьах ыйын 1 күнэ, субуота

17:00 – 57, 65, 74, 86, 97, 125 кг санааны уоскутар киирсиилэр

22:00 – үһүс миэстэ иһин тустуулар

01:30 – кыһыл көмүс мэтээл иһин тустуулар.

Сыл быһаарыылаах түһүлгэтин сырдата суруналыыстарбыт оҥостон бардылар. Кинилэр сонуннарын “күөх экранынан”, араадьыйанан, социальнай сеттэринэн кэтэһэбит. Ону тэҥэ, бөҕөстөрбүтүгэр ыалдьа, күүс-көмө, өйөбүл буола элбэх ахсааннаах ыалдьааччылар бардылар. Барыта биһиги туспутугар этэҥҥэ буоллун!

Петр ПАВЛОВ.