ИДьМ ветераннарыгар слёт буолла

От ыйын 25-26 күннэригэр Россия ИДьМ ветеранскай хамсааһына тэриллибитэ 35 сылыгар анаммыт Саха сирин ИДьМ ветераннарын слёттара буолан ааста. Барыта 50-ча ветеран киин куораттан уонна кэккэ улуустартан кэлэн, Лена өрүс үрдүгэр турар ИДьМ сынньалаҥ базатыгар түстүлэр.

Самаан сайын көҕөрдүбүт айылҕа кэрэ көстүүлэригэр үктэнэн, ыраас салгыны эҕиэрийэ тыынан астыныы-дуоһуйуу буолла. Үгэскэ кубулуйбут аһыллыы сиэрэ-туома ыытылынна, алгысчыт Олонхо дойдутун Чысхаанын толорооччу Владимир Захаров Аал уот иччитин күндүлээтэ уонна алгыс тылын этэн баран, мустубут дьону оһуохайга киллэрдэ.

Бу сыл дойдуга норуоттар сомоҕолоһуулара диэн билиниллибитигэр анаммыт төрүт итиэннэ стилизованнай көстүүм куонкурса ыытылынна. Манна кыттааччылар бэйэлэрэ тикпит, оһуордаабыт көстүүмнэрин кэтэн мустубут дьоҥҥо кэпсии-кэпсии хааман көрдөрдүлэр. Мустубут дьон кэрэхсибиллэрин ыллылар – Прасковья Соловьева саха дьахтарын стилизованнай таҥаһа, Татьяна Селецкая «Саха сирин сааһа” көстүүмэ, Анна Корякина «Сүктэр кыыс таҥаһа”, Изольда Уваровская «Бүрээт дьахтарын» таҥаһа, Раиса Заболоцкая «Эбэҥки дьахтарын» таҥаһа, Раиса Сарычева «Саха аныгы дьахтарын» көстүүмэ, Владимир Захаров «Саха эр киһитин көстүүмэ», Николай Жирков «Киргиз эр киһитин көстүүмэ».

ИДьМ түмэлин директора, историческай наука кандидата Александ Ярковой аҕалбыт выставка-экспозицияны туруоран, Саха сирин ИДЬМ ветеранскай хамсааһынын историятын кэрчиктэрин кэпсээтэ. Спорт иаастара Лариса Иванова хабылыкка,хаамыскаҕа мастер-класс көрдөрдө.

Онтон слет кыттыылаахтара үстуу дьахтар, иккилии эр киһи састааптаах алта хамаанданы туруоран күрэс былдьастылар. Быйыл саҥа көрүҥүнэн корнхолл буолла – Туран эрэ 6 м 40 см ыраахтан 1 м 20 см дуоскаҕа мөһөөччүктэри быраҕан очукуолары хомуйаҕын: дуоскаҕа хааллаҕына 1 очко, хайаҕаска киирдэҕинэ 3 очко. Манна кыра оҕо да, кырдьаҕас киһи оонньуон таах сөп эбит уонна ханна баҕарар, олус көрдөөх, умсугутулаах оонньуу. Кыайыылааҕынан 45 очукуону хомуйбут 3+2 хамаанда (М.Сосин, П.Федоров, С.Эверстова, Р.Сарычева, В.Федорова) буолла. Иккис миэстэни ылла 37 очукуолаах “Күн» хамаанда (А.Игнатьев, А.Николаев, П.Соловьева, С.Заболоцкая, И.Уваровская). Икки очукуонан хаалбыт “Стрела” хамаанда (Е.Федосеев, Н.Жирков, Р.Заболоцкая, Л.Федорова, В.Васильева) үһүс буолла.

Дартс күрэҕэр 513 очукуону хомуйбут 3+2 хамаанда эмиэ бастаата уонна уопсай зачекка лидер буолла. Иккис миэстэни 8 очукуонан хаалбыт “Күн» хамаанда ылла. Үһүс миэстэни «Ух» хамаанда (Г.Самсонов, В.Филиппов, Л.Тихонова, А.Дьяконова, А.Корякина) ылла.

Боулинг күрэҕэр «Күн» хамаанда 29 очукуону хомуйан бастаата уонна лидертан икки очукуо хаалан иһэриттэн биирин көҕүрэттэ. Үс очукуонан хаалбыт «3+2 хамаанда иккис буолла, үһүс миэстэҕэ «Ух” хааманда 22 очукуону хомуйан тигистэ.

Мохсуо күрэҕин түмүгэ дартс күрэҕин түмүгүн курдук буолла итиэннэ “3+2” хамаанда бастыырыгар сарбахтааһын суох буолла. Бүтэһигинэн түөрт этаптаах «көрүдьүөс стартар» эстафета ыһыы-хаһыы ортотугар буолла. Кыайыылааҕынан эрэллээхтик “Олимпия” хамаанда (М.Самсонова, Л.Иванова, Н.Петрова, В.Николаев, A.Федоров) буолла. Иккис миэстэҕэ «3+2” хамаанда, үһүс миэстэҕэ «Ух” хамаанда тигистилэр.

Уопсай түмүккэ “3+2” хамаанда 7 очукуо ылан кыайыылаах буолла, иккис миэстэни 12 очукуолаах “Күн», үһүс миэстэни «Ух” хамаандалар ыллылар. Үһүс миэстэттэн биир очуокуонан хаалбыт «Олимпия” – төрдүс, «Стрела” – бэһис уонна  олохтоох «Хаҥыл” хамаандаҕа истиэнэлэрэ көмөлөспөккө бүтэһик буоллулар. Дартс күрэҕин муҥутуур кыайыылааҕынан 174 очукуону хомуйбут Прасковья Соловьева буолла, корнхоллга Александр Игнатьев 14 очукуолаах бастаата, боулинг кыайыылааҕынан 8 очукуолаах Любовь Федорова икки киһини хаачыстыбанан баһыйан буолла.

Судейскай коллегия (Владимир Захаров, Петр Яковлев, Роман Алексеев, Анжела Афонина) араас түгэннэри этэҥҥэ аһардылар, хаҕыр кэпсэтиини, өйдөспөт буолууну суох оҥордо. Киэһээҥҥи аһылыкка толору астаах остуолга тото-хана аһаатылар, санаа атастаһыылара буоллулар, ИДьМ бэлиэлэрин туттулар, күрэхтэр кыайыылаахтара анал бириистэринэн наҕараадаланнылар. Туспа махтал шашлык уонна плов астааччыларыгар Александр Игнатьевка, Роман Алексеевка этилиннэ. Онтон эрчимнээх дискотека ыытылынна. Иккис күн сөтүөлээһиҥҥэ, «чуумпу булка”- тэллэй хомуйуутугар, дьэдьэн амсайыытыгар сылдьыы буолла.

П.СПИРИДОНОВ.