Финалга тахсар иһин киирсэр хамаандалар билиннилэр

Футболга аан дойду чемпионата түмүктүүр түһүмэххэ тахсара чугаһаата. Финал чиэппэригэр оонньуулар түмүктэригэр, финал аҥарыгар ханнык хамаандалар киирсэллэрэ билиннэ.

Ол курдук, Франция – Марокконы 2:0, Испания – Бельгияны 2:1, Англия – Норвегияны 2:1, Аргентина – Швейцарияны 3:1 ахсаанынан кыайдылар.

Аны, финалга тахсар иһин икки оонньуу хаалла:

От ыйын 15 күнүгэр сарсыарда 04:00 чааска Франция – Испания

От ыйын 16 күнүгэр сарсыарда 04:00 чааска Англия – Аргентина

Маныаха «Дьулурҕан» хаһыат футболга аан дойду чемпионатыгар анаан тэрийбит конкурсугар Петр Федоров, Николай Стручков: Испания – Англия; Нуолан, Егор Бурцев, Леонид Александров, Семен Оготоев, Андрей Филиппов, Влад Полятинскай, Прокопий Батюшкин: Испания — Аргентина; Алена Д, Татьяна, Анна, Николай Черкашин, Олег Кугданов, Ирина, Люба: Франция – Аргентина; Валентин Ким, Валериан: Франция – Англия хамаандалара финалга тахсыахтара диэн сылыктаабыттар.

Билиҥҥитэ итинник. Салгыы өссө ханнык хамаанда бастыырын, финал ханнык ахсаанынан түмүктэнэрин, үһүс миэстэни ханнык хамаанда ыларын, чемпионат бастыҥ футболиһынан ким ааттанарын сөпкө таайыахха наада.

Мин санаабар, конкурс кыайыылааҕынан бу ааттаммыт дьонтон биирдэстэрэ буолара буолуо. Конкурска киирбит билгэлээһиннэри «Дьулурҕан» хаһыат сайтыгар бэс ыйын 5 күнүгэр тахсыбыт «Болҕойуҥ, конкурс: Ханнык хамаанда бастыай?» https://dzulurgan.ru/2026/06/bolҕojuҥ-konkurs-hannyk-hamaanda-bastyaj/ диэн суруйуу анныгар баар Комментарии киирэн көрүөххүтүн, бэйэҕит санааҕытын этиэххитин сөп. Ол эрэн, сорохтор, бэйэлэрин билгэлээһиннэрин итиннэ буолбакка, атын сиргэ ыытан кэбиһэн, уустуктары үөскэттилэр.

Санатан эттэххэ, кыайыылаах – спорт таҥаһынан эргинэр «IRON COLLECTION» маҕаһыын cпортивнай көстүүмҥэ сертификатынан наҕараадаланыаҕа.

Саха сирин олохтоохторо, дьон-сэргэ биһирэбилин ылбыт «IRON COLLECTION» маҕаһыын салалтата, чуолаан Макар Зырянов биһиги көрдөһүүбүтүн ылынан, конкурска бириис туруорбутугар барҕа махтал!

Петр ПАВЛОВ.